កីឡា

សម្តេចតេជោ ហ៊ុន សែន ស្នើឲ្យលុបចោលការពិន័យ ៦ ខែលើកូនប្រុស អេ ភូថង ទាំងពីរនាក់

បានផុស

៥ ខែ មុន

នៅ

ថ្ងៃសុក្រ ២៧ កុម្ភៈ ២០២៦

ដោយ

សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធភានៃព្រះរាជាណាចក្រកម្ពុជា បានស្នើឲ្យសហព័ន្ធកីឡាប្រដាល់គុនខ្មែរលុបចោលការពិន័យរយៈពេល ៦ ខែលើកីឡាករ ម៉ឺន មេឃា និង អេ មាំម៉ារីនភូថង ដែលជាកូនប្រុសរបស់លោក អេ ភូថង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចតេជោបានសរសេរថា ៖«ក្រោយការផ្ទុះការវែកញែកលើរឿង សហព័ន្ធកីឡាប្រដាល់គុនខ្មែរហាមឃាត់កីឡាករ ២ រូបមិនឲ្យប្រកួតរយៈពេល ៦ ខែក្នុងពេលកីឡាករទាំងពីររូបកំពុងត្រៀមប្រកួតនៅក្រៅប្រទេស។ ខ្ញុំសូមសំណូមពរដ៏ទទូចឲ្យសហព័ន្ធកីឡាប្រដាល់គុនខ្មែរលុបចោលសេចក្តីជូនដំណឹងនេះសិន ព្រោះវាទាក់ទងជាមួយកិត្តិយសជាតិផង និងវិធីដោះស្រាយបញ្ហារបៀបរបបនៃការងារផ្ទៃក្នុងសហព័ន្ធផង។

ការដោះស្រាយផ្សេងទៀតរង់ចាំឲ្យកីឡាករទាំងពីររូប និងគណៈប្រតិភូវិលចូលប្រទេសវិញ ចាំពិភាក្សាដោះស្រាយជាក្រោយដោយស្មារតីសាមគ្គីភាព និងការយោគយល់គ្នា»។

ការពិន័យរបស់ សហព័ន្ធកីឡាប្រដាល់គុនខ្មែរ ត្រូវបានធ្វើឡើងកាលពីថ្ងៃទី២៥ ខែកុម្ភៈ ឆ្នាំ ២០២៦ ពាក់ព័ន្ធនឹងកីឡាករគុនខ្មែរទាំងពីរមិនគោរពតាមច្បាប់ទម្លាប់របស់ កងយោធពលខេមរភូមិន្ទ ដែលកីឡាករទាំងពីរជាទាហាន។ ការពិន័យនេះក៏ស្របពេលកីឡាករ ម៉ឺន មេឃា ចេញដំណើរទៅប្រកួតនៅប្រទេសអង់គ្លេស ខណៈកីឡាករ ម៉ឺន មេឃា មានឈ្មោះប្រកួតនៅថ្ងៃទី២៨ ខែកុម្ភៈ ឆ្នាំ ២០២៦ នៅខេត្តរតនគិរី។

បច្ចប្បន្ននេះ កីឡាប្រដាល់គុនខ្មែរ កំពុងរីកចម្រើនលើឆាកអន្តរជាតិដោយមានកីឡាករ កីឡាការិនីជាច្រើនចេញទៅប្រកួតនៅក្រៅប្រទេស។ ជាមួយគ្នានេះ ក៏មានកម្មវិធីប្រកួតជាច្រើនត្រូវបានម្ចាស់ឧបត្ថម្ភទៅរៀបចំនៅក្រៅប្រទេសដូចជា បារាំង អាមេរិក អូស្ត្រាលី ក្រិក និងប្រទេសជាច្រើនទៀត។ ទោះបីជាយ៉ាងណា បើឲ្យគិតឲ្យស៊ីជម្រៅទៅ បញ្ហាផ្ទៃក្នុងរបស់សហព័ន្ធក្នុងការគ្រប់គ្រង និងដឹកនាំនៅតែមាន ហើយគុណភាពនៃកីឡាករម្នាក់ៗក៏មិនសូវខ្លាំងដែរ ហើយជារឿយៗក៏រងការរិះគន់ពីអ្នកគាំទ្រដែរ៕