ជម្រើសជាតិនារីកម្ពុជា ចេញបញ្ជីឈ្មោះផ្លូវការ ចេញទៅចូលរួមប្រកួតស៊ីហ្គេម នៅវៀតណាម

សហព័ន្ធកីឡាបាល់ទាត់កម្ពុជា នៅព្រឹកថ្ងៃទី៣០ ខែមេសា ឆ្នាំ២០២២ បានប្រកាសបញ្ជីឈ្មោះផ្លូវការ កីឡាការិនីជម្រើសជាតិកម្ពុជា ចំនួន២០នាក់ ដើម្បីត្រៀមការប្រកួតកីឡាបាល់ទាត់ នៃព្រឹត្តិការណ៍កីឡាអាស៊ីអាគ្នេយ៍ លើកទី៣១ ឆ្នាំ២០២២ នៅប្រទេសវៀតណាម។

បញ្ជីឈ្មោះនេះសរុបមានកីឡាការិនី ២០នាក់ មកពី៤ក្លិប នៃពានរង្វាន់លីគបាល់ទាត់នារីកម្ពុជា ចូលរួមដូចជាក្លិបណាហ្គាវើលដ៍ កំពង់ស្ពឺ, ព្រះខ័នរាជស្វាយរៀង, ភ្នំពេញក្រោន និងសៀមរាបអែហ្វស៊ី។

ក្រុមបាល់ទាត់នារីជម្រើសជាតិកម្ពុជា ត្រូវបានចាប់ឆ្នោតស្ថិតទៅពូល A សម្រាប់ប្រភេទកីឡាបាល់ទាត់លើវិញ្ញាសាបាល់ទាត់នារី ក្នុងព្រឹត្តិការណ៍កីឡាអាស៊ីអាគ្នេយ៍ លើកទី៣១ នៅប្រទេសវៀតណាម ដោយរួមពូលជាមួយក្រុមខ្លាំងកម្រិត ពិពភលោក វៀតណាម និងហ្វីលីពីន ដែលទាំងពីរក្រុមនេះ នឹងត្រៀមចូលរួមការប្រកួតបាល់ទាត់ពិភពលោកនារី (FIFA Women’s World Cup) នៅឆ្នាំ២០២៣ ខាងមុខ។

ចំពោះការប្រកួតវិញ កម្ពុជា នឹងបើកឆាកគឺនៅថ្ងៃទី០៩ ខែឧសភា ដោយត្រូវជួបហ្វីលីពីន បន្ទាប់មកប្រកួតចុងក្រោយ ជួបម្ចាស់ផ្ទះវៀតណាម នៅថ្ងៃទី១៤ ខែឧសភា ឆ្នាំ២០២២៕

អត្ថបទ៖ មន្នីរ័ត្ន