កីឡា

មូលហេតុនេះ ក្រុមនគរបាលជាតិ និង អគ្គីសនីកម្ពុជា ឡើងវគ្គថ្នាក់ជាតិពានសម្តេចតេជោ ហ៊ុន សែន ស្វ័យប្រវត្តិ

បានផុស

៤ years មុន

នៅ

ថ្ងៃសុក្រ ២៤ មិថុនា ២០២២

ដោយ

ការប្រកួតវគ្គជម្រុះថ្នាក់ជាតិ ពានរង្វាន់បាល់ទាត់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា លើកទី១៦ ឆ្នាំ២០២២ត្រូវមានក្រុមចំនួន១៦ដែលត្រូវប្រកួតប្រជែងគឺ១២ក្រុមមកពីលីគទី២ និង៤ក្រុមមកពីជាប់វគ្គជម្រុះថ្នាក់ខេត្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះជាយ៉ាងណា ក្រុមទាំង១២នៅលីគទី២មានតែ១០ក្រុមប៉ុណ្ណោះដែលចូលរួមការប្រកួតប្រជែងវគ្គជម្រុះពានរង្វាន់សម្តេចតេជោ ហ៊ុន សែន ថ្នាក់ខេត្តគឺ អាស៊ី អឺរ៉ុប យូណាយធីត, ខេត្តបន្ទាយមានជ័យ, អាយ អេស អាយ ដង្កោសែនជ័យ, កោះកុង អេហ្វស៊ី, ណិចស្តិប, ព្រៃវែង អេហ្វស៊ី, ក្រុមបាល់ទាត់សៀមរាប, សូលទីឡូអង្គរ, អគ្គីសនីកម្ពុជា និងនគរបាលជាតិ។

ចំណែក ២ក្រុមផ្សេងទៀតគឺ ក្រុមយុវជនសាលាបាល់ទាត់ជាតិបាទី និងក្រុមខេត្តត្បូងឃ្មុំបានដកខ្លួនក្នុងការចូលរួមប្រកួតប្រជែងវគ្គជម្រុះថ្នាក់ជាតិនេះ។ ការចាប់គូប្រកួតវគ្គនេះ ក្រុមអគ្គីសនីកម្ពុជា និងនគរបាលជាតិ ត្រូវជួបក្រុមយុវជនសាលាបាល់ទាត់ជាតិបាទី និងខេត្តត្បូងឃ្មុំ។ ដូច្នេះដោយសារក្រុមទាំងពីរនេះដកខ្លួន ក្រុមអគ្គីសនីកម្ពុជា និងនគរបាលជាតិឡើងទៅវគ្គថ្នាក់ជាតិដោយស្វ័យប្រវត្តិ។

សូមបញ្ជាក់ការប្រកួត ជើងទី១ វគ្គជម្រុះថ្នាក់ជាតិ ពានរង្វាន់បាល់ទាត់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា លើកទី១៦ ឆ្នាំ២០២២បានបញ្ចប់ហើយដោយមានក្រុមមកពីថ្នាក់ខេត្តតែមួយគត់ទទួលបានជ័យជម្នះលើក្រុមមកពីលីគទី២។

លទ្ធផលជើងទី១ដូចខាងក្រោម៖

កំពត អេសហ្វស៊ី ២-៥ ព្រៃវែង អេហ្វស៊ី
ក្រុមឬទ្ធីសែន ២-៣ កោះកុង អេហ្វស៊ី
ខេត្តឧត្តរមានជ័យ ១-៣ អាយ អេស អាយ ដង្កោសែនជ័យ
ភ្នំពេញហ្គាឡាក់ស៊ី ២-១ អាស៊ី អឺរ៉ុប យូណាយធីត
ក្រុមបាល់ទាត់សៀមរាប ៣-២ ក្រុមបាល់ទាត់ណិចស្តិប
សូលទីឡូអង្គរ ២-០ ខេត្តបន្ទាយមានជ័យ

ការប្រកួតជើងទី២ នឹងធ្វើនៅថ្ងៃទី៦ និងទី៧ ខែកក្កដា ឆ្នាំ២០២២។ ការប្រកួតវគ្គជម្រុះថ្នាក់ជាតិនេះ នឹងយកចំនួន៨ក្រុមឡើងទៅវគ្គថ្នាក់ជាតិដើម្បីប្រកួតប្រជែងជាមួយក្លឹបទាំង៨នៅលីគកំពូលកម្ពុជា៕

អត្ថបទ៖ វីរបុត្រ