កីឡា

ល្ងាចនេះ ធន់ ផានិត ប៉ះថៃ ឡាហ្វាន់ ជាអ្នកជោកជាំសង្វៀនស្រុកខ្មែរ

បានផុស

៤ years មុន

នៅ

ថ្ងៃសុក្រ ៦ មករា ២០២៣

ដោយ

ជើងខ្លាំង ធន់ ផានិត បានឡើងសង្វៀនទៀតល្ងាចថ្ងៃសុក្រ ទី៦ ខែមករា នេះ បន្ទាប់ពីបានផ្តួលកីឡាករថៃកាលពីឆ្លងឆ្នាំ២០២២ ឈានចូលឆ្នាំ២០២៣។ លើកនេះរូបគេជួបកីឡាករថៃ ឡាហ្វាន់ ត.ភុសនីឆៃ ដែលធ្លាប់មកអង្រួនសង្វៀនស្រុកខ្មែរប្រហែល៤ឆ្នាំមកហើយ។

កីឡាករថៃ ឡាហ្វាន់ បានប្រកួតជាមួយអ្នកលេងគុនខ្មែរជាច្រើននាក់ទាំងកីឡាករចាស់វស្សា និងស្រករក្រោយ ក្នុងនោះកាលពីឆ្នាំ២០១៩ រូបគេបានផ្តួលអ្នកប្រដាល់គុនខ្មែរ វ៉ាន់ វឿន ឲ្យសន្លប់តាមរយៈការទាត់ផ្កាប់ចាន។ បន្ទាប់មករូបគេបានយកឈ្នះកីឡាករកម្ពុជា បាន លីម ដោយពិន្ទុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណា បន្ទាប់ពីចប់វិបត្តិកូវីដ-១៩ រូបគេមិនសូវជាកាក់កបឡើយ សូម្បីតែជួបកីឡាករវ័យក្មេងស្រករក្រោយក៏មិនទទួលបានលទ្ធផលល្អប្រសើរដែរ។ រូបគេបានចាញ់ចាញ់ពិន្ទុកីឡាករ ធន់ វណ្ណា, ចាញ់សន្លប់ ពេជ្រ កក្កដា, ចាញ់ពិន្ទុ ធន់ ក្របី, ចាញ់ពិន្ទុ ចាន់ សាន់ និងចាញ់ពិន្ទុ សឿន ថៃសាន់។

បើតាមមើលបច្ចេកទេសនៃការប្រកួតរបស់ ឡាហ្វាន់ គឺក្បាច់ទាត់ជាអាវុធពិសេសរបស់គេ ហើយមិនសូវមានស្មារតីប្រយុទ្ធអង់អាច ក្លាយហានទេ ដោយសាររូបគេភាគច្រើនវ៉ៃចេញមួយៗ ថយក្រោយ និងទាត់កាត់រាល់ពេលដៃគូចូលវ៉ៃ។ លក្ខណៈពិសេសរបស់គេគឺកាយសម្បទាខ្ពស់ល្អ។

ចំណែក ធន់ ផានិត បន្ទាប់ពីចាញ់ ពេជ្រ សម្បត្តិ វគ្គពាក់កណ្តាលផ្តាច់ព្រ័ត្រក្នុងការប្រកួតខ្សែក្រវាត់កាលពីឆ្នាំ២០២២កន្លងមក រូបគេមិនដែលចាញ់សោះ។ រាល់ការឡើងសង្វៀនចុងក្រោយនេះគឺផ្តួលដៃគូរហូត ជាពិសេសរន្ទះជើងទាត់ក្រោមឲ្យដៃគូឈរលែងរួចតែម្តង។

យប់នេះ ធន់ ផានិតអាចនឹងផ្តួល ឡាហ្វាន់ តាមរយៈការទាត់ជើងក្រោមទៀត ខណៈអ្នកទាំងពីរមានកម្ពស់ល្អដូចគ្នា៕

អត្ថបទ៖ វីរបុត្រ