កីឡា

ខ្សែប្រយុទ្ធព្រះខ័នរាជស្វាយរៀង Haber ឈ្នះពានកីឡាករល្អប្រចាំការប្រកួត៣សប្តាហ៍ជាប់គ្នា

បានផុស

៣ years មុន

នៅ

ថ្ងៃចន្ទ ២១ សីហា ២០២៣

ដោយ

ខ្សែប្រយុទ្ធជនជាតិកាណាដា Marcus Haber បានក្លាយជាកីឡាករល្អជាងគេ៣សប្តាហ៍ជាប់គ្នាក្នុងការប្រកួតខេមបូឌានព្រីមៀរលីគរដូវកាល២០២៣-២៤ ដែលដំណើរការបាន៣សប្តាហ៍ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សប្តាហ៍ទី១ នៅថ្ងៃទី៦ ខែសីហា Marcus Haber រកបាន២គ្រាប់នៅពេលដែលរូបគេបានជួយព្រះខ័នរាជស្វាយរៀងឲ្យទទួលបានជ័យជម្នះដោយលទ្ធផល ០-២ លើម្ចាស់ផ្ទះក្រសួងការពារជាតិ។ រូបគេបានក្លាយជាកីឡាករល្អប្រចាំការប្រកួត។

សប្តាហ៍ទី២ នៅថ្ងៃទី១១ ខែសីហា ក្រុមភ្ញៀវភ្នំពេញក្រោនបានបើកការនាំមុខ ០-១ នៅនាទីទី៣០ក្នុងវគ្គទី១ដោយកីឡាករ ប្រាក់ ធីវ៉ា ប៉ុន្តែក្រុមម្ចាស់ផ្ទះព្រះខ័នរាជស្វាយរៀងបានវាយបកយកឈ្នះដោយលទ្ធផល ២-១។ គ្រាប់បាល់ជ័យជម្នះរកបានដោយ Marcus Haber នៅនាទី៤៨ និងនាទី៩០+៣។ ខ្សែប្រយុទ្ធរូបនេះបានក្លាយជាកីឡាករល្អប្រចាំការប្រកួតជាលើកទី២។

សប្តាហ៍ទី៣ នៅថ្ងៃទី២០ ខែសីហា រវាងម្ចាស់ផ្ទះព្រះខ័នរាជស្វាយរៀង និងណាហ្គាវើលដ៍ពិតជាតឹងតែងខ្លាំងមែនទែន។ ក្រុមម្ចាស់ផ្ទះព្យាយាមវាយសម្រុក និងដាក់សម្ពាធ ខណៈក្រុមភ្ញៀវព្យាយាមការពារ និងវាយបក ប៉ុន្តែគ្រាប់បាល់កើតមានតែ១គត់ដោយ Haber តែតចូលនៅនាទី៨២ ដែលរូបគេបានក្លាយជាកីឡាករល្អប្រចាំការប្រកួតជាលើកទី៣។

គិតត្រឹមសប្តាហ៍ទី៣នេះ Marcus Haber កំពុងរកបានគ្រាប់បាល់ច្រើនជាងគេ (Top Scorer) គឺ៥គ្រាប់ដែលតាមពីក្រោយដោយខ្សែប្រយុទ្ធរបស់វិសាខា Bastos Jonata រកបាន៤គ្រាប់ ក្នុងនោះប៉េណាល់ទី២គ្រាប់។

ព្រះខ័នរាជស្វាយរៀង កំពុងឈរចំណាត់ថ្នាក់លេខ២នៃសតារាងពិន្ទុ ខេមបូឌានព្រីមៀរលីគ រដូវកាល២០២៣-២៤ដោយមាន៦ពិន្ទុស្មើនឹងក្រុមចំណាត់ថ្នាក់លេខ១ វិសាខា ដែលមានគ្រាប់បាល់ចំណេញច្រើនជាង ហើយក្រុមទាំងពីរមិនទាន់ស្គាល់បរាជ័យ ឬស្មើដូចគ្នា៕