ជួបបញ្ហារដូវកាលមុន ធ្វើឱ្យព្រះខ័នរាជស្វាយរៀង ​បង្កើន​ផែនការនាំចូលកីឡាករជាន់តួនាទី​ច្រើន

លោក Matthew McConkey គ្រូបង្វឹកថ្មីរបស់ក្រុមព្រះខ័នរាជស្វាយរៀង បានលើកឡើងអំពីមូលហេតុធំមួយ ដែលក្រុមការពារតំណែងជើងជើងឯកលីគកំពូល កម្ពុជា រដូវកាលថ្មីនាំចូលកីឡាករលេងជាន់តួនាទីគ្នាច្រើន ជាពិសេសគ្រាន់តែប្រយុទ្ធមានដល់ ១០ នាក់។

នៅរដូវកាលថ្មី ២០២៥-២០២៦ នេះ ឃើញថា ក្រុមព្រះខ័នរាជស្វាយរៀង បាន​បង្ហាញការត្រៀមខ្លួនល្អខ្លាំង បើធៀបនឹងរដូវកាលមុនៗ។ ពួកគេបាននាំចូលកីឡាករថ្មីៗជាច្រើន ដូចជា សុផល ឌីម៉ង់, ចិន ណារក្ស, Yudai Ogawa, សៀង ចន្ធា, ចន្ថា ចន្ទាកា, សឿត បារាំង, Kwame Peprah និង Patrick Robson ជាដើម។ បើក្រឡេកមកមើលចំនួនកីឡាករតាមតួនាទីនីមួយៗ នៅតំបន់អ្នកចាំទីមាន ៤ នាក់, តំបន់ខ្សែការពារ មាន ៨ នាក់, តំបន់បម្រើមាន ១១ នាក់, តំបន់ប្រយុទ្ធមានចំនួន ១០ នាក់។

ថ្លែងនៅក្នុងកិច្ចសម្ភាសជាមួយសារព័ត៌មាន «កម្ពុជាថ្មី» លោក McConkey បានមានប្រសាសន៍ថា៖ «ខ្ញុំ​បាន​ឃើញ​នៅ​តាម​បណ្តាញ​ទំនាក់​ទំនង​សង្គម​ពី​រឿង​នេះ​ដែរ។ ខ្ញុំ​បាន​ឃើញ​ការ​​បង្ហោះ​មួយ​ថា យើង​មាន​ខ្សែ​ប្រយុទ្ធ ១២ នាក់ ​នៅ​តំបន់​ ៣ ផ្សេង​គ្នា។ ខ្ញុំ​គិត​ថា នេះ​មិន​មែន​​ជាបញ្ហា​ចោទ​ទេ។ កីឡាករ​តែង​តែ​មាន​បញ្ហា និង​មាន​របួស​តិច​តូច​ខ្លះ​មិន​ខាន»។

បុរសសញ្ជាតិ អៀរឡង់ វ័យ ៣២ ឆ្នាំ បានមានប្រសាសន៍បន្តថា ៖«វា​អាច​ជា​បញ្ហា​​​ធំ​មួយ​ដែល​យើង​មាន ប៉ុន្តែ​ទាំង​នេះ​ជា​អ្វី​ដែល​យើង​ត្រូវ​ការ ពី​ព្រោះ​ខ្ញុំ​ដឹង​យ៉ាង​ច្បាស់​ថា ​មិន​មែន​គ្រប់​កីឡាករ​សុទ្ធ​តែ​​អាច​លេង​ល្អ​ពេញមួយ​រដូវ​កាល​នោះ​ទេ។ យើង​បាន​ជួប​ស្រាប់​ហើយ​កាល​ពី​រដូវ​កាល​មុន។ នៅ​​ខែ​មករា និង​ខែ​កុម្ភៈ យើង​មាន​កីឡាករ​​ជា​ច្រើន​មាន​បញ្ហា ពី​ព្រោះ​​កម្មវិធី​ប្រកួត​មមាញឹក​​ពេក​ ​ហើយ​រដូវ​កាល​ថ្មី​ ​យើង​ក៏​រវល់​មិន​ខុស​ពី​រដូវ​កាល​មុន​ដែរ។ យើង​ពិត​ជា​មិន​ចង់​បង្ខំ​ឲ្យ​កីឡាករ​លេង​គ្រប់​ការ​ប្រកួត​នោះ​ទេ។ យើង​ចង់​ឲ្យ​កីឡាករ​ខ្លះ​បាន​លេង ហើយ​កីឡាករ​ខ្លះ​បាន​សម្រាក។ នេះ​ជា​បញ្ហាដ៏​អាក្រក់​ដែល​យើង​​បាន​ជួប​កាល​​ពី​រដូវ​កាល​មុន ហើយយើង​ត្រូវ​តែ​ត្រៀម​ខ្លួន​​​ឲ្យ​ល្អ»។

តាមការលើកឡើងរបស់លោក McConkey គឺដោយសារបទពិសោធពីរដូវកាលមុន ព្រះខ័នរាជស្វាយរៀង មានកាលវិភាគប្រកួតច្រើន ទាំងពានក្នុងស្រុក និងអន្តរជាតិ ដែល​បានធ្វើឱ្យកីឡាករជាច្រើនមានបញ្ហារបួស ខណៈមានកីឡាករមួយចំនួនបានអវត្តមានចំពេលការប្រកួតសំខាន់ៗថែមទៀត ទើបធ្វើឱ្យរដូវកាលថ្មីនេះ ក្លិបផ្លាស់ប្តូរផែនការ ដោយនាំចូលកីឡាករយ៉ាងច្រើនមកជួយក្រុម ហើយអាចឱ្យកីឡាករមានពេលលេង និងសម្រាកបានគ្រប់គ្រាន់។

គួរឱ្យដឹងថា នៅរដូវកាលថ្មី ២០២៥-២០២៦ ព្រះខ័នរាជស្វាយរៀង ក៏មានភារកិច្ចប្រកួតច្រើន មិនខុសពីរដូវកាលមុនដែរ ដោយពួកគេត្រូវចូលរួមប្រកួតពានចំនួន ៥ ផ្សេងគ្នា ដូចជាក្របខណ្ឌលីគកំពូលកម្ពុជា Cambodian Premier League, ពានបើករដូវកាល Cambodian Super Cup, ពានសម្តេចតេជោ ហ៊ុន សែន, ពាន AFC Challenge League និងពាន Shopee Cup៕

សូម​ទស្សនាខ្លឹមសារ​លំអិតក្នុង​វីដេអូ​បទ​សម្ភាស

https://www.facebook.com/sport.kpt/videos/1775998899657790

អត្ថបទ៖ សេម កុសល