មកដល់ខ្មែរភ្លាម Dave Leduc ប្រកាសក្តែងៗស្វែងរកមុខ ព្រំ សំណាង

កីឡាករប្រដាល់មីយ៉ាន់ម៉ា Dave Leduc​ បាន​ប្រកាស​ស្វែង​រក​មុខ​ដៃ​គូ​ប្រកួតរបស់​ខ្លួន​គឺ​កីឡាករ​ ព្រំ សំណាង នៅ​ពេល​បាន​ដល់ប្រទេសកម្ពុជាកាលពីយប់មិញ ស្រប​ពេល​ទទួលបានស្វាគមន៍យ៉ាងកក់ក្តៅពីម្ចាស់ផ្ទះ​កម្ពុជា។

វត្តមានរបស់ Dave Leduc មកដល់ទឹកដីកម្ពុជាត្រូវបានអ្នករៀបចំកម្មវិធីប្រកួត និងអ្នកសារព័ត៌មានយ៉ាងច្រើនកុះករទទួលស្វាគមន៍ និងធ្វើបទសម្ភាសដែលមើលទៅពិតជាផ្តល់ឲ្យកីឡាករមីយ៉ាន់ម៉ារូបនេះទទួលបានភាពកក់ក្តៅ និង​មាន​កិត្តិយស។

អ្នកគ្រប់គ្នាដែលបានជួប​កីឡាករ​មីយ៉ាន់ម៉ា​នៅអាកាសយានដ្ឋានអន្តរជាតិភ្នំពេញបានចាប់អារម្មណ៍យ៉ាងខ្លាំង​នៅ​ពេល​ស្តេច​ប្រដាល់មីយ៉ាន់ម៉ា Leduc បានស្រែកខ្លាំងៗនៅចំពោះមុខមនុស្សយ៉ាងច្រើនថា ព្រំ សំណាង នៅឯណា? ព្រំ សំណាង នៅឯណា?

នៅព្រឹកនេះ Dave Leduc បានបង្ហោះរូបភាពដែលខ្លួនទទួលបានស្វាគមន៍ និងផ្តល់បទសម្ភាសដល់អ្នកសារព័ត៌មានដោយបានសារគួរឲ្យចាប់អារម្មណ៍ទៀតថា ព្រំ សំណាង នៅឯណា?

តាមការគ្រោងទុក នៅថ្ងៃទី២ ខែវិច្ឆិកា កីឡាករ ព្រំ សំណាង និង Dave Leduc ត្រូវបានសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាអនុញ្ញាតឲ្យចូលជួបសម្តែងការគួរសមដើម្បីពង្រឹងចំណងមិត្តភាពរវាងប្រទេសទាំងពីរមុនពេលការប្រកួតនៅថ្ងៃអាទិត្យចុងសប្តាហ៍នេះ៕

អត្ថបទ៖ វីរបុត្រ