បញ្ជាក់ពីមូលហេតុ លន បញ្ញា និង​ ពេជ្រ ប៊ុនសិទ្ធមិនអាចប្រកួតបាននៅអូស្ត្រាលី

កីឡាករ​ប្រដាល់​កម្ពុជា​២​រូប​គឺ លន បញ្ញា និង ពេជ្រ ប៊ុនសិទ្ធ មិន​អាច​​ប្រកួត​បាន​ទេ​​នៅ​​ប្រទេស​អូស្ត្រាលី ​នា​ថ្ងៃ​ទី​៥ ខែ​វិច្ឆិកា ឆ្នាំ​២០២៣​ ដោយសារគ្រូ​ពេទ្យ​មិន​អនុញ្ញាត​ឲ្យ​ប្រកួត​។

តាម​ការ​ឲ្យ​ដឹង​ពី​លោកគ្រូ ពេជ្រ សុផាន់ ថា ការ​ធ្វើ​តេស្ត​សុខភាព​នៅ​អូស្ត្រាលី​ថ្លៃ​គឺ​អស់​លុយ​ប្រមាណ​១៦៥០​ដុល្លារ​អាមេរិក​ក្នុង​ចំណោម​កីឡាករ​កម្ពុជា​ទាំង​​៥​រូប ហើយ​កីឡាករ​២​រូប​គឺ លន បញ្ញា និង ពេជ្រ ប៊ុនសិទ្ធ មាន​បញ្ហា​សុខភាព​ដែល​មិន​អាច​ប្រកួត​បាន។ ប្រសិន​បើ​បាន​ទៅ​ដល់​អូស្ត្រាលី​ច្រើន​ថ្ងៃ​មុន​ប្រហែល​ជាទម្លាប់​នឹង​បរិយាស​នៅ​ទី​នោះ ហើយ​សុខភាព​ល្អ​ប្រសើរ ប៉ុន្តែ​ទៅ​ដល់​មុន​តែ​៤​ថ្ងៃ​ ស្រប​ពេល​អាកាស​ធាតុ​ត្រជាក់​ផង។

កីឡាករ លន បញ្ញា ត្រូវ​បាន​ជំនួស​ដោយ​កីឡាករ ម៉ឺន មេឃា ​កូន​ប្រុស​របស់​លោក អេ ភូថង និង​ជាបងប្រុស​បង្កើត​របស់ អេ អាំម៉ារីន ដើម្បី​ជួបកីឡាករ​អូស្ត្រាលី Cian Lougheed ដណ្តើម​ខ្សែ​ក្រវាត់​គុន​ខ្មែរ​ពិភព​លោក​ទម្ងន់​៦៥គីឡូក្រាម។​ តាម​ពិត​ទៅ ម៉ឺន មេឃា ទៅ​អូស្ត្រាលីដើម្បី​​ដល់​ប្អូន​​ប្រុស​ក្នុង​ការ​ប្រកួត ស្រាប់​​ត្រូវ​បាន​ជំនួស​ឲ្យ​ឡើង​ប្រកួត។

ចំណែក ការ​ប្រកួត​របស់​កីឡាករ ពេជ្រ ប៊ុនសិទ្ធ និង​កីឡាករអូស្ត្រាលី Moo Do ត្រូវ​បាន​លុប​ចោល​តែ​ម្តង។

គូ​ប្រកួត​របស់​កម្ពុជា

• ពេជ្រ សម្បត្តិ vs Tum Kitti Patkam ទម្ងន់​៦០​គក ដណ្តើម​ខ្សែ​ក្រវាត់គុន​ខ្មែរ
• អេ អាំម៉ារីនភូថង vs Clinton Corke ទម្ងន់​៦៦​គក ដណ្តើម​ខ្សែ​ក្រវាត់គុន​ខ្មែរ
• ម៉ឺន មេឃា vs Cian Lougheed ទម្ងន់​៦៥​គក ដណ្តើម​ខ្សែ​ក្រវាត់គុន​ខ្មែរ
• គឿម សុវណ្ណគីម vs Fahed Haidar ទម្ងន់៥៥គក

អត្ថបទ៖ វីរបុត្រ