IOC នឹង​មិន​ដាក់​ទណ្ឌកម្ម​អ៊ីស្រាអែល​ ពីការ​ប្រកួត​កីឡា​អូឡាំពិក២០២៤ឡើយ

គណៈកម្មាធិការអូឡាំពិកអន្តរជាតិ (IOC) គ្មានគម្រោងដាក់ទណ្ឌកម្មអ៉ីស្រាអែល ជុំវិញសង្គ្រាមនៅហ្គាហ្សា មុនព្រឹត្តិការណ៍អូឡាំពិកប៉ារីស​ឡើយ។ នេះបើតាមលោក Pierre-Olivier Beckers-Vieujan ប្រធានគណៈកម្មាធិការសម្របសម្រួលអូឡាំពិកឆ្នាំ២០២៤ របស់ IOC បាននិយាយថា “វាចេញពីចំណោទ​ដែលត្រូវគិតអំពីការដាក់ទណ្ឌកម្មប្រឆាំងនឹងអ៉ីស្រាអែលនៅដំណាក់កាលនេះ” ។

សកម្មជនប៉ាឡេស្ទីនមួយចំនួន និងក្រុមសមាជិកសភាបារាំងឆ្វេងនិយមមួយក្រុម បានអំពាវនាវឱ្យអ៉ីស្រាអែល ទទួលរង​ទណ្ឌកម្មពី​ IOC សម្រាប់សង្គ្រាមនៅតំបន់ហ្គាហ្សា។ ប្រធានគណៈកម្មាធិការសម្របសម្រួលអូឡាំពិកទីក្រុងប៉ារីសឆ្នាំ២០២៤ របស់ IOC បាននិយាយថា ជម្លោះហ្គាហ្សា​ និងសង្រ្គាមនៅអ៊ុយក្រែន ដែលទីក្រុងម៉ូស្គូត្រូវបានផ្អាកដោយ IOC គឺជា “ស្ថានភាពផ្សេងគ្នា” ។

“ហេតុផលដែលនាំឱ្យ IOC ដាក់ទណ្ឌកម្មរុស្ស៊ីដំបូង ពី​ព្រោះ​គណៈកម្មាធិការអូឡាំពិករុស្ស៊ី (ROC) គឺជាក់លាក់ណាស់។ រុស្ស៊ី បានធ្វើឱ្យខូចផ្នែកសំខាន់ៗនៃធម្មនុញ្ញអូឡាំពិក។

បួនថ្ងៃបន្ទាប់ពីសង្រ្គាមរវាងរុស្ស៊ី និងអ៊ុយក្រែន បានចាប់ផ្តើម IOC បានអំពាវនាវឱ្យសហព័ន្ធកីឡាអន្តរជាតិទាំងអស់ដកអត្តពលិក​រុស្ស៊ី និងបេឡារុស្សចេញពីការប្រកួតរបស់ពួកគេ និងលុបចោលព្រឹត្តិការណ៍នាពេលអនាគតនៅក្នុងប្រទេស​រុស្ស៊ី។​ ប្រធាន IOC លោក Thomas Bach បាននិយាយ​ថា រុស្ស៊ីបានរំលោភលើធម្មនុញ្ញអូឡាំពិក ហើយបទឈប់បាញ់​គ្នា​អូឡាំពិក ដែលបានចុះហត្ថលេខាភ្លាមៗបន្ទាប់ពីព្រឹត្តិការណ៍អូឡាំពិកទីក្រុងប៉េកាំង។

IOC បានព្យួរគណៈកម្មាធិការអូឡាំពិករុស្ស៊ីកាលពីខែតុលាឆ្នាំមុន បន្ទាប់ពីខ្លួនបានទទួលយកអង្គការកីឡាក្នុងតំបន់នៅភាគខាងកើតអ៊ុយក្រែនដែលកាន់កាប់ដោយរុស្ស៊ីជាសមាជិក។ អត្តពលិករុស្ស៊ី និងបេឡារុស្ស នឹងត្រូវបានអនុញ្ញាតឱ្យចូលរួមប្រកួតក្នុងព្រឹត្តិការណ៍កីឡាប៉ារីសឆ្នាំនេះ ក្នុងនាមជាក្រុមអព្យាក្រឹត​ដែល​អត្តពលិក​ឯកត្តជន​ (មិនមែនក្រុម) ហើយ​ពួកគេមិនគាំទ្រសកម្ម​សង្គ្រាមនៅអ៊ុយក្រែន។ IOC ប៉ាន់ប្រមាណថា មាន​អត្តពលិករុស្ស៊ី​តែ​៨នាក់ និងបេឡារុស្ស ៣នាក់ប៉ុណ្ណោះដែលមានលក្ខណៈសម្បត្តិអព្យាក្រឹត ទោះបីជាមានការរំពឹងទុកកាន់តែខ្លាំងឡើងថា រុស្ស៊ីនឹងធ្វើពហិការព្រឹត្តិការណ៍ទាំងមូលក៏ដោយ។ 

លោក Bach បាននិយាយនៅសប្តាហ៍នេះថា អត្តពលិកអ៉ីស្រាអែលនឹងទទួលបានការការពារពិសេសក្នុងអំឡុងពេលការប្រកួតកីឡាប៉ារីស។ លោកបាននិយាយនៅក្នុងការកត់សម្គាល់ដែលដកស្រង់ដោយកាសែតស្វីស 24 Heures​ ថា​ “វិធានការនឹងត្រូវធ្វើឡើង”។

«ប្រជាជនអ៉ីស្រាអែលត្រូវតែមានអារម្មណ៍សុខស្រួលក្នុង​ព្រឹត្តិការណ៍ប្រកួត។ មនុស្សគ្រប់គ្នាត្រូវតែត្រូវបានប្រព្រឹត្តដោយស្មើភាពគ្នា មិនថានៅក្នុងភូមិអូឡាំពិក ឬកន្លែងផ្សេងទៀតនោះទេ។ មនុស្សគ្រប់គ្នាត្រូវតែគោរព និងមានអាកប្បកិរិយាគួរសម» សម្ដីរបស់ លោក Bach៕

ប្រែសម្រួល៖ មន្នីរ័ត្ន
ប្រភព៖ AFP