ពង្រឹងសុវត្ថិភាពគណនីបណ្តាញទំនាក់ទំនងសង្គម តែមើលរំលងសុវត្ថិភាព Gmail ជាកំហុសដ៏ធំ

ជាទូទៅ នៅពេលដែលបង្កើតគណនីបណ្តាញទំនាក់ទំនងសង្គម យើងច្រើនតែប្រើ Gmail ទៅបង្កើត ហើយ Gmail បានក្លាយជាការផ្សារភ្ជាប់មួយដ៏សំខាន់ សម្រាប់គណនីបណ្តាញទំនាក់ទំនងសង្គមរបស់យើង ដែលអាចជួយ reset password និងកំណត់មុខងារសុវត្ថិភាព លើគណនីទាំងនោះបានផងដែរ។

អ្នកប្រើប្រាស់កម្មវិធីលើប្រព័ន្ធអនឡាញមួយចំនួន ច្រើនខ្វាយខ្វល់ពីការកំណត់មុខងារសុវត្ថិភាពលើបណ្តាញទំនាក់ទំនង សង្គមហ្វេសប៊ុក IG និងកម្មវិធីផ្សេងទៀត ដោយយល់ឃើញថា វាអាចជួយការពារពីការ Hack តែមិនបានយកចិត្ត ទុកដាក់លើបណ្តាញដែលផ្សារភ្ជាប់នឹងគណនីទាំងអស់នោះទៅវិញ។

បើទោះបីជាមានការការពារលើមុខងារសុវត្ថិភាព លើប្រព័ន្ធប្រតិបត្តិការ ឬគណនីបណ្តាញទំនាក់ទំនងសង្គមក៏ដោយ ប៉ុន្តែដាច់ខាត មិនត្រូវប្រហែសចំពោះ Gmail ឡើយ ព្រោះទូទៅហើយ សម្រាប់អ្នកដែលបង្កើត Gmail គឺដើម្បីប្រើប្រាស់ក្នុងការបញ្ជូនឯកសារ ឆ្លើយឆ្លងគ្នា និងភ្ជាប់ជាមួយកម្មវិធីផ្សេងៗ សូម្បីតែគណនី ក្នុងកម្មវិធីធនាគារ​តាមប្រព័ន្ធ​អនឡាញ។ បើសិនជាលោកអ្នក មានទម្លាប់ប្រើ Gmail មួយ ភ្ជាប់ជាមួយគ្រប់គណនីគ្រប់កម្មវិធី ចាំបាច់បំផុត ដាក់មុខងារសុវត្ថិភាពឥលូវនេះ។

ចំពោះការពង្រឹងលើប្រព័ន្ធសុវត្តិភាពលើ មិនជាខុសគ្នានឹងការកំណត់លើកម្មវិធីផ្សេងឡើយ ដោយកំណត់លើមុខងារ Two-Factor Authentication; ប្រើប្រាស់លេខសម្ងាត់ដែលមិនងាយឱ្យគេទាយដឹង និងបញ្ចូល លេខទូរស័ព្ទផ្ទាល់ខ្លួន សម្រាប់ Verify ឬអាចបន្ថែម Email មួយទៀត ដែលគ្រប់គ្រងលើ Gmail របស់យើងបាន៕

អត្ថបទ៖ សុធា