ចរាចរណ៍

រថយន្ដMazda បុករះម៉ូតូពីរគ្រឿងស្លាប់ម្នាក់និងរបួសធ្ងន់ម្នាក់

បានផុស

៤ years មុន

នៅ

ថ្ងៃព្រហស្បតិ៍ ២៤ កុម្ភៈ ២០២២

ដោយ

មនុស្សម្នាក់បានស្លាប់យ៉ាងអាណោចអាធ័មនៅកន្លែងកើតហេតុ និងម្នាក់ទៀតរងរបួសធ្ងន់ ដោយសារជួបហេតុការណ៍គ្រោះថ្នាក់ចរាចររថយន្តបុកម៉ូតូពីរគ្រឿង ក្នុងទិសដៅបញ្ច្រាសគ្នា នៅវេលាម៉ោង១និង៥០នាទីរសៀល ថ្ងៃទី២៤ ខែកុម្ភៈ ឆ្នាំ២០២២ ត្រង់ចំណុចភូមិបឹងធំខាងកើត ឃុំអង្គសុរភី ស្រុកកំពង់ត្រាច ខេត្តកំពត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជុំវិញករណីគ្រោះថ្នាក់ដ៏រន្ធត់នេះ បើតាមសាក្សីដែលឃើញហេតុការណ៍ផ្ទាល់បាននិយាយថា មុនពេលជួបរឿងអកុសល គេឃើញជនរងគ្រោះទាំងពីរនាក់ ធ្វើដំណើរតាមម៉ូតូពីរគ្រឿងផ្សេងគ្នាក្នុងទិសដៅពីកើតទៅលិច ដោយជនរងគ្រោះ(អ្នកស្លាប់) ជិះម៉ូតូម៉ាកC125 ផលិតឆ្នាំ២០១៤ នៅខាងមុខ រីឯម្នាក់ទៀតដែលរងរបួសធ្ងន់ជិះម៉ូតូC125 សេរីឆ្នាំ២០២០នៅខាងក្រោយ លុះមកដល់ចំណុចកើតហេតុ ក៏មានរថយន្តម៉ាក ម៉ាស្តា(Mazda) ពណ៌ស មួយគ្រឿងបានបោះពួយក្នុងល្បឿនលឿនមកពីលិចទៅកើត ក្នុងទិសដៅផ្ទុយគ្នា ហើយរថយន្តបង្កបានវ៉ាជែងរថយន្តមួយគ្រឿងផ្សេងទៀតនៅខាងមុខ ទើបជ្រុលទៅបុករះម៉ូតូជនរងគ្រោះទាំងពីរគ្រឿង បណ្តាលឱ្យមានមនុស្សស្លាប់និងរបួសធ្ងន់ ហើយរថយន្តបង្កបានបើកគេចឆ្ពោះទៅទិសខាងលិចបាត់ស្រមោលតែម្តង។

ពាក់ព័ន្ធករណីគ្រោះថ្នាក់ចរាចរនេះ សមត្ថកិច្ចបានឱ្យដឹងថា អ្នកស្លាប់ក្នុងហេតុការណ៍ខាងលើ មានឈ្មោះ ចាន់ ភារម្យ ភេទប្រុស អាយុ៤៥ឆ្នាំ មានទីលំនៅក្នុងទីរួមស្រុកកំពង់ត្រាច ខេត្តកំពត ដោយជនរងគ្រោះជិះម៉ូតូ ម៉ាក C125 ផលិតឆ្នាំ២០១៤ ពាក់ស្លាកលេខ ភ្នំពេញ 1S-0032។ដោយឡែកអ្នករងរបួសធ្ងន់ ជិះម៉ូតូC125 ឆ្នាំ២០២០ មិនទាន់ស្គាល់អត្តសញ្ញាណនៅឡើយ ខណៈជនរងគ្រោះត្រូវបានគេដឹកបញ្ជូនទៅសង្គ្រោះនៅឯមន្ទីរពេទ្យ។

បច្ចុប្បន្នសពជនរងគ្រោះត្រូវបានក្រុមគ្រួសារមកដឹកទៅកាន់លំនៅដ្ឋាន ដើម្បីរៀបចំធ្វើបុណ្យតាមប្រពៃណី៕

អត្ថបទ៖ សេង ណារិទ្ធ