នគរបាលក្រុងកំពង់ឆ្នាំង ចុះអនុវត្តច្បាប់ចរាចរណ៍​ផាកពិន័យអ្នកបើកបរម៉ូតូនិងរថយន្ត ២១នាក់

កម្លាំងនគរបាលចរាចរណ៍ក្រុងកំពង់ឆ្នាំង សហការជាមួយកម្លាំងនគរបាលចររាចរណ៍ខេត្ត បានចុះពង្រឹងនិងអនុវត្តច្បាប់ចរាចរណ៍នៅក្នុងក្រុងកំពង់ឆ្នាំង ដោយផាកពិន័យអ្នកបើកបរម៉ូតូ និងរថយន្តល្មើសច្បាប់បានចំនួន២១នាក់។

លោកវរៈសេនីយ៍ទោ ហង្ស ប៊ុនហាក់ អធិការរងនគរបាលក្រុងកំពង់ឆ្នាំង ទទួលបន្ទុកចរាចរណ៍នៅល្ងាចថ្ងៃទី២៦ ខែមេសា ឆ្នាំ២០២២ បានឲ្យដឹងថា អនុវត្តតាមបទបញ្ជាលោកឧត្តមសេនីយ៍ទោ ខូវ លី ស្នងការនគរបាលខេត្តកំពង់ឆ្នាំង និងបទបញ្ជារបស់ឯកឧត្តម ស៊ុន សុវណ្ណារិទ្ធិ គណៈបញ្ជាការឯកភាពរដ្ឋបាលខេត្តកំពង់ឆ្នាំង រយៈពេលមួយថ្ងៃសមត្ថកិច្ចនគរបាលចរាចរណ៍ក្រុងកំពង់ឆ្នាំងសហការជាមួយនគរបាលចរាចរណ៍ខេត្តបានចុះប្រតិបត្តិការអនុវត្តច្បាប់ចរាចរណ៍នៅក្នុងក្រុងកំពង់ឆ្នាំង ជាលទ្ធផលបានផាកពិន័យអ្នកបើកបរម៉ូតូ និងរថយន្ត​ល្មើសច្បាប់ចំនួន២១នាក់ ក្នុងនោះមានអ្នកបើកបររថយន្តចំនួន៥នាក់ផងដែរ ។

លោក ហ្សង ប៊ុនហាក់ បានបន្តថា កិច្ចប្រតិបត្តិការខាងលើនេះ គឺពេលព្រឹកបានចុះធ្វើការអនុវត្តច្បាប់ចរាចរណ៍នៅក្នុងសង្កាត់ផ្សារឆ្នាំង និងពេលល្ងាចបានចុះធ្វើការនៅក្នុងសង្កាត់ប្អេរ និងសង្កាត់កំពង់ឆ្នាំង ។

បទល្មើសដែលអ្នកបើកបរបានចាំមើលច្បាប់ចរាចរណ៍នោះ គឺការបើកបរម៉ូតូមិនពាក់មួកសុវត្ថិភាព ត្រូវផាកពិន័យ ៦ម៉ឺនរៀល , ជិះម៉ូតូនិយាយទូរស័ព្ទពិន័យ ៨ម៉ឺនរៀល ,បើកម៉ូតូអត់ផ្លាកលេខពិន័យ ១២ម៉ឺនរៀល,ចតម៉ូតូលើគំនូសហាមឃាត់លើផ្លូពិន័យ ៦ម៉ឺនរៀល , បើករថយន្តមិនពាក់ខ្សែក្រវ៉ាត់ពិន័យ៧ម៉ឺនរៀល , បើករថយន្តនិយាយទូរស័ព្ទពិន័យ ១២ម៉ឺនរៀល , ចតរថយន្តលើគំនូសហាមឃាត់លើផ្លូវពិន័យ ៧៥០០០រៀល ។ សរុបមកអ្នកបើកបរម៉ូតូ និងរថយន្តល្មើសច្បាប់ចរាចរណ៍បច្ចុប្បន្ននេះនៅក្នុងខេត្តកំពង់ឆ្នាំងមានប្រមាណ ៥ % ។

គណៈបញ្ជាការឯកភាពរដ្ឋបាលខេត្តកំពង់ឆ្នាំង គណៈបញ្ជាការឯកភាពរដ្ឋបាលក្រុងកំពង់ឆ្នាំង និងសមត្ថកិច្ចនគរបាលចរាចរណ៍ សូមអំពាវនាវដល់ប្រជាពលរដ្ឋជាអ្នកបើកបរយានយន្តគ្រប់ប្រភេទ សូមចូលរួមគោរពច្បាប់ចរាចរណ៍ដូចជា ពាក់មួកសុវត្ថិភាព បើករថយន្តពាក់ខ្សែក្រវ៉ាត់ កុំនិយាយទូរសព្ទ័ក្នុងពេលបើកបរ ត្រូវគោរពគំនូសសញ្ញា និងផ្លាកសញ្ញាចរាចរណ៍នៅលើដងផ្លូវឲ្យបានទាំងអស់គ្នា ដើម្បីរួមគ្នាទប់ស្កាត់និងកាត់បន្ថយគ្រោះថ្នាក់ចរាចរណ៍នៅលើដងផ្លូវ ដែលធ្វើឱ្យប្រជាពលរដ្ឋយើងរបួសពិការ និងខូចខាតទ្រព្យសម្បត្តិនៅក្នុងក្រុមគ្រួសារផងដែរ៕

អត្ថបទ៖ ឈៀងថារិទ្ធ