អនុប្រធានព្រឹទ្ធសភាបញ្ជាក់ទៅកាន់ឯកអគ្គរដ្ឋទូតហ្វីលីពីនពីការអត់ធ្មត់របស់កម្ពុជាចំពោះទង្វើញុះញង់របស់ថៃ

អនុប្រធានព្រឹទ្ធសភាកម្ពុជា គូសបញ្ជាក់ពីស្ថានភាពវិវត្តចុងក្រោយនៃជម្លោះព្រំដែនកម្ពុជា និងថៃ ទៅកាន់ឯកអគ្គរដ្ឋទូតហ្វីលីពីន ខណៈដែលបញ្ហាជម្លោះនេះមានភាពតានតឹង ដោយថៃព្យាយាមបង្កហេតុតាមខ្សែបន្ទាត់ព្រំដែនជាបន្តបន្ទាប់​។ ប៉ុន្តែនៅចំពោះមុខសកម្មភាពញុះញង់របស់ថៃ ដែលកំពុងធ្វើពេលនេះ លោក ថា កម្ពុជាតែងតែប្រកាន់ជំហរអត់ធ្មត់ និងគោរពនូវបទឈប់បាញ់។  

ជំនួបដែលធ្វើឡើងនាវិមានព្រឹទ្ធសភារាជធានីភ្នំពេញ នៅថ្ងៃទី១០ ខែតុលា ឆ្នាំ២០២៥នេះ លោកបណ្ឌិត ធន់ វឌ្ឍនា អនុប្រធានទី២ព្រឹទ្ធសភា និងលោកស្រី Flerida Ann Camille P.Mayo ឯកអគ្គរដ្ឋទូតហ្វីលីពីនប្រចាំនៅកម្ពុជា បានផ្លាស់ប្តូរយោបល់ពីបញ្ហាអន្តរជាតិ និងតំបន់ ជាពិសេសគឺបញ្ហាជម្លោះព្រំដែនកម្ពុជា និងថៃ បើទោះបីមានបទឈប់បាញ់ក៏ដោយ ក៏ស្ថានភាពតាមតំបន់ព្រំដែននៅតែមានភាពផុយស្រួយ។

ជាក់ស្ដែង នៅថ្ងៃនេះតែម្ដង គឺកងកម្លាំងចម្រុះរបស់ថៃ បានបន្តសកម្មភាពឈ្លានពានទៅលើទឹកដីកម្ពុជាទាំងខុសច្បាប់ ក្រោមរូបភាពប្រើប្រាស់គ្រឿងចក្រ ឈូសឆាយបំពានដែនអធិបតេយ្យភាពកម្ពុជា នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដោយគ្មានខ្លាចច្បាប់អន្តរជាតិឡើយ។

ប៉ុន្តែយ៉ាងណា លោកបណ្ឌិត ធន់ វឌ្ឍនា បានបញ្ជាក់ថា កម្ពុជានឹងអត់ធ្មត់ដល់ទីបំផុតចំពោះការញុះញង់ពីសំណាក់ភាគីថៃ ដែលប៉ុនប៉ងចង់បង្កហេតុឱ្យជម្លោះផ្ទុះឡើងជាថ្មីនោះ។

លោកអនុប្រធានព្រឹទ្ធសភា បានបញ្ជាក់ជាថ្មីនូវគោលជំហររបស់កម្ពុជាចំពោះកិច្ចខិតខំប្រឹងប្រែង ដើម្បីបន្ធូរបន្ថយភាពតានតឹង តាមរយៈការព្យាយាមដោះស្រាយបញ្ហាតាមការចរចា ផ្អែកទៅលើច្បាប់ និងកិច្ចព្រមព្រៀង ដើម្បីសន្តិភាព និងការវិលត្រឡប់ទៅរកប្រក្រតីភាពក្នុងពេលឆាប់ខាងមុខនេះ រួមទាំងការដោះលែងត្រឡប់មកវិញនូវទាហានកម្ពុជា ១៨រូប ដែលកងទ័ពថៃចាប់ធ្វើជាចំណាប់ខ្មាំង ក្រោយបទឈប់បាញ់ចូលជាធរមាន៕