កីឡា

ឡុង ប៉េងលឿន ការស្រឡាញ់គាំទ្រពីខ្មែរនៅបារាំងធ្វើឲ្យខ្លួនមានភាពកក់ក្ដៅរឹតតែមានកម្លាំងចិត្តប្រកួត

បានផុស

៧ ខែ មុន

នៅ

ថ្ងៃចន្ទ ១០ វិច្ឆិកា ២០២៥

ដោយ

អ្នកលេងគុនខ្មែរ ឡុង ប៉េងលឿន ថាខ្លួនពិតជាមានភាពកក់ក្ដៅខ្លាំងណាស់សម្រាប់ការប្រកួតនៅឯប្រទេសបារាំងនេះ ព្រោះមានខ្មែរដែលរស់នៅទីនោះបានផ្ដល់ក្ដីស្រឡាញ់ គាំទ្រច្រើន នាំដើរញុំអាហារ ធ្វើឲ្យខ្លួនរឹតតែមានកម្លាំងចិត្តរហូតយកឈ្នះដៃគូបែបនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឡុង ប៉េងលឿន និងគ្រូក្មេង

កីឡាករ ឡុង ប៉េងលឿន បានឲ្យដឹងថា សម្រាប់ការប្រកួតនៅឯប្រទេសបារាំងនេះគឺពិតជាមានភាពកក់ក្ដៅខ្លាំងដោយបានការទទួលស្វាគមន៍ពីខ្មែររស់នៅទីនោះច្រើនមានទាំងការមកលេងផ្ទាល់ មានជូនទៅញុំអាហារ និងការមកចូលរួមទស្សនាផ្ទាល់នៅសង្វៀនទៀតផង។

កីឡាករគុនខ្មែរទាំង៣នាក់

អ្នកលេងគុនខ្មែររូបនេះបន្តទៀតថា មានអ្នកស្រឡាញ់គាំទ្រមួយចំនួនត្រូវជិះឡាន ៨-១០ម៉ោងដើម្បីមកលើកទឹកចិត្តកីឡាករខ្មែរដល់សង្វៀននេះ។ សន្ទុះអ្នកគាំទ្រនៅទីនោះគឺមានច្រើនមែនទែនរហូតធ្វើឲ្យប្ដេជ្ញាចិត្តមុនប្រកួតត្រូវតែឈ្នះ និងប្រកួតឲ្យបានល្អបំផុតជូនអ្នកគាំទ្រដែលមកទស្សនា។

កីឡាករ និងអ្នកគាំទ្រ

ប៉េងលឿន បន្តទៀតថា មិនមានអ្វីក្រៅតែពីម្រាមដៃដប់ប៉ុណ្ណោះថ្លែងអំណរគុណដល់អ្នកគាំទ្រទាំងអស់ពិសេសចំពោះការចំណាយពេលវេលាដ៏មានតម្លៃចូលរួមលើកទឹកចិត្តខ្លួន និងកីឡាករគុនខ្មែរផ្សេងៗទៀតដែលប្រកួតនៅលើទឹកដីបារាំងនេះ។ ក្រៅពីនេះរូបគេអរគុណចំពោះសហព័ន្ធគុនខ្មែរ គ្រុឌ ដែលបានឧបត្ថម្ភថវិកាលើកទឹកចិត្តចំនួនម្នាក់ៗ ៣លានរៀលនៅពេលនេះ។

ថវិកាឧបត្ថម្ភ

បញ្ជាក់ដែរថា ក្រុមគុនខ្មែរទាំង ៣នាក់ដែលប្រកួតនៅឯប្រទេសបារាំងកាលពីថ្ងៃទី៩ ខែវិច្ឆិកា ឆ្នាំ២០២៥ នេះគឺទទួលបានជ័យជម្នះទាំង ៣នាក់តែម្ដង។ ឡុង ប៉េងលឿន ឈ្នះដោយដៃគូបោះបង់ការប្រកួត ចំណែកកីឡាករ ធីម សៀងហៃ ហៅគ្រូក្មេងយកឈ្នះដៃគូដោយពិន្ទុ និង ធន់ ស៊ីហាវ យកឈ្នះដៃគូដោយពិន្ទុ៕

អត្ថបទដោយ៖ នូន ស៊ីណា

Related Topics:កីឡាប្រដាល់គុនខ្មែរ