កីឡា

ថ្នាក់ដឹកនាំ Esports សរសើរក្រុមកីឡាករ កីឡារិនីកម្ពុជាលេចធ្លោលើឆាកអន្តរជាតិ

បានផុស

៥ ខែ មុន

នៅ

ថ្ងៃអង្គារ ៩ ធ្នូ ២០២៥

ដោយ

ក្រុមកីឡាករ និងក្រុមកីឡាការិនីអេឡិចត្រូនិកជម្រើសជាតិកម្ពុជា បានលេចធ្លោលើឆាកអន្តរជាតិសម្រាប់ការប្រកួតជើងឯកពិភពលោក IESF World Esports Championship លើប្រភេទកីឡា Mobile Legend Bang Bang ចាប់ពីថ្ងៃទី៣ ដល់ទី៨ ខែធ្នូ ឆ្នាំ២០២៥ នៅប្រទេសម៉ាឡេស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមនារីកម្ពុជាបានលេខ២ ក្នុងការប្រកួតជម្រុះតំបន់អាស៊ាន បន្ទាប់ពីបានឈ្នះឡាវ ព្រុយណេ និង ទីម័រខាងកើត ប៉ុន្តែបានចាញ់ ម៉ាឡេស៊ី ដើម្បីទទួលបានកៅអីឡើងជុំចុងក្រោយ។ នៅជុំចុងក្រោយ ក្រុមនារីកម្ពុជាទទួលបានលេខ១ក្នុងពូល C តាមរយៈជ័យជម្នះលើក្រុម ម៉ុងហ្គោលី និងកូឡុំប៉ី។

នៅវគ្គ៨ក្រុមចុងក្រោយ ក្រុមនារីកម្ពុជា បានចាញ់ឥណ្ឌូណេស៊ី ០-២ ហើយធ្លាក់ទៅវគ្គ Lower Bracket ដែលវគ្គនេះ បានយកឈ្នះម្ចាស់ផ្ទះម៉ាឡេស៊ី ២-០ ដើម្បីឡើងទៅវគ្គ ៣ ក្រុមចុងក្រោយ។ នៅវគ្គ ៣ ក្រុមចុងក្រោយ ក្រុមនារីកម្ពុជា បានឈ្នះ អេហ្ស៊ីប ២-០ ដើម្បីឡើងទៅវគ្គផ្តាច់ព្រ័ត្រ ជួបឥណ្ឌូណេស៊ី ជាថ្មី។ វគ្គដណ្តើមមេដាយមាស កម្ពុជា បានចាញ់ ឥណ្ឌូណេស៊ី ០-៣ ដើម្បីទទួលបានមេដាយប្រាក់។

ចំណែកក្រុមបុរសកម្ពុជាធ្វើបានល្អបំផុតជាលើកដំបូងក្នុងប្រវត្តិសាស្ត្ររបស់ខ្លួនដោយឈានដល់វគ្គផ្តាច់ព្រ័ត្រ ហើយទទួលបានមេដាយប្រាក់ពិភពលោក។ ឆ្លងកាត់ ៦ ប្រកួត ក្រុមបុរសកម្ពុជា ឈ្នះ ៥ និងចាញ់ ១ ក្នុងនោះបានឈ្នះ នេប៉ាល់ បេឡារុស្ស និង ដូមីនិក នៅវគ្គក្នុងពូល។ ពួកគេបានឈ្នះ កាហ្សាស្ថាន នៅវគ្គ ៨ ក្រុមចុងក្រោយ និងបន្តឈ្នះ តួកគី នៅវគ្គពាក់កណ្តាលផ្តាច់ព្រ័ត្រ ប៉ុន្តែបានចាញ់ម្ចាស់ផ្ទះម៉ាឡេស៊ី នៅវគ្គវគ្គផ្តាច់ព្រ័ត្រ ដើម្បីទទួលបានមេដាយប្រាក់ពិភពលោកជាលើកដំបូង។

តាមរយៈលទ្ធផលល្អប្រសើរទាំងបុរស និងនារីនេះ ត្រូវបានលោក លន់ សាមឌី អគ្គលេខាធិការសហព័ន្ធកីឡាអេឡិចត្រូនិកកម្ពុជា កោតសរសើរពីភាពរីកចម្រើនច្រើន បើប្រៀបធៀបនឹងការប្រកួតមុនៗ។

លោកបាននិយាយថា នេះសបញ្ជាក់ឲ្យឃើញពីភាពរីកចម្រើនរបស់កីឡាអេឡិចត្រូនិកកម្ពុជាលើឆាកអន្តរជាតិ។ ក្រុមនារីកម្ពុជា ថ្វីបើធ្លាប់ទទួលបានមេដាយប្រាក់ពិភពលោកកាលពីឆ្នាំ ២០២៤ ហើយឆ្នាំ២០២៥ ទទួលបានទៀត ប៉ុន្តែបើមើលពីស្ថិតិ និងថិរវេលាប្រកួតរបស់ពួកគាត់ល្អប្រសើរជាងមុន។ ក្រុមប្រទេសផ្សេងៗឲ្យតែជួបក្រុមនារីកម្ពុជាគឺចាត់ទុកជាដៃគូដ៏លំបាក។

លោកបានបន្តថា ចំពោះក្រុមបុរសកម្ពុជាវិញគឺធ្វើបានល្អបំផុតមិនធ្លាប់មានដោយឈានដល់វគ្គផ្តាច់ព្រ័ត្រជាលើកដំបូង។ សមត្ថភាព ស្មារតី និងបទពិសោធរបស់ពួកគាត់កាន់តែល្អប្រសើរ។ តាមរយៈលទ្ធផលទាំងនេះគឺក្រុមបុរសកម្ពុជាក៏កាន់តែល្អប្រសើរលើឆាកអន្តរជាតិ៕