អនុប្រធានព្រឹទ្ធសភាជំរុញឱ្យមានផលិតកម្មកែច្នៃអាហារ ក្នុងពេលកម្ពុជាប្រឈមមុខជម្លោះព្រំដែន

អនុប្រធានទី២ព្រឹទ្ធសភា លោក ធន់ វឌ្ឍនា បានបង្ហាញគំនិតផ្ដួចផ្ដើមដើម្បីជំរុញឱ្យមានផលិតកម្មកែច្នៃអាហារក្នុងស្រុកក្នុងពេលដែលប្រទេសកម្ពុជាកំពុងប្រឈមមុខនឹងបញ្ហាជម្លោះព្រំដែន ដោយលោក អំពាវនាវដល់សាកលវិទ្យាល័យក្នុងប្រទេសឱ្យស្វែងរកកិច្ចសហការពីដៃគូពាក់ព័ន្ធចាប់ដៃគ្នាកែច្នៃចំណីអាហារសម្រាប់ផ្គត់ផ្គង់កងទ័ព និងជនភៀសសឹក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអំពាវនាវបែបនេះ ធ្វើឡើងក្នុងឱកាសដែលលោកបណ្ឌិត ធន់ វឌ្ឍនា ធ្វើបាឋកថាស្ដីពីគោលនយោបាយ និងឱកាស ក្នុងវិស័យស្វាយចន្ទី ដល់សាស្រ្ដាចារ្យ និងនិស្សិត នៅឯសាកលវិទ្យាល័យជាតិគ្រប់គ្រង កាលពីនារសៀលថ្ងៃទី២៤ ខែធ្នូ ឆ្នាំ២០២៥។

លោកអំពាវនាវនេះ គឺជាការប្រែក្លាយកាលានុវត្តភាពក្នុងកាលៈទេសៈកម្ពុជាកំពុងប្រឈមសង្គ្រាមឈ្លានពានពីប្រទេសថៃនៅតាមបណ្ដោយព្រំដែន ទៅជាឱកាសពង្រឹងផលិតកម្មក្នុងស្រុក។

វិបត្តិព្រំដែនកម្ពុជា-ថៃ លោក ធន់ វឌ្ឍនា មើលឃើញថា មានទាំងហានិភ័យ និងឱកាសសេដ្ឋកិច្ច ដោយក្នុងនោះ លោកបានលើកឡើងពីភាពធន់ និងសាមគ្គីភាពរបស់ប្រជាជនកម្ពុជា តាមរយៈកំណើនតម្រូវការផលិតផលក្នុងស្រុក និងសកម្មភាពសហគ្រាសធុនតូច និងធម្យម (SME) ក្នុងវិស័យអាហារ។

តែយ៉ាងនេះក្ដី លោកអនុប្រធានព្រឹទ្ធសភារូបនេះ បានលើកឡើងពីភាពចាំបាច់ចំពោះស្ថានភាពបច្ចុប្បន្ន គឺការធានាឱ្យមានបទឈប់បាញ់ជាបន្ទាន់ ព្រមជាមួយនឹងការកសាងឡើងវិញនូវទំនាក់ទំនងការទូត ដើម្បីស្តារសេដ្ឋកិច្ចព្រំដែន និងទំនុកចិត្តវិនិយោគិន៕

ដោយ៖ ធឿន វ៉ាន់សុង