លោក ហ្សង់ហ្វ្រង់ស័រ តាន់ «អ្នកខ្លាំងផ្នែកយោធា មិនមែនចេះតែឈ្នះរហូតទេ»

«អ្នកខ្លាំងផ្នែកយោធា មិនមែនចេះតែឈ្នះរហូតទេ»។ នេះជាប្រយោគដែលលើកឡើងដោយមន្ត្រីជាន់ខ្ពស់រាជរដ្ឋាភិបាលកម្ពុជា លោក ហ្សង់ហ្វ្រង់ស័រ តាន់ ភ្ជាប់ទៅនឹងបញ្ហាជម្លោះព្រំដែនកម្ពុជា-ថៃ ដែលបានកើតឡើងបច្ចុប្បន្ន ដោយថៃបានប្រើប្រាស់កម្លាំងយោធាក្នុងការឈ្លានពានលើប្រទេសកម្ពុជា។ លោក ហ្សង់ហ្វ្រង់ស័រ តាន់ ថា បញ្ហាជម្លោះបែបនេះ ត្រូវបានកំណត់ដោយកត្តាច្រើន ពោលគឺមិនអាងតែលើអំណាចយោធានោះឡើយ។

លោកបាននិយាយក្នុងសន្និសីទសារព័ត៌មាននៅឯអាកាសយានដ្ឋានអន្តរជាតិតេជោ នាថ្ងៃទី៩​ ខែមេសា ឆ្នាំ២០២៦នេះ ថា ក្នុងជម្លោះបែបកម្ពុជា-ថៃ បានកើតឡើងច្រើននៅក្នុងពិភពលោក ប៉ុន្តែផ្អែកលើទិដ្ឋភាពប្រវត្តិសាស្ត្រពិភពលោកបានបង្ហាញថា ប្រទេសដែលមានអំណាចយោធាខ្លាំង មិនមែនឈ្នះជានិច្ចនោះទេ។

ក្នុងន័យនេះ លោក ហ្សង់ហ្វ្រង់ស័រ តាន់ បានលើកជាឧទាហរណ៍ក្នុងករណីទីម័រឡេស្តេជាមួយឥណ្ឌូណេស៊ី ក៏ដូចជាករណីប៉ាណាម៉ាជាមួយសហរដ្ឋអាមេរិក ជាដើម ដែលករណីទាំងពីរនេះ លោកថា បានស្ដែងឱ្យឃើញថា ពេលវេលា កាលៈទេសៈ ប្រវត្តិសាស្ត្រ ការប្រើច្បាប់អន្តរជាតិ និងការទូត ជាកត្តាកំណត់លទ្ធផលសម្រាប់ជម្លោះអន្តរជាតិ។

តាមការបញ្ជាក់របស់លោក ហ្សង់ហ្វ្រង់ស័រ តាន់ រដ្ឋមន្ត្រីប្រតិភូអមនាយករដ្ឋមន្ត្រី ក្នុងបញ្ហាជម្លោះព្រំដែនកម្ពុជា-ថៃ បានដើរមកដល់របត់មួយដែលទាមទារឱ្យកម្ពុជាត្រូវមានការប្រុងប្រយ័ត្នខ្ពស់ ដោយការគិតជ្រៅ គិតវែងឆ្ងាយ លម្អិត និងបែបយុទ្ធសាស្ត្រជាទីបំផុតក្នុងការសម្រេចចិត្ត។ លោក បានអះអាងថា កិច្ចការព្រំដែន គឺជារឿងអាទិភាពចម្បងបំផុតរបស់រាជរដ្ឋាភិបាលកម្ពុជា ជាពិសេសការទាមទារឱ្យបានមកវិញនូវទឹកដី ដែលថៃបានចូលកាន់កាប់ដោយខុសច្បាប់ តាមរយៈការប្រើកម្លាំងឈ្លានពានលើកម្ពុជា។

ឆ្លើយនឹងសំណួរថា តើត្រូវ ឬគួរទាមទារបែបណា? មន្ត្រីរូបនេះ ថា រាជរដ្ឋាភិបាលប្រើគ្រប់មធ្យោបាយទាំងអស់ដែលអាចធ្វើទៅបាន ជាមួយនឹងការគិតថ្លឹងថ្លែងគ្រប់ពេលវេលា និងបែបលម្អិតជាទីបំផុត ដើម្បីធានាថាបាននាំនូវការចំណេញជាងការខាតបង់សម្រាប់ផលប្រយោជន៍ប្រទេសជាតិ។ លោកសង្កត់ធ្ងន់ថា កម្ពុជានៅតែបន្តដើរលើមាគ៌ាពហុភាគីនិយម កិច្ចសន្ទនា និងការគោរពច្បាប់អន្តរជាតិ៕

ដោយ៖​ធឿន វ៉ាន់សុង