អតីតជំទាវទី១កូរ៉េ​ខាងត្បូង រង​ការ​ចោទប្រកាន់ជា​ផ្លូវការ​ពី​ករណីជ្រៀតជ្រែកកិច្ចការរដ្ឋ

រដ្ឋ​អាជ្ញាពិសេសរបស់កូរ៉េខាងត្បូង បានចោទប្រកាន់ជាផ្លូវការលើលោកស្រី Kim Keon-hee ដែលជាភរិយារបស់អតីតប្រធានាធិបតី Yoon Suk-yeol ថាបានប្រើប្រាស់ឥទ្ធិពលក្នុងកិច្ចការរដ្ឋ ដើម្បីជាថ្នូរនឹងការទទួលយកលុយកាក់ និងសម្ភារៈមានតម្លៃថ្លៃៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោង​តាម​ការ​ចុះ​ផ្សាយ​របស់​ Al Jazeera នា​ថ្ងៃចន្ទ​ទី​២៩​ធ្នូ​នេះ រដ្ឋអាជ្ញាពិសេសលោក Min Jung-ki បានបញ្ចប់ការស៊ើបអង្កេតរយៈពេលមួយឆ្នាំ ដោយបានរកឃើញថា អតីតជំទាវទី១រូបនេះ បានឆ្លៀតឱកាសពីតំណែងរបស់ខ្លួន ដើម្បីជ្រៀតជ្រែកក្នុងការតែងតាំងមន្ត្រី និងការសម្រេចចិត្តផ្សេងៗរបស់រដ្ឋាភិបាល។ ក្រុមរដ្ឋអាជ្ញាបានបញ្ជាក់ថា លោកស្រីបានទទួលសំណូកសរុបជាទឹកប្រាក់ប្រមាណ ៣៧៧.២៥លានវ៉ុន (ប្រហែល ២៦៣ ០០០​ដុល្លារ) ជាទម្រង់សាច់ប្រាក់ និងកាបូបម៉ាក Chanel, Dior, ខ្សែកពេជ្រ ព្រមទាំងរូបគំនូរថ្លៃៗពីមហាសេដ្ឋី និងអ្នកនយោបាយ។

បច្ចុប្បន្ន លោកស្រី Kim Keon-hee កំពុងស្ថិតក្រោមការឃុំខ្លួន ហើយរដ្ឋអាជ្ញាបានស្នើសុំឲ្យផ្ដន្ទាទោសដាក់ពន្ធនាគាររយៈពេល ១៥ឆ្នាំ។ លោកស្រីបានបដិសេធរាល់ការចោទប្រកាន់ទាំងនេះ ខណៈដែលមេធាវីរបស់លោកស្រីចាត់ទុកថា ការរកឃើញនេះគឺជាការបំផ្លើសការពិតដើម្បីផលប្រយោជន៍នយោបាយ។

ដោយឡែក អតីតប្រធានាធិបតី Yoon Suk-yeol ក៏កំពុងប្រឈមមុខនឹងការកាត់ទោសពីបទដឹកនាំការបះបោរ (ក្រោយការប្រកាសច្បាប់អាជ្ញាសឹក) ដែលអាចឈានដល់ការកាត់ទោសប្រហារជីវិត ឬជាប់គុកអស់មួយជីវិត។ សាលក្រមសម្រាប់លោកស្រី Kim ត្រូវបានរំពឹងថានឹងប្រកាសនៅថ្ងៃទី២៨ខែមករាខាងមុខ៕

ប្រែសម្រួល៖ ឈាង