អាល្លឺម៉ង់ ចំអក អាមេរិក ថា ត្រូវអ៊ីរ៉ង់ ធ្វើឲ្យអាម៉ាស់មុខ និង កំពុងផុងខ្លួនក្នុងសង្គ្រាម ដែលគ្មានគោលដៅ ច្បាស់លាស់

ជាការចំអកទៅទីក្រុងវ៉ាស៊ីនតោន, អធិការបតីអាល្លឺម៉ង់ បានរិះគន់សហរដ្ឋអាមេរិកថា កំពុងផុងខ្លួនក្នុងសង្គ្រាម ដែលគ្មានគោលដៅច្បាស់លាស់ ហើយកំពុងអាម៉ាស់មុខ ដោយសារអ៊ីរ៉ង់។ នេះបើតាមការផ្សាយរបស់ CNN នៅថ្ងៃអង្គារ ទី២៨ ខែមេសា ឆ្នាំ២០២៦។ 

ក្នុងដំណើរទស្សនកិច្ចទៅកាន់សាលារៀនមួយ នៅទីក្រុង Marsberg កណ្តាលប្រទេសអាល្លឺម៉ង់ លោក Friedrich Merz និយាយថា៖ តាមពិតអ៊ីរ៉ង់ក៏មានអ្នកជំនាញខាងចរចាដែរ ប៉ុន្តែពួកគេមិនទៅចរចានៅប៉ាគីស្ថាន ដោយឲ្យគណៈប្រតិភូអាមេរិក ទៅទីក្រុងអ៊ីស្លាម៉ាបាដ តែឯង ដោយចាកចេញមកវិញ ដោយគ្មានលទ្ធផលអ្វីទាំងអស់។ អ៊ីរ៉ង់ កំពុងធ្វើឲ្យអាមេរិក អាម៉ាស់មុខ។

ស្របពេលជាមួយគ្នានោះដែរ លោក Merz បានរិះគន់យុទ្ធសាស្រ្តរបស់អាមេរិក ដែលកំពុងធ្វើសង្គ្រាម ដោយគ្មានគោលដៅច្បាស់លាស់ ដូចកាលសង្គ្រាមអ៊ីរ៉ាក់និងអាហ្វហ្គានីស្ថានដែរ ពោលគឺទីក្រុងវ៉ាស៊ីនតោន ត្រូវជាប់ផុងលង់ខ្លួន មិនដឹងត្រូវដកថយវិញ ដោយរបៀបណា។

លោក Merz ប្រាប់ទៅសិស្សានុសិស្សថា៖ «រឿងរ៉ាវទាំងមូល គឺខ្វះការពិចារណាឲ្យបានល្អិតល្អន់។ មកទល់ពេលនេះ ខ្ញុំមិនទាន់ឃើញថា តើអាមេរិក កំពុងជ្រើសរើស យុទ្ធសាស្ត្រដកថយបែបណា នោះទេ»។

នេះមិនមែនទើបលើកដំបូងឡើយ ដែលទីក្រុងបែរឡាំង ​​ប្រើវោហារស័ព្ទ វាយប្រហារសហរដ្ឋអាមេរិក ជុំវិញសង្គ្រាមមជ្ឈិមបូព៌ា។ ជាក់ស្តែង កាលពីខែមុន លោក Merz ក៏​ប្រកាស​​ជា​សាធារណៈដែរ​ថា​ អាល្លឺម៉ង់​នឹង​មិន​ចូលរួម​​​ ក្នុងសង្គ្រាម​នៅអ៊ីរ៉ង់​ដាច់ខាត ព្រោះតែ​​​សង្គ្រាម​​នេះ ​គ្មាន​មូលដ្ឋាន​ច្បាប់​។

ថ្លែងក្នុងសន្និសីទ​សារ​​ព័ត៌មាន​ នៅទីក្រុងបែរឡាំង ​អធិការ​បតី​​​​អាល្លឺម៉ង់ ​​និយាយថា​៖ ​​​«យើង​ខ្វះ​​​​ការ​អនុម័ត​​​ពី​អង្គការ​សហប្រជាជាតិ​ សហភាពអឺរ៉ុប​ឬ​ក៏​ អង្គការ​ណាតូ​​ ដែលទាមទារ​​​ស្ថិតនៅ​ក្រោម​ច្បាប់​​​ជាមូលដ្ឋាន»។ ​​​

​​​មិនត្រឹមប៉ុណ្ណឹង ប្រ​មុខ​ដឹកនាំ​រដ្ឋាភិបាល​អាល្លឺម៉ង់​​ ​និយាយថា ​​​​អំពើ​ប្រទូស​រ៉ាស​​​ដែល​​​​​កំពុង​កើន​ឡើង​ ​នឹង​បង្ក​​​​ហានិភ័យ​​កាន់តែ​​ធំចំពោះ​តំបន់ ដែល​រហូត​មក​ដល់​ពេល​នេះ​៕

អត្ថបទ៖ សុខ សុវណ្ណ