អ៊ុយក្រែនបោករុស្ស៊ីយកប្រាក់រង្វាន់៥០ម៉ឺន​ដុល្លារ ដោយ​ក្លែង​ការ​ស្លាប់​របស់​មេបញ្ជាការម្នាក់

ទីភ្នាក់ងារចារកម្ម​យោធាអ៊ុយក្រែន (GUR) បានប្រកាស​ថា ខ្លួនបានរៀបចំឈុតឆាកធ្វើពុតជាមេបញ្ជាការប្រឆាំងវិមានក្រឹមឡាំងដ៏លេចធ្លោម្នាក់បានស្លាប់ ដើម្បីបង្ក្រាបផែនការធ្វើឃាតរបស់រុស្ស៊ី និងបញ្ឆោតយកប្រាក់រង្វាន់ចំនួន ៥០០ ០០០​ដុល្លារ។

យោង​តាម​ការ​ចុះ​ផ្សាយ​របស់​ Kyiv Post ​កាល​ពី​ថ្ងៃ​ទី​២​ខែមករា​ឆ្នាំ​២០២៦​ លោក Denis Kapustin មេដឹកនាំកងពលស្ម័គ្រចិត្តរុស្ស៊ី (RVC) បានបង្ហាញខ្លួននៅក្នុងវីដេអូជាមួយប្រធាន GUR លោក Kyrylo Budanov ដែលបាននិយាយលេងសើចអំពី «ការរស់ឡើងវិញ» របស់មេបញ្ជាការរូបនេះ។ RVC គឺជាក្រុមកងជីវពលរុស្ស៊ីដែលប្រឆាំងនឹងវិមានក្រឹមឡាំង និងគាំទ្រអ៊ុយក្រែន ដែលមានទំនាក់ទំនងជាមួយកងពលអន្តរជាតិក្រោមការគ្រប់គ្រងរបស់ GUR។

យោងតាម GUR ប្រតិបត្តិការរយៈពេលមួយខែនេះត្រូវបានរៀបចំឡើងដើម្បីការពារលោក Kapustin និងដើម្បីវែកមុខបណ្តាញចារកម្មរបស់រុស្ស៊ី។ កាលពីថ្ងៃទី២៧ខែធ្នូឆ្នាំ២០២៥ ក្រុម RVC បានរាយការណ៍ជាផ្លូវការថា លោក Kapustin ត្រូវបានសម្លាប់ក្នុងសមរភូមិដោយការវាយប្រហារ​ពី​ដ្រូនរបស់រុស្ស៊ី នៅក្នុងតំបន់ Zaporizhzhia។ ដើម្បីធ្វើឲ្យការបោកបញ្ឆោតនេះកាន់តែគួរឲ្យជឿជាក់ ភ្នាក់ងារសម្ងាត់អ៊ុយក្រែនបានបញ្ចេញវីដេអូក្លែងក្លាយដែលបង្ហាញពីដ្រូនវាយប្រហារលើរថយន្តខ្នាតតូចមួយ ដែលគេសន្មតថាមានលោក Kapustin នៅក្នុងនោះ រួមជាមួយរូបភាពរថយន្តដែលកំពុងឆាបឆេះយ៉ាងសន្ធោសន្ធៅ។

មន្ត្រី GUR បានអះអាងថា ភ្នាក់ងារសម្ងាត់រុស្ស៊ីបានជឿលើភស្តុតាងទាំងនេះ ហើយបានបើកប្រាក់រង្វាន់តាម «កិច្ចសន្យា» ចំនួនកន្លះលានដុល្លារ ឲ្យទៅបុគ្គលដែលតាមពិតគឺជាភ្នាក់ងារបង្កប់របស់អ៊ុយក្រែន។ ទីភ្នាក់ងារនេះបានបញ្ជាក់ថា ប្រាក់ដែលបញ្ឆោតបានមកនេះ នឹងត្រូវប្រើប្រាស់ដើម្បីពង្រឹងសមត្ថភាពដ្រូន និងប្រតិបត្តិការកងកម្លាំងពិសេសរបស់អ៊ុយក្រែន។

លោក Kapustin ដែលជាគោលដៅសំខាន់របស់ទីក្រុងមូស្គូ ដោយសារតួនាទីរបស់លោកក្នុងការដឹកនាំការឆ្មក់ចូលតាមព្រំដែនក្នុងតំបន់ Belgorod និង Kursk របស់រុស្ស៊ី បានបញ្ជាក់ថា លោកត្រៀមខ្លួនរួចជាស្រេចដើម្បីបន្ត​ប្រតិបត្តិការ​ឡើងវិញ។ រហូតមកដល់ពេលនេះ អាជ្ញាធររុស្ស៊ីមិនទាន់មានការឆ្លើយតបណាមួយចំពោះការអះអាងរបស់អ៊ុយក្រែននេះនៅឡើយទេ៕

ប្រែសម្រួល៖ ឈាង