ប្រធាន​សភា​លើក​ទឹកចិត្ត​បង្កើន​ការ​ផលិត​ផលិតផល​ក្នុង​ស្រុក​ជំនួស​ការ​នាំ​ចូល

ប្រធាន​រដ្ឋសភា​ សម្ដេច​សភា​ធិបតី ឃួន សុដារី បាន​លើក​ទឹកចិត្ត​ដល់​អ្នក​វិនិយោគ​ក្នុង​ស្រុក​ទាំង​អស់បន្តខិតខំប្រែក្លាយឱកាសឈឺចាប់ដែលកម្ពុជាកំពុងជួបប្រទះនេះ ក្លាយជាកាលានុវត្តន៍ថ្មី ក្នុងការពង្រឹងឃឿនសេដ្ឋកិច្ចជាតិ ដោយរិៈរកគ្រប់មធ្យោបាយនៅក្នុងការពង្រីកខ្សែច្រវ៉ាកផលិតកម្ម ផលិតជាសម្ភារៈ និងគ្រឿងឧបភោគបរិភោគនានាឱ្យបានកាន់តែច្រើន ដើម្បីផ្គត់ផ្គង់ក្នុងស្រុកជំនួសការនាំចូល។

លើក​ឡើង​នៅ​វិមាន​រដ្ឋសភា កាលពី​ថ្ងៃទី​២ ខែ​មករា ក្នុង​ពេល​ទទួល​អំណោយពីលោកស្រីឧកញ៉ា សុខ សុភាព អគ្គនាយិកាក្រុមហ៊ុនឆាមពាន និងស្វាមី សម្រាប់ចែកជូនដល់វីរកងទ័ពនិងជនភៀសសឹក សម្ដេច​សភាធិបតី ឃួន សុដារី មាន​ប្រសាសន៍​ថា ការផលិតបាននូវផលិតផលដែលជាតម្រូវការរបស់ប្រជាពលរដ្ឋមិនត្រឹមជួយឱ្យសេដ្ឋកិច្ចជាតិ សេដ្ឋកិច្ចគ្រួសារ និងសង្គមជាតិចម្រើនប៉ុណ្ណោះទេ ថែមទំាងធ្វើឲ្យកម្ពុជាមានឯករាជ្យ និងម្ចាស់ការលើគ្រប់វិស័យ។

សម្តេចបានសង្កត់ធ្ងន់ថា៖ «សូមយើងទំាងអស់គ្នាសូមប្តូរភាពឈឺចាប់របស់យើងនាពេលនេះ ទៅជាភាពរឹងមាំនិងធន់របស់ជាតិយើង»។

អំណោយសប្បុរសដែលលោកស្រីឧកញ៉ា សុខ សុភាព ប្រគល់ជូនសម្តេចប្រធានរដ្ឋសភានាឱកាសនេះ មានថវិកាចំនួន ១០ លានរៀល អង្ករ១តោន ភេសជ្ជ ៥០០កេស។

សម្ដេច​បាន​ចាត់​ទុក​សកម្មភាព​មនុស្ស​ធម៌​របស់​ធុរជន​ក្នុង​ស្រុក​នៅ​ពេល​នេះ​គឺ​ជា​មហាសាមគ្គីគ្រួសារខ្មែរ បានរួមគ្នាជាធ្លុងមួយបានផុសឡើងយ៉ាងរឹងមាំ និងខ្លាំងក្លាជាទីបំផុត ដោយមិនប្រកាន់និន្នាការនយោបាយ ទាំងក្នុង និងក្រៅប្រទេស បានឈរយ៉ាងស្វាហាប់ពីក្រោយរាជរដ្ឋាភិបាល និងវីរយុទ្ធជនរបស់យើង។ សកម្មភាពមនុស្សធម៌មហាគ្រួសារខ្មែរនាពេលនេះ ជាការឆ្លើយតបចំពោះគុណបំបាច់ដ៏ធំធេងរបស់វីរយុទ្ធជននៅក្នុងកិច្ចការពារអធិបតេយ្យ និងបូរណភាពទឹកដី យ៉ាងអង់អាចក្លាហាននៅតាមសមរភូមិជួរមុខ។

ចំពោះអំណោយសប្បុរសធម៌ ដែលរដ្ឋសភាទទួលបាន តាមរយៈ សម្តេចប្រធានរដ្ឋសភា បានធ្វើការបែងចែកជូនដល់រដ្ឋបាលខេត្តជាប់ព្រំដែនកម្ពុជា-ថៃ មានដូចជាខេត្តព្រះវិហារ ខេត្តឧត្តរមានជ័យ ខេត្តបន្ទាយមានជ័យ ខេត្តបាត់ដំបង ខេត្តពោធិ៍សាត់ ខេត្តកោះកុង សម្រាប់ធ្វើការបែងចែកបន្តជូនវីរកងទ័ពនិងពលរដ្ឋភៀសសឹក។ ក្រៅពីនេះថវិកានិងសម្ភារៈមួយចំនួនទៀត សម្រាប់ចែកជូនវីរយុទ្ធជនដែលសម្រាកព្យាបាលនៅតាមមន្ទីរពេទ្យ និងសម្រាប់ជូនក្រុមគ្រួសារវីរយុទ្ធជន ដែលបានពលីជីវិតជាដើម។

រដ្ឋសភានៅតែបន្តទទួលអំណោយសម្បុរធម៌ហើយធ្វើការបែងចែកអំណោយទាំងអស់នោះតាមគោលដៅតម្រូវការ ធ្វើយ៉ាងណាផ្តល់ភាពកក់ក្តៅ និងផ្សារភ្ជាប់ជានិច្ចរវាងយុទ្ធជនជួរមុខនិងពលរដ្ឋជួរក្រោយ។ សម្តេចប្រធានរដ្ឋសភា បានថ្លែងអំណរគុណជូនដល់ប្រជាពលរដ្ឋទំាងអស់ដែលមានការជឿជាក់លើថ្នាក់ដឹកនាំកម្ពុជាទាំងអស់ ក្នុងការដោះស្រាយបញ្ហាព្រំដែនជាមួយប្រទេសជិតខាងដោយសន្តិវិធី ប្រើប្រាស់យន្តការអន្តរជាតិនិងយន្តការទ្វេភាគី ខិតខំការពារ អធិបតេយ្យ និងបូរណភាពទឹកដី៕

អត្ថបទដោយ ហ៊ុន សិរីវឌ្ឍន៍