ក្រុមគ្រូពេទ្យស្ម័គចិត្តឯកឧត្តម ហ៊ុន ម៉ានី ចុះពិនិត្យ​ព្យាបាល និងចែកឱសថដល់​ជនភៀសសឹកក្នុងវត្តពង្រ

កាលពី​ល្ងាច ថ្ងៃទី ៤ ខែ មករា ឆ្នាំ ២០២៦ លោក វេជ្ជបណ្ឌិត  វ៉េង ហេង អនុប្រធានក្រុមប្រឹក្សាភិបាលសម្ពន្ធ័គ្រូពេទ្យសហភាព​សហពន្ធ័យុវជនកម្ពុជា បានដឹកនាំក្រុមការងារគ្រូពេទ្យស្ម័គចិត្តវេជ្ជបណ្ឌិត ក្រុមគ្រូពេទ្យចំនួន ៩៥ រូប របស់ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីមុខងារសាធារណៈ ចុះមកពិនិត្យព្យាបាលជំងឺនិងចែកជូនឱសថ​ជូន​ជន​ភៀស​​សឹកស្នាក់បណ្តោះអាសន្នក្នុងវត្តពង្រ​ក្នុង​សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ។

លោកវេជ្ជបណ្ឌិត  វ៉េង ហេង បានប្រាប់អ្នកយកព័ត៌មានឲ្យដឹងថា ក្រុមការងារគ្រូពេទ្យស្ម័គចិត្តរបស់ឯកឧត្តម ហ៊ុន ម៉ានី ដែល​ចុះមកពិនិត្យព្យាបាលជំងឺ និងចែកជូនឱសថដល់ជនភៀសសឹក​​ប្រមាណ​ជិត ១ ០០០នាក់ ក្នុងនោះមានពិនិត្យជំងឺទូទៅ រោគស្ត្រី អេកូសាស្ត្រ មាត់ ធ្មេញ វះកាត់ រោគសន្លាក់ សើរស្បែក កាមរោគ ត្រចៀក ច្រមុះ បំពង់ក កុមារ ផ្លូវចិត្ត មនុស្សចាស់ ជម្ងឺទូទៅ ជាដើម និងចែកជូនឱសថទៅតាមអ្នកជំងឺដែលឈឺបានពិនិត្យរួចផងដែ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក វេជ្ជបណ្ឌិត  វ៉េង ហេង បានមានប្រសាសន៍ឲ្យដឹងបន្តទៀតថា ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈតែងតែគិតគូរយកចិត្តទុកដាក់ជាមួយប្រជាពលរដ្ឋគ្រប់ទីកន្លែង និងគ្រប់ពេលវេលា និងបានថ្លែងអំណរគុណដល់អាជ្ញាធរគ្រប់លំដាប់ថ្នាក់នៃក្រុងសិរីសោភ័ណ ដែលបានសម្របសម្រួលជូនប្រជាពលរដ្ឋ ជា​ជន​ភា​សឹក​មកស្នាក់នៅវត្តពង្រ បានមកពិនិត្យនិងព្យាបាលជំងឺទូទៅនិងផ្ដល់ឱសថពិនិត្យ ពិគ្រោះ និងព្យាបាលជំងឺដោយឥតគិតថ្លៃនេះ។

លោក ស្រេង សុផល អភិបាលក្រុងសិរីសោភ័ណបានប្រាប់​អ្នក​យក​​ព័ត៍មានឲ្យដឹងថា ការឈ្លានពានរបស់យោធា​ថៃ​មក​លើ​អធិបតេយ្យភាពកម្ពុជា បានបង្កវិនាសកម្មការខូចខាតយ៉ាងធ្ងន់ធ្ងរដល់ផ្ទះសំបែង សាលារៀន វត្តអារាម និងហេដ្ឋារចនា​សម្ព័ន្ធសាធារណៈ ដែលតម្រូវឲ្យមានការជម្លៀសប្រជាពលរដ្ឋមកកាន់តំបន់សុវត្ថិភាព។

លោកបានដាស់តឿនដល់បងប្អូនជនភៀសសឹកទាំងអស់មកស្នាក់នៅវត្តពង្រ ត្រូវថែរក្សាសុខភាពឲ្យបានល្អក្នុងអំឡុងពេលស្នាក់នៅបណ្ដោះអាសន្ន កុំមានការភិតភ័យ និងត្រូវមានទំនុកចិត្តលើការដឹកនាំរបស់រាជរដ្ឋាភិបាល និងសូមជឿជាក់លើកងទ័ពដ៏អង់អាចក្លាហានរបស់យើង ក្នុងការការពារបូរណភាពទឹកដី។

លោក ស្រេង សុផល បានមានប្រសាសន៍ឲ្យដឹងបន្តទៀតថា ការ​មកស្នាក់នៅក្នុងវត្តពង្រ​របស់​ជនភៀសសឹក​ទាំងអស់ ត្រូវ​បាន​មន្ត្រីអាជ្ញាធរមូលដ្ឋាន និងព្រះចៅអធិការវត្តពង្រ បានយកចិត្តទុកដាក់ជួយផ្គត់ផ្គង់ មានទីកន្លែងជម្រក ទឹក ភ្លើងបាយ​ទឹក បានសមរម្យ ក្នុងនោះក៏មានមន្ត្រីពេទ្យប្រចាំការ ២៤ ម៉ោងលើ ២៤ ម៉ោងរង់ចាំពិនិត្យនិងព្យាបាលជំងឺទៀត​ផង​៕

អត្ថបទ៖ វ៉ាន់ ណាង