មន្ត្រីជាន់ខ្ពស់ ACU ថា ឯកសារប្រកាសទ្រព្យសម្បត្តិ និងបំណុល ត្រូវបានរក្សាទុកជាសម្ងាត់បំផុត

ឧបការីអង្គភាពប្រឆាំងអំពើពុករលួយ ទទួលបន្ទុកការងារសវនកម្ម និងការងារប្រកាសទ្រព្យសម្បត្តិ និងបំណុល លោក ខូយ លឹមហុង អះអាងថា ឯកសារប្រកាសទ្រព្យសម្បត្តិ និងបំណុល ត្រូវបានអង្គភាពប្រឆាំងអំពើពុករលួយរក្សាទុកជាសម្ងាត់បំផុត។

ដោយយោងមាត្រា២០ នៃច្បាប់ស្តីពីការប្រឆាំងអំពើពុករលួយ លោក ខូយ លឹមហុង បានឱ្យដឹងថា សំណុំឯកសារផ្ទាល់ខ្លួនម្នាក់ៗនៃអ្នកប្រកាសទ្រព្យសម្បត្តិ និងបំណុល ត្រូវបានរក្សាទុកសម្ងាត់បំផុត និងធ្វើជាទម្រង់អេឡិចត្រូនិកដោយមានលេខសម្ងាត់ ឬ ធ្វើជាលិខិតជាពីរច្បាប់តាមគំរូ ដែលកំណត់ដោយអង្គភាពប្រឆាំងអំពើពុករលួយ ហើយដាក់ក្នុងស្រោមសំបុត្រពីរដាច់ដោយឡែកពីគ្នា ដែលមួយច្បាប់រក្សាទុកដោយសាមីខ្លួន និងមួយច្បាប់ទៀត រក្សាទុកនៅអង្គភាពប្រឆាំងអំពើពុករលួយ។

លោក បានបន្តឱ្យដឹងថា លើមាត់ស្រោមសំបុត្រដែលបិទជិតត្រូវប្រថាប់ត្រា និងចុះហត្ថលេខាដោយប្រធានអង្គភាពប្រឆាំងអំពើពុករលួយ ឬតំណាងព្រមទាំងមានផ្តិតម្រាមដៃសាមីខ្លួនផង។

ការលើកឡើងរបស់មន្ត្រីជាន់ខ្ពស់ខាងលើ ធ្វើឡើងក្នុងពេលដែលអង្គភាពប្រឆាំងអំពើពុករលួយកំពុងរង់ចាំទទួលឯកសារប្រកាសទ្រព្យសម្បត្តិ និងបំណុល តាមរបប២ឆ្នាំ ក្នុងឆ្នាំ២០២៦។ ការទទួលឯកសារប្រកាសទ្រព្យសម្បត្តិ និងបំណុលនេះ គឺចាប់ពីថ្ងៃទី១ ដល់ថ្ងៃទី៣១ ខែមករា ឆ្នាំ២០២៦។

‎អង្គភាពប្រឆាំងអំពើពុករលួយ អំពាវនាវដល់អ្នកជាប់កាតព្វកិច្ចទាំងអស់ត្រូវអនុវត្តការដាក់ឯកសារប្រកាសទ្រព្យសម្បត្តិ និងបំណុល ឱ្យបានត្រឹមត្រូវ ពេញលេញ និងទាន់ពេលវេលា ដើម្បីរួមចំណែកក្នុងការបង្ការទប់ស្កាត់អំពើពុករលួយ៕