ព័ត៌មានជាតិ

តំបន់ទេសចរណ៍សំខាន់ៗចំនួន៤ ក្នុងខេត្តបាត់ដំបង ត្រៀមទាញកំណើនភ្ញៀវបរទេសក្នុងឆ្នាំ២០២៦

បានផុស

៦ ខែ មុន

នៅ

ថ្ងៃសៅរ៍ ១៧ មករា ២០២៦

ដោយ

មន្ទីរទេសចរណ៍ខេត្តបាត់ដំបង បានដាក់ផែនការរៀបចំគោលដៅទេសចរណ៍ដ៏មានសក្តានុពលចំនួន ៤ ដើម្បីទទួលកំណើនទេសចរបរទេសមកកម្សាន្តនៅក្នុងឆ្នាំ ២០២៦ ក្នុងចំណោមតំបន់គោលដៅទេសចរណ៍យ៉ាងសម្បូរបែបក្នុងខេត្តបាត់ដំបង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហម អរុណ មន្រ្តីមន្ទីរទេសចរណ៍ខេត្តបាត់ដំបងបានឲ្យដឹងថា ទីតាំងទេសចរណ៍ទាំង ៤ នេះ ត្រូវបានយកចិត្តទុកដាក់រៀបចំ និងពង្រឹងពីរដ្ឋបាលខេត្តរួមជាមួយអាជ្ញាធរមូលដ្ឋាន ក៏ដូចជាមន្ទីរពាក់ព័ន្ធក្នុងនោះលោក សុខ លូ អភិបាលនៃគណៈអភិបាលខេត្តបាត់ដំបង បានដឹកនាំកិច្ចប្រជុំជាមួយមន្ទីរអង្គភាពពាក់ព័ន្ធនិងអាជ្ញាធរមូលដ្ឋាន ក្នុងការគ្រប់គ្រងតំបន់ទេសចរណ៍សំខាន់ទាំង ៤ ក្នុងខេត្ត ដើម្បីត្រៀមទទួលភ្ញៀវបរទេសឲ្យកាន់តែមានកំណើនក្នុងឆ្នាំ២០២៦។

បើតាមលោក ហម អរុណ ទីតាំងទេសចរណ៍សំខាន់ៗទាំង ៤ នេះរួមមាន តំបន់ប្រាសាទភ្នំបាណន់ តំបន់ទេសចរណ៍អាងកំពីងពួយ តំបន់ទេសចរណ៍ប្រាសាទឯកភ្នំ និងរមណីយដ្ឋានប្រវត្តិសាស្ត្រភ្នំសំពៅ។

ការរៀបចំតំបន់ទេសចរជាគោលដៅនេះ គឺត្រូវបន្តពង្រឹងសណ្តាប់ធ្នាប់ របៀបរៀបរយ ការលក់ដូររបស់អាជីវករ ការរៀបចំចំណតរថយន្តតាមតំបន់ទេសចរណ៍នីមួយៗឲ្យបានកាន់តែល្អប្រសើរ ក្នុងន័យបង្កើនការទាក់ទាញភ្ញៀវទេសចរជាតិ និងអន្តរជាតិ មកទស្សនាកម្សាន្តកាន់តែច្រើនកុះករ លើកស្ទួយសេដ្ឋកិច្ច និងជីវភាពប្រជាពលរដ្ឋក្នុងខេត្តជាដើម៕

អត្ថបទ÷សៅ សារិទ្ធ