ច្រាំងទន្លេកំពង់ចាម បាក់ស្រុតយ៉ាងគំហុក ក្រោយ​ទឹកស្រកទៅវិញ

ដីច្រាំងទន្លេ និងសួនច្បារក្រាលការ៉ូឡាជាច្រើនម៉ែត្រ នៅសង្កាត់កំពង់ចាម ក្រុងកំពង់ចាម ត្រូវបានបាក់ស្រុតចូលក្នុងទឹកទន្លេបង្កការខូចខាត ក្រោយពីទឹកទន្លេបានស្រកចុះទៅវិញ។ តាមរដ្ឋបាលខេត្តកំពង់ចាម គិតត្រឹមម៉ោង ១២យប់ថ្ងៃទី៣០ ឈានចូលថ្ងៃទី៣១ ខែមករា ឆ្នាំ២០២៦នេះ ច្រាំងទន្លេកំពង់ចាម បានបន្តបាក់ស្រុត ប្រវែងប្រមាណ១០០ម៉ែត្រ ទទឹងប្រមាណ១០ម៉ែត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមរដ្ឋបាលខេត្តកំពង់ចាម កាលពីរសៀលថ្ងៃទី៣០​ ខែមករា បានឲ្យដឹងថា ទឹកទន្លេមេគង្គខេត្តកំពង់ចាមឆ្នាំនេះ បានហក់ឡើងលឿន និងស្រកចុះទៅវិញក៏លឿន បណ្តាលឱ្យច្រាំងទន្លេជាច្រើនរងការប្រេះស្រុតយ៉ាងដំណំ។

លោក អ៊ុន ចាន់ដា អភិបាលនៃគណៈអភិបាលខេត្តកំពង់ចាម នៅរសៀលថ្ងៃដដែលបានដឹកនាំមន្ទីរអង្គភាព អាជ្ញាធរមូលដ្ឋាន និងមន្រ្តីជំនាញពាក់ព័ន្ធចុះត្រួតពិនិត្យស្ថានភាពជាក់ស្តែង និងដាក់ចេញនូវវិធានការបន្ទាន់ ក្នុងការស្តារ និងបញ្ជៀសហានិភ័យ។ លោកអភិបាលខេត្ត ក៏បានណែនាំដល់អាជ្ញាធរសង្កាត់ ក្រុង ឲ្យរៀបចំដាក់ស្លាកសញ្ញាគ្រោះថ្នាក់ នៅកន្លែងដែលប្រេះស្រុត ដើម្បីជៀសវាងអ្នកធ្វើដំណើរដើរធ្លាក់នៅពេលយប់។

លោកអភិបាលខេត្ត ក៏បានណែនាំដល់ប្រធានមន្ទីរធនធានទឹក និងឧតុនិយម រៀបចំក្រុមការងារចុះសិក្សាស្ថានភាពជាក់ស្តែង ចំពោះករណីនេះ ដើម្បីធ្វើរបាយការណ៍ដាក់ទៅគណៈកម្មការគ្រប់គ្រងគ្រោះមហន្ដរាយថ្នាក់ខេត្ត និងក្រសួងពាក់ព័ន្ធ ដើម្បីជួសជុលកន្លែងប្រេះស្រុតនេះឡើងវិញ ហើយក៏ជាការការពារ កុំឲ្យបាក់ច្រាំងទន្លេកាន់តែខ្លាំង និងមាន​ហានិភ័យកាន់តែខ្ពស់។ បើតាមរដ្ឋបាលខេត្តកំពង់ចាម សួនច្បារនេះ បានចាប់ផ្តើមសាងសង់នៅក្នុងឆ្នាំ២០១២ ដោយចំណាយថវិការបស់រដ្ឋបាលខេត្តកំពង់ចាម៕

អត្ថបទ៖ សុខុម