ព័ត៌មានអន្ដរជាតិ

វៀតណាមគ្រោងចំណាយជាង ១២៣ ប៊ីលានដុល្លារ ដើម្បីអភិវឌ្ឍផ្លូវល្បឿនលឿនជិត ៩ ០០០ គីឡូម៉ែត្រ

បានផុស

៥ ខែ មុន

នៅ

ថ្ងៃព្រហស្បតិ៍ ៥ កុម្ភៈ ២០២៦

ដោយ

ប្រទេសវៀតណាមមានគម្រោងចំណាយប្រាក់ជាង ១២៣ ប៊ីលានដុល្លារអាមេរិក ដើម្បីពង្រីកបណ្តាញផ្លូវល្បឿនលឿនរបស់ខ្លួនឱ្យដល់ជិត ៩ ០០០ គីឡូម៉ែត្រ ក្នុងគោលដៅគិតត្រឹមឆ្នាំ ២០៥០ ក្រោមផែនការហេដ្ឋារចនាសម្ព័ន្ធរយៈពេលវែង ដែលក្រសួងសំណង់បានអនុម័តនៅសប្ដាហ៍នេះ។ នេះបើតាមការចុះផ្សាយរបស់ទីភ្នាក់ងារព័ត៌មាន VNS នៅថ្ងៃព្រហស្បតិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផែនការហេដ្ឋារចនាសម្ព័ន្ធវៀតណាម បានរៀបរាប់ពីរបៀបសាងសង់ផ្លូវថ្នល់ក្នុងរយៈពេល ៣ ទសវត្សរ៍ខាងមុខ ខណៈវៀតណាមកំពុងជំរុញការផ្លាស់ប្ដូរដើម្បីតាមឱ្យទាន់នឹងកំណើនចរាចរណ៍ ការអភិវឌ្ឍទីក្រុងកាន់តែលឿន និងតម្រូវការដឹកជញ្ជូនទំនិញកាន់តែច្រើនឡើង។

គិតត្រឹមឆ្នាំ ២០៥០ ផែនការបានកំណត់គោលដៅសាងសង់ប្រព័ន្ធផ្លូវល្បឿនលឿន ចំនួន ៤៣ ខ្សែ ក្នុងរយៈចម្ងាយសរុបប្រហែល ៨ ៩២០ គីឡូម៉ែត្រ។

ក្រសួងសំណង់បានប៉ាន់ប្រមាណថា កម្មវិធីផ្លូវថ្នល់នឹងត្រូវការដីជាង ២០០ ០០០ ហិកតា ហើយប្រភពមូលនិធិនឹងទទួលបានពីការលាយបញ្ចូលគ្នានៃការចំណាយរបស់រដ្ឋ មូលបត្ររដ្ឋាភិបាល ជំនួយអភិវឌ្ឍន៍ផ្លូវការ ការវិនិយោគឯកជន និងប្រភពផ្សេងៗទៀត។

គួរគូសបញ្ជាក់ថា វៀតណាមបានពន្លឿនការសាងសង់រួចហើយក្នុងរយៈពេលប៉ុន្មានឆ្នាំថ្មីៗនេះ។ គិតត្រឹមចុងឆ្នាំ ២០២៥ ប្រទេសនេះមានផ្លូវល្បឿនលឿនប្រវែង ៣ ៨០៣ គីឡូម៉ែត្រដែលកំពុងដំណើរការ រួមទាំងផ្លូវសំខាន់ៗ និងផ្លូវចូល ដោយលើសគោលដៅគ្រោងទុកត្រឹម ៣ ០០០ គីឡូម៉ែត្រ៕