ព័ត៌មានជាតិ

មន្ត្រីជំនាញក្រសួងធនធានទឹក ចុះពិនិត្យ ស្ដារ និងទប់ស្កាត់បណ្ដោះអាសន្ន ច្រាំងទន្លេបាក់ស្រុត នៅក្រុងកំពង់ចាម

បានផុស

៤ ខែ មុន

នៅ

ថ្ងៃអង្គារ ១០ កុម្ភៈ ២០២៦

ដោយ

រដ្ឋមន្ត្រីក្រសួងធនធានទឹក និងឧតុនិយម ដឹកនាំ មន្ត្រីជំនាញ និងអាជ្ញាធរខេត្តកំពង់ចាម ចុះពិនិត្យលក្ខណៈបច្ចេកទេសក្នុងការទប់ស្កាត់បណ្ដោះអាសន្ននៅតំបន់រងគ្រោះដោយបាក់ស្រុតច្រាំងទន្លេមេគង្គក្រុងកំពង់ចាម ដើម្បីធ្វើការសាងសង់សំណង់ច្រាំងទន្លេឡើងវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅព្រឹកថ្ងៃទី ១០ ខែកុម្ភៈ ឆ្នាំ ២០២៦ នេះ លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និង លោក អ៊ុន ចាន់ដា អភិបាលខេត្តកំពង់ចាម រួមក្រុមការងារបច្ចេកទេស បានចុះពិនិត្យសិក្សាស្តារ និងជំរុញការសាងសង់ច្រាំងទន្លេនេះជាបណ្ដោះអាសន្ន។ ឆ្លៀតឱកាសនោះដែរ លោក ថោ ជេដ្ឋា បានឲ្យមន្ត្រីជំនាញធ្វើការទប់បាវខ្សាច់ផ្ទៃខាងក្រោមជាបណ្ដោះអាសន្នសិន។ ជំហានបន្ទាប់ នឹងបូមខ្សាច់ពីជ្រោយកោះសំរោងចេញមួយផ្នែក ធ្វើយ៉ាងណាពង្រីកសួនមាត់ទន្លេបន្ថែមទៀត។ ផ្អែកលើស្ថានភាពបច្ចុប្បន្ន និងទប់ស្កាត់កុំឲ្យរងការខូចខាត ឬបាក់ស្រុតបន្តទៀត លោករដ្ឋមន្ត្រី បានបញ្ជាក់ថា ចំពោះមុខ មានតែពង្រីកច្រាំងទន្លេធ្វើជាសួនច្បារបន្ថែមទំហំប្រមាណជិត ៣ ហិតា ដើម្បីឲ្យខ្សែទឹករត់ស្មើគ្នាវិញ។

ស្របពេល នៃការពិនិត្យសិក្សាស្តារ និងសាងសង់ច្រាំងទន្លេនេះ លោក អ៊ុន ចាន់ដា ក៏បានបញ្ជាឲ្យអាជ្ញាធរក្រុងសហការគ្នាជាមួយសមត្ថកិច្ចធ្វើការប្រើប្រាស់កម្លាំងសមត្ថកិច្ច ដើម្បីប្រចាំការហាមឃាត់ការធ្វើចរាចរណ៍ និងធ្វើដំណើរចេញចូលតំបន់បាក់ស្រុតច្រាំងទន្លេជាបណ្ដោះអាសន្ន ដើម្បីការពារសុវត្ថិភាពដល់ប្រជាពលរដ្ឋទូទៅ។

គូសបញ្ជាក់ថា កាលពីយប់ថ្ងៃទី ៣០ ខែមករា ឆ្នាំ ២០២៦ កន្លងទៅ មានហេតុការណ៍បាក់ស្រុតច្រាំងទន្លេនៅចំណុចភូមិទី ១៥ សង្កាត់កំពង់ចាម ក្រុងកំពង់ចាម ខេត្តកំពង់ចាម តែមិនបង្កគ្រោះថ្នាក់ដល់អ្នកធ្វើដំណើរនោះទេ។ ផ្អែកតាមសេចក្ដីប្រកាសព័ត៌មានរបស់រដ្ឋបាលខេត្តកំពង់ចាម កាលពីថ្ងៃទី ៣១ ខែមករា ឆ្នាំ ២០២៦ បញ្ជាក់ពីមូលហេតុថា ការបាក់ស្រុតច្រាំងទន្លេនៅទីតាំងខាងលើនេះ បណ្តាលមកពីទីតាំងនោះស្ថិតនៅខាងមុខអន្លង់ទឹកកួច ដែលមានជម្រៅចាប់ពី ១.២ ម៉ែត្រ ទៅ ៦ ម៉ែត្រ។ កត្តាមួយទៀត រដ្ឋបាលខេត្ត ថា អាចបណ្តាលមកពីសំណង់ច្រាំងទន្លេម្តុំនោះ មានអាយុកាលចាស់ ដោយសាងសង់តាំងពីឆ្នាំ ២០១២ ពោលគឺមានរយៈពេលជាង ១៤ ឆ្នាំហើយ៕

អត្ថបទ និង រូបភាព ៖ ឡេក ចាន់ពេជ្រ

Related Topics:បាក់ស្រុតច្រាំងទន្លេ ក្រុងកំពង់ចាម

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា