នគរបាលស្រុកបាទី ឃាត់ខ្លួនក្រុមក្មេងទំនើង ៧នាក់ ពាក់ព័ន្ធករណីគំរាមសម្លាប់

កម្លាំងនគរបាលព្រហ្មទណ្ឌនៃអធិការដ្ឋាននគរបាលស្រុកបាទី ស្នងការដ្ឋាននគរបាលខេត្តតាកែវ បានស្រាវជ្រាវ និងចុះបង្ក្រាបឃាត់ខ្លួនក្រុមក្មេងទំនើងចំនួន៧នាក់ ក្នុងចំណោមបក្ខពួក៩នាក់ ពាក់ព័ន្ធករណីគំរាមសម្លាប់ភាគីម្ខាងទៀតដល់មុខផ្ទះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រតិបត្តិការបង្ក្រាបក្រុមក្មេងទំនើងនេះ ធ្វើឡើងបន្ទាប់ពីក្រុមក្មេងទំនើងទាំងនេះបានធ្វើសកម្មភាព និងប្រដាប់ដោយ​ដាវសាំម៉ូរ៉ៃមួយដើមចូលដេញកាប់ និងគំរាមសម្លាប់ទៅលើក្រុមជនរងគ្រោះ០១ក្រុមមានគ្នាចំនួន០៥នាក់ ដែលកំពុងឈរជួបជុំប្រមូលផ្តុំជជែកគ្នាលេងនៅចំណុចខាងមុខផ្ទះរបស់ជនរងគ្រោះឈ្មោះ ហ៊ូ ភាព ភេទប្រុស អាយុ៥៦ឆ្នាំ នៅភូមិត្រពាំងលាន ឃុំចំបក់ ស្រុកបាទី ខេត្តតាកែវ កាលពីវេលាម៉ោង២១និង០៥នាទី ថ្ងៃទី១០ ខែកុម្ភៈ ឆ្នាំ២០២៦។ តែទោះបីយ៉ាងណា បើតាមរបាយការណ៍របស់នគរបាលស្រុកបាទី ករណីនេះមិនបណ្ដាលឲ្យមានអ្នករងរបួសឡើយ។

តាមរបាយការណ៍ដដែល ក្រុមក្មេងទំនើងទាំងនេះ មានគ្នាសរុប៩នាក់ ហើយក្រោយពីកើតហេតុភ្លាមៗ កម្លាំងនគរបាលស្រុកបាទី ចុះទៅឃាត់ខ្លួនបានចំនួន៧នាក់ ចំណែកពីរនាក់ទៀតរត់គេចខ្លួនបាត់។ ក្នុងប្រតិបត្តិការឃាត់ខ្លួន កម្លាំងសមត្ថកិច្ចបានដកហូតដាវសាំម៉ូរ៉ៃផ្លែដែកពណ៌ស ដងរុំក្រណាត់ពណ៌ខ្មៅ ប្រវែង៧៥សង់ទីម៉ែត្រ ចំនួន០១ដើម និងមធ្យោបាយធ្វើដំណើរម៉ូតូជិះធ្វើសកម្មភាពបាន០២គ្រឿងយកមកអធិការដ្ឋាននគរបាលស្រុក ដើម្បីធ្វើការសាកសួរ និងកសារសំណុំរឿងបញ្ជូនទៅតុលាការដើម្បីចាត់ការនិតិវិធីច្បាប់៕