វិទ្យាល័យចំនួន ៦ នៅមណ្ឌលគិរី កំពុងផ្តល់ការអប់រំដល់សិស្សជាង៥ពាន់នាក់ ក្នុងនោះជិត២ពាន់នាក់សិស្សជនជាតិដើមភាគតិច

គិតត្រឹមដើមឆ្នាំ ២០២៦នេះ ខេត្តមណ្ឌលគិរី មានវិទ្យាល័យចំនួន ៦ កំពុងផ្តល់ការអប់រំដល់សិស្សានុសិស្សជាង ៥ ០០០នាក់ ក្នុងនោះសិស្សប្រមាណ ២ ០០០នាក់ជាជនជាតិដើមភាគតិច ដើម្បីបណ្តុះបណ្តាលពួកគេឱ្យក្លាយជាយុវជនមានចំណេះដឹង ជំនាញ និងជាទំពាំងស្នងឬស្សីដ៏រឹងមាំសម្រាប់អនាគតជាតិ។

លោក លី សាមិ ប្រធានមន្ទីរអប់រំយុវជន នឹងកីឡាខេត្តមណ្ឌលគិរី បានប្រាប់កម្ពុជាថ្មីថា វិទ្យាល័យចំនួន៦កន្លែងដែលកំពុងបម្រើលើវិស័យអប់រំ ក្នុងនោះរួមមាននៅស្រុកកោះញែក មានវិទ្យាល័យ១កន្លែង ស្រុកពេជ្រាដា ១កន្លែង  ស្រុកអូររាំង ១កន្លែង ស្រុកកែវសីមា ២កន្លែង និងនៅកណ្ដាលក្រុងសែនមនោរម្យ ចំនួន១កន្លែង។ លោកបន្តថា វិទ្យាល័យទាំង៦កន្លែងនោះ កំពុងផ្តល់ការអប់រំដល់សិស្សសរុបចំនួន ៥ ៤២៨ នាក់ ក្នុងនោះសិស្សស្រីចំនួន ៣ ០២៧នាក់ និងសិស្សជាជនជាតិដើមភាគតិចចំនួន ១ ៧៦៧នាក់ ។

លោកប្រធានមន្ទីរ បានបញ្ជាក់ថា ដើម្បីផ្ដល់ភាពងាយស្រួលជូនសិស្សានុសិស្សក៏ដូចជាលោកគ្រូអ្នកគ្រូ ក្នុងគ្រាអំឡុងឆ្នាំ២០២៣-២០២៤ មន្ទីរអប់រំខេត្តបានជួសជុលប្ដូរដំបូលអាគាសិក្សាថ្មី នៅវិទ្យាល័យមនោរម្យ ខណៈវិទ្យាល័យក្នុងស្រុកអូររាំងត្រូវបានសម្តេចតេជោ ហ៊ុន សែន ប្រធានព្រឹទ្ធសភា ឧបត្ថម្ភអគារស្នាក់នៅដល់គ្រូបង្រៀនមួយខ្នងមាន១០បន្ទប់ ។

បើតាម មន្ទីរអប់រំ យុវជន និងកីឡា ខេត្តមណ្ឌលគិរី បានឱ្យដឹងថា ក្នុងសម័យប្រឡងឆ្នាំ២០២៥ កន្លងទៅ នៅទូទាំងខេត្តមានសិស្សជាប់និទ្ទេស A ចំនួន ២ រូប ប៉ុណ្ណោះ ហើយសិស្សទាំងពីររូបនេះមកពីវិទ្យាល័យកែវសីមា។ ការទទួលបាននិទ្ទេស A ចេញពីសិស្សនៅខេត្តមណ្ឌលគិរី គឺជាកត្តាលើកទឹកចិត្តដ៏សំខាន់មួយសម្រាប់លោកប្រធានមន្ទីរ។ ក្នុងនាមជាប្រធានមន្ទីរ លោកនឹងបន្តជំរុញ និងលើកទឹកចិត្តដល់គ្រូបង្រៀនទាំងអស់ ឱ្យខិតខំប្រឹងប្រែងបន្ថែមទៀតក្នុងការអប់រំ ព្រមទាំងស្វែងរកវិធីសាស្រ្តបង្រៀនថ្មីៗ ដើម្បីឱ្យសិស្សមានសមត្ថភាពកាន់តែល្អ និងឈានដល់ការប្រឡងទទួលបាននិទ្ទេសល្អៗជាបន្តបន្ទាប់។

ជាមួយគ្នានេះ លោកក៏បានអំពាវនាវដល់សិស្សានុសិស្សគ្រប់រូប ឱ្យព្យាយាមសិក្សារៀនសូត្រ ទទួលយកចំណេះដឹង និងបំណិនជីវិតឱ្យបានពេញលេញ ហើយបញ្ឈប់ទម្លាប់គេចវេសពេលម៉ោងសិក្សា ព្រោះសកម្មភាពទាំងនេះអាចប៉ះពាល់យ៉ាងធ្ងន់ធ្ងរដល់លទ្ធផលសិក្សា ជះឥទ្ធិពលអវិជ្ជមានដល់វិស័យអប់រំនិងក្លាយជាគំរូមិនល្អសម្រាប់យុវជនជំនាន់ក្រោយ៕

អត្ថបទ៖ រៀម សុខហេង