ព័ត៌មានអន្ដរជាតិ

អតីតទាហានជើងទឹកអាមេរិក រងរបួសបាក់ដៃ ពេលប៉ូលិសក្រៀកចេញពីសភា ក្នុងការប្រឆាំងសង្រ្គាមអ៊ីរ៉ង

បានផុស

២ ខែ មុន

នៅ

ថ្ងៃព្រហស្បតិ៍ ៥ មីនា ២០២៦

ដោយ

បុរសជនជាតិអាមេរិកម្នាក់តវ៉ាប្រឆាំងសង្គ្រាមអ៊ីរ៉ង់នៅក្នុងស្ថាប័ននីតិបញ្ញត្តិសហរដ្ឋអាមេរិក បានរងរបួសពីការប៉ះទង្គិចជាមួយសមាជិកព្រឹទ្ធសភាសហរដ្ឋអាមេរិកនិងប៉ូលិស បន្ទាប់ពីបុរសរូបនោះរំខានដល់ការស្តាប់ការធ្វើសវនាការរបស់ព្រឹទ្ធសភា នៅវិមាន Capitol Hill ក្រុងវ៉ាស៊ីនតោន កាលពីថ្ងៃពុធ។

ប៉ូលិសព្យាយាមចាប់អ្នកតវ៉ាម្នាក់ចេញពីសវនាការព្រឹទ្ធសភាអាមេរិកនៅទីក្រុងវ៉ាស៊ីនតោន។ រូបភាព៖ RT

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសារព័ត៌មាន RT កាលពីថ្ងៃ០៥ខែមីនាឆ្នាំ២០២៦ លោក Brian McGinnis ជាបេក្ខជនមកពីគណបក្សបៃតង ដែលប្រជែងយកតំណែងសមាជិកព្រឹទ្ធសភានៅរដ្ឋ North Carolina និងជាអតីតទាហានម៉ារីនជើងទឹកអាមេរិក បានស្រែកអមជាមួយពាក្យស្លោកនៅកណ្តាលហ្វូងមនុស្សកំពុងស្តាប់សវនាការរបស់អនុគណៈកម្មាធិការប្រដាប់អាវុធក្នុងព្រឹទ្ធសភា ដែលមានសក្ខីកម្មពីសមាជិកនៃអគ្គសេនាធិការចម្រុះ។

នៅពេលមន្ត្រីប៉ូលិសបីនាក់ និងសមាជិកព្រឹទ្ធសភា លោក Tim Sheehy ព្យាយាមនាំ លោក McGinnis ចេញពីបន្ទប់ លោក បានចាប់ទ្វារ ហើយស្រែកថា ៖«គ្មាននរណាម្នាក់ចង់ប្រយុទ្ធដើម្បីអ៊ីស្រាអែលទេ»។

ក្នុងវីដេអូនៃហេតុការណ៍នោះបង្ហាញថាដៃស្តាំរបស់ លោក McGinnis បានរងរបួស (បាក់) ខណៈអ្នកឈរមើលម្នាក់ស្រែកថា «ដៃរបស់គាត់ ដៃរបស់គាត់!»។ ក្រោយមកមានមនុស្សម្នាក់ទៀតបានសួរ លោក McGinnis ថា៖ «តើដៃរបស់អ្នកមិនអីទេឬ? គាត់បានឆ្លើយថា ទេ! វាមិនអីទេ»។

លោក Sheehy សមាជិកគណបក្សសាធារណរដ្ឋមកពីរដ្ឋ Montana និយាយថា៖ «ឃើញប៉ូលិសកំពុងដោះស្រាយជាមួយអ្នកតវ៉ាដែលគ្មានស្មារតី ហើយបានសម្រេចចិត្តធ្វើអន្តរាគមន៍ ដើម្បីជួយនិងបន្ធូរបន្ថយស្ថានការណ៍»។

សមាជិកព្រឹទ្ធសភារូបនេះបានសរសេរនៅលើបណ្តាញសង្គម X ថា៖ «សុភាពបុរសរូបនេះបានមកកាន់វិមាន Capitol ដើម្បីស្វែងរកការប្រឈមមុខដាក់គ្នា ហើយគាត់បានជួបបញ្ហាមួយ»។

ប៉ូលិស Capitol និយាយថា៖ «លោក McGinnis បានតស៊ូ និងប្រយុទ្ធប្រឆាំងនឹងការប៉ុនប៉ងរបស់មន្ត្រីរបស់យើង ដើម្បីដកគាត់ចេញពីបន្ទប់ដោយហិង្សា»។

ប៉ូលិសបន្ថែមថា៖ «លោក McGinnis ប្រឈមនឹងការចោទប្រកាន់ចំនួនបីពីបទវាយប្រហារមន្ត្រីប៉ូលិសមាន ទប់ទល់នឹងការចាប់ខ្លួន ការប្រមូលផ្តុំគ្នា រារាំង និងបង្កបាតុកម្មខុសច្បាប់»៕

ប្រែសម្រួល៖ ណឺ មិនា