លោកត្រាំ ចង់​ឲ្យ​ក្រុម​ឃឺដបះបោរ បង្កចលាចលផ្ទៃក្នុង​ប្រទេស​អ៊ីរ៉ង់

ប្រធានាធិបតី ដូណាល់ ត្រាំ បាន​ប្រកាស​គាំទ្រជាសាធារណៈចំពោះការបះបោររបស់ក្រុមឃឺដ (Kurdish) នៅក្នុងប្រទេសអ៊ីរ៉ង់ ដែលជាផ្នែកមួយនៃកិច្ចប្រឹងប្រែងរបស់សហរដ្ឋអាមេរិកក្នុងការធ្វើ​ឲ្យ​រដ្ឋាភិបាលអ៊ីរ៉ង់ចុះខ្សោយពីខាងក្នុង។

លោកត្រាំ បានប្រាប់ទីភ្នាក់ងារសារព័ត៌មាន Reuters កាលពីថ្ងៃព្រហស្បតិ៍​ទី​៥​មីនា​ថា «ខ្ញុំគិតថា វាជារឿងអស្ចារ្យដែលពួកគេចង់ធ្វើបែបនេះ ខ្ញុំគាំទ្រពេញទំហឹង»។ ទោះបីជាសេតវិមានបានបញ្ជាក់ពីការពិភាក្សារវាងលោកត្រាំ និងមេដឹកនាំឃឺដនៅអ៊ីរ៉ាក់ក៏ដោយ ក៏​មន្ត្រីអាមេរិកបានបដិសេធថា មិនទាន់មានកិច្ចព្រមព្រៀងផ្លូវការណាមួយសម្រាប់ការងើបបះបោរប្រដាប់អាវុធនោះទេ។

មេដឹកនាំក្រុមប្រឆាំងឃឺដដ៏លេចធ្លោ លោក Mustafa Hijri បានអំពាវនាវ​ឲ្យ​ទាហានអ៊ីរ៉ង់ និងកងឆ្មាំបដិវត្តន៍ (IRGC) បោះបង់ចោលបន្ទាយ និងឈប់បំពេញភារកិច្ចដើម្បីវិលត្រឡប់ទៅរកគ្រួសារវិញ។ យ៉ាង​ណា​មិញ បើទោះបីជាមានការវាយប្រហារតាមអាកាសរាប់ពាន់លើកពីសំណាក់អាមេរិក និងអ៊ីស្រាអែលក៏ដោយ ក៏គេមិនទាន់ឃើញមានការបះបោរ ឬការរត់ចោលជួរទ្រង់ទ្រាយធំណាមួយពីសំណាក់កងទ័ពអ៊ីរ៉ង់នៅឡើយទេ ចាប់តាំងពីសង្គ្រាមបានផ្ទុះឡើងកាលពីថ្ងៃសៅរ៍សប្ដាហ៍​មុន។ អ្នករិះគន់បានព្រមានថា ការជំរុញ​ឲ្យ​មានជម្លោះជាតិសាសន៍អាចបង្ក​ឲ្យ​មានសង្គ្រាមស៊ីវិល និងធ្វើ​ឲ្យ​តំបន់ទាំងមូលកាន់តែវឹកវរ។

ជាការឆ្លើយតបភ្លាមៗចំពោះការគំរាមកំហែងនេះ កងឆ្មាំបដិវត្តន៍អ៊ីរ៉ង់បានបាញ់មីស៊ីល និងដ្រូនលើទីស្នាក់ការរបស់ក្រុមឃឺដនៅក្នុងប្រទេសអ៊ីរ៉ាក់។ រដ្ឋាភិបាលតំបន់ Kurdistan (KRG) ក្នុងប្រទេសអ៊ីរ៉ាក់ បានថ្កោលទោសការវាយប្រហាររបស់អ៊ីរ៉ង់ ប៉ុន្តែក៏បានបដិសេធដាច់អហង្ការចំពោះការចូលរួមក្នុងយុទ្ធនាការវាយលុកប្រឆាំងនឹងអ៊ីរ៉ង់ផងដែរ ដោយអះអាងថា ខ្លួនចង់បានតែសន្តិភាព និងស្ថិរភាពនៅក្នុងតំបន់ប៉ុណ្ណោះ៕

ប្រែសម្រួល៖ ឈាង