អ៊ីរ៉ង់ព្រមានកម្ទេចហេដ្ឋារចនាសម្ព័ន្ធប្រេងក្នុងតំបន់ បង្ក​ហានិភ័យ​ធ្វើ​ឲ្យ​ប្រេង​រឹត​តែ​ឡើង​ថ្លៃ

កម្ដៅសង្រ្គាមនៅមជ្ឈិមបូព៌ាបានឈានដល់ចំណុចគ្រោះថ្នាក់បំផុតទៀត បន្ទាប់ពីបញ្ជាការដ្ឋានយោធាកំពូលរបស់អ៊ីរ៉ង់បានចេញឱសានវាទព្រមានវាយប្រហារលើរោងចក្រប្រេងនៅទូទាំងតំបន់ ដើម្បីសងសឹកទៅនឹងការទម្លាក់គ្រាប់បែករបស់អាមេរិក និងអ៊ីស្រាអែល។

តាម​ការ​ផ្សាយ​របស់សារព័ត៌មាន Yeni Safak នា​ថ្ងៃ​ទី​៩​ខែ​មីនា​ឆ្នាំ​២០២៦ បន្ទាប់ពីអ៊ីស្រាអែលបានបើកការវាយប្រហារតាមអាកាសលើទីតាំងចម្រាញ់ប្រេង និងឃ្លាំងស្តុកប្រេងក្នុងទីក្រុងតេហេរ៉ង់កាលពីថ្ងៃសៅរ៍កន្លងទៅ អ៊ីរ៉ង់បានបញ្ជាក់ច្បាស់ៗថា បើការវាយប្រហារនៅតែបន្ត នោះតម្លៃប្រេងពិភពលោកនឹងហក់ឡើងខ្ពស់ជាង ២០០ដុល្លារក្នុងមួយបារ៉ែលជាមិនខាន។

មេដឹកនាំអ៊ីរ៉ង់បានអំពាវនាវ​​ឲ្យ​បណ្ដាប្រទេសអ៊ីស្លាមទាំងអស់ រួមគ្នាដាក់សម្ពាធលើទីក្រុងវ៉ាស៊ីនតោន និងអ៊ីស្រាអែល ឲ្យ​បញ្ឈប់ «ការវាយប្រហារដ៏សាហាវឃោរឃៅ» មកលើខ្លួន។ ការព្រមាននេះធ្វើឡើងបន្ទាប់ពីប្រតិបត្តិការយោធារបស់អាមេរិក-អ៊ីស្រាអែល ដែលបានចាប់ផ្ដើមកាលពីថ្ងៃទី២៨​កុម្ភៈ បានបណ្ដាល​ឲ្យ​មានអ្នកស្លាប់ជាង ១២០០​នាក់ រួមទាំងមេដឹកនាំកំពូលលោក Ayatollah Ali Khamenei ផងដែរ និងមានអ្នករងរបួសជាង ១០ ០០០​នាក់។ ជាការឆ្លើយតបយ៉ាងចាស់ដៃ អ៊ីរ៉ង់បានបាញ់ស្រោចមីស៊ីល និងប្រើដ្រូនអត្តឃាតវាយប្រហារលើអ៊ីស្រាអែល និងបណ្ដាប្រទេសក្នុងតំបន់ឈូងសមុទ្រដែលផ្តល់ទីតាំង​ឲ្យ​មូលដ្ឋានទ័ពអាមេរិក។

អ្វីដែលធ្វើ​ឲ្យ​ពិភពលោកកាន់តែព្រួយបារម្ភបំផុតនោះគឺ ការសម្រេចចិត្តរបស់អ៊ីរ៉ង់ក្នុងការបិទច្រកសមុទ្រ Hormuz ដែលជាច្រកសេដ្ឋកិច្ចដ៏សំខាន់បំផុត ដោយមានប្រេងប្រមាណ ២០លានបារ៉ែលឆ្លងកាត់ជារៀងរាល់ថ្ងៃ។ ការបិទច្រកសមុទ្រនេះ រួមជាមួយការគំរាមវាយប្រហារលើប្រភពផលិតប្រេងក្នុងតំបន់ បង្ហាញថា អ៊ីរ៉ង់កំពុងប្រើប្រាស់ «អាវុធសេដ្ឋកិច្ច» ដើម្បីបង្កជាភាពវឹកវរដល់ពិភពលោកទាំងមូល។ ប្រសិនបើជម្លោះនេះនៅតែបន្តរីករាលដាល វានឹងក្លាយជាសង្គ្រាមទ្រង់ទ្រាយធំដែលមិនត្រឹមតែបំផ្លាញជីវិតមនុស្សឡើយ ប៉ុន្តែថែមទាំងធ្វើ​ឲ្យ​សេដ្ឋកិច្ចសកលលោកទាំងមូលធ្លាក់ក្នុងវិបត្តិដែលមិនធ្លាប់មានពីមុនមក៕

ប្រែសម្រួល៖ ឈាង