អ៊ីរ៉ង់មិន​ទាន់​បញ្ចេញ «សន្លឹកអាត់» ខណៈជម្លោះក្នុងតំបន់ឈានចូលដល់ថ្ងៃទី១២

ប្រតិបត្តិការយោធាបានឈានចូលដល់សប្តាហ៍ទីពីរ ហើយ​របាយការណ៍ស៊ើបការណ៍សម្ងាត់បានបង្ហាញថា ទីក្រុង​តេហេរ៉ង់​​នៅ​មិនទាន់បានបញ្ចេញអាវុធយុទ្ធសាស្ត្រដ៏មានឥទ្ធិពលបំផុតរបស់ខ្លួននៅឡើយទេ ទោះបីជាបានបាញ់បង្ហោះដ្រូន និងមីស៊ីលរាប់ពាន់គ្រាប់រួចទៅហើយក៏ដោយ។

ទាក់ទងនឹងបញ្ហានុយក្លេអ៊ែរ ទោះបីជាអ៊ីរ៉ង់​មានការស្តុកទុកជាតិអ៊ុយរ៉ាញ៉ូមចម្រាញ់កម្រិតខ្ពស់ប្រហែល​៤៤០​គីឡូក្រាមក៏ដោយ ក៏​លោក Rafael Grossi ប្រធានទីភ្នាក់ងារថាមពលបរមាណូអន្តរជាតិ បានកត់សម្គាល់ថា ការផលិតក្បាលគ្រាប់នុយក្លេអ៊ែរដែលប្រើការបាន គឺនៅតែត្រូវការ​រយៈ​ពេលរាប់ខែទៀតឯណោះ។ រដ្ឋមន្ត្រីការបរទេស​អាមេរិក លោក Marco Rubio បានបញ្ជាក់ពីអត្ថិភាពនៃស្តុក​ទុក​ជាតិ​អ៊ុយរ៉ាញ៉ូម​ទាំង​នេះ ប៉ុន្តែការបំប្លែងវាទៅជាអាវុធដែលអាចប្រើការបាន គឺជា​កត្តា​ជំរុញ​ឲ្យ​រដ្ឋបាលលោក ដូណាល់ ត្រាំ ទាមទារ​ឲ្យ​​អ៊ីរ៉ង់​ «ចុះចាញ់ដោយគ្មានលក្ខខណ្ឌ»។

នៅលើសមរភូមិអាកាស អ៊ីរ៉ង់​បានលាក់ទុកនូវប្រភេទមីស៊ីលកម្រិតខ្ពស់បំផុតរបស់ខ្លួន រួមមាន មីស៊ីលរយៈចម្ងាយឆ្ងាយ Ghaem-100 និង Fattah-2 ដែលមានសមត្ថភាពអាចគេចចេញពីប្រព័ន្ធការពារអាកាសទំនើបៗបានយ៉ាងងាយស្រួល។ នេះ​បើ​យោង​តាម​ការ​ចេញ​ផ្សាយ​របស់ Aerospace Global News។

ទន្ទឹមនឹងនេះ អ្នកវិភាគនៅ​ក្នុង​អត្ថបទ​ស្រាវជ្រាវមួយ​ដែល​មាន​ចំណង​ជើង​ថា «US-Israel strikes on Iran: February/March 2026» របស់​អង់គ្លេស បានសង្កេតឃើញ «ភាពស្ងប់ស្ងាត់ជាយុទ្ធសាស្ត្រ» នៅតំបន់សមុទ្រក្រហម ពោលគឺខណៈដែលក្រុម​ហេសបូឡា​បានបង្កើនការវាយប្រហារយ៉ាងខ្លាំងក្លា ប៉ុន្តែក្រុម​ហ៊ូធី​បែរជានៅរក្សាភាពស្ងប់ស្ងាត់ទៅវិញ។ ក្រុមអ្នកជំនាញជឿថា ទីក្រុង​តេហេរ៉ង់​កំពុងរក្សាផ្លូវនាវាចរណ៍ Bab al-Mandab ទុកជា «ផែនការចុងក្រោយ» ប្រសិនបើសមរភូមិផ្សេងៗទៀតត្រូវបរាជ័យ ជាពិសេស​បើ​ការ​បិទ​ច្រក​សមុទ្រ Hormuz មិន​ទទួល​បាន​ផ្លែផ្កា។

ក្រៅពីការប្រើអាវុធពិតៗបាញ់គ្នាលើសមរភូមិ ទីភ្នាក់ងារសម្ងាត់បស្ចិមប្រទេសបានព្រមានថា អ៊ីរ៉ង់នៅមានអាវុធឌីជីថលម្យ៉ាងទៀត គឺការវាយប្រហារតាមប្រព័ន្ធកុំព្យូទ័រក្នុងទ្រង់ទ្រាយធំ។ តាម​ការ​ផ្សាយ​របស់ Industrial Cyber ទោះបីជាពេលនេះ ក្នុងប្រទេសអ៊ីរ៉ង់​ខ្លួនឯងត្រូវបានកាត់ផ្ដាច់អ៊ីនធឺណិតជិតអស់ក៏ដោយ ក៏​គេ​បារម្ភថា អ៊ីរ៉ង់​បានលួចបង្កប់មេរោគស៊ើបការណ៍សម្ងាត់ជាយូរមកហើយ នៅក្នុងប្រព័ន្ធគ្រប់គ្រងទឹក និងបណ្ដាញអគ្គិសនីរបស់បស្ចិមប្រទេស។ មេរោគដែលកំពុងសម្ងំដេកលក់ទាំងនេះ អាចនឹងត្រូវគេបញ្ជាឲ្យ​ភ្ញាក់ឡើង ដើម្បីបិទប្រព័ន្ធទឹកភ្លើង ឬបង្កភាពវឹកវរភ្លាមៗ ប្រសិនបើរបបដឹកនាំអ៊ីរ៉ង់យល់ថា ខ្លួនកំពុងដល់ផ្លូវទាល់។ នេះគឺជាការគំរាមកំហែងដែលមើលមិនឃើញ ប៉ុន្តែវាអាចបង្កគ្រោះថ្នាក់ខ្លាំងមិនចាញ់ការបាញ់មីស៊ីលដាក់គ្នានោះឡើយ៕

ប្រែសម្រួល៖ ឈាង