អាមេរិក និងសម្ព័ន្ធមិត្ត ទាស់សម្ដី​គ្នា​ខ្លាំង​ជាមួយរុស្ស៊ី និងចិន នៅ UN រឿងសង្រ្គាមនៅអ៊ីរ៉ង់

បរិយាកាសនៅក្នុងអង្គប្រជុំក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃព្រហស្បតិ៍ម្សិលមិញនេះ បានប្រែជាតានតឹងខ្លាំងបំផុត នៅពេលដែលមហាអំណាចពិភពលោកបានបើកការវាយបកពាក្យសម្តីដាក់គ្នាឥតសំចៃមាត់។ ចំណុចសំខាន់​នៃជម្លោះនេះ គឺការដែល​អាមេរិកព្យាយាមស្វែងរកសំឡេងគាំទ្រ ដើម្បីផ្តល់ភាពស្របច្បាប់ដល់ប្រតិបត្តិការសឹករបស់ខ្លួនលើប្រទេសអ៊ីរ៉ង់ ដែលបានអូសបន្លាយពេល២​សប្តាហ៍មកហើយ។

តាម​ការ​ចេញផ្សាយ​របស់​ទីភ្នាក់ងារ​ព័ត៌មាន​រ៉យទ័រ​នា​ថ្ងៃ​សុក្រ​ទី​១៣​ខែ​មីនា​ឆ្នាំ​២០២៦ ទោះ​មាន​ការរារាំងយ៉ាងខ្លាំងក្លាពីសំណាក់ទីក្រុងមូស្គូ និងទីក្រុងប៉េកាំងក៏ដោយ ក៏ក្រុមប្រឹក្សាសន្តិសុខបានសម្រេចបោះឆ្នោតក្នុងលទ្ធផល១១​ទល់នឹង​២ ដើម្បីបន្តនីតិវិធីពិភាក្សាលើការរឹតបន្តឹងទណ្ឌកម្មសេដ្ឋកិច្ច។

ក្នុងឱកាសនោះ លោក Mike Waltz បេសកជនអាមេរិក បានបាញ់ឆ្ពោះទៅរកមហាអំណាចទាំងពីរថា កំពុងព្យាយាមផ្ដល់ខ្នងបង្អែកការពារទីក្រុងតេហេរ៉ង់។ លោកបានសង្កត់ធ្ងន់ថា រដ្ឋជាសមាជិកទាំងអស់មានកាតព្វកិច្ចត្រូវអនុវត្តការហាមឃាត់ការលក់អាវុធ និងបច្ចេកវិទ្យាមីស៊ីលទៅ​ឲ្យ​អ៊ីរ៉ង់ ជាដាច់ខាត រួមទាំងការបង្កកទ្រព្យសម្បត្តិហិរញ្ញវត្ថុដែលពាក់ព័ន្ធនឹងកម្មវិធីអាវុធទាំងនោះផងដែរ។

ជាការឆ្លើយតប រុស្ស៊ី និងចិនមិនបាននៅស្ងៀមឡើយ ដោយបានចង្អុលមុខអាមេរិកថាជា «អ្នកបង្កាត់​ភ្លើង» នៃវិបត្តិនេះ។ លោក Vasily Nebenzya ឯកអគ្គរដ្ឋទូតរុស្ស៊ី បានចោទប្រកាន់ទីក្រុងវ៉ាស៊ីនតោនថា កំពុងបង្កើតរឿងបំភិត​បំភ័យ អំពីគម្រោងនុយក្លេអ៊ែរទាំង​ដែលគ្មានភស្តុតាងច្បាស់លាស់ ដើម្បីយកលេសធ្វើសង្រ្គាមតាមចិត្តចង់។ ចំណែកឯតំណាងភាគីចិន លោក Fu Cong បានបន្ថែមថា ការដែលអាមេរិកសម្រេចចិត្តប្រើកម្លាំងបាយមុនបែបនេះ បានធ្វើឲ្យ​ផ្លូវការទូតដែលធ្លាប់មាន ក្លាយជាការខាតបង់ពេលវេលាឥតប្រយោជន៍។

ងាកមកមើលខាងអឺរ៉ុបវិញ អង់គ្លេស និងបារាំងបានចេញមុខមកឈរនៅខាងអាមេរិក ដោយគាំទ្រ​ឲ្យ​មានការដាក់ទណ្ឌកម្មឡើងវិញ។ បារាំងបានលើកឡើងនូវហេតុផលគួរ​ឲ្យ​ព្រួយបារម្ភថា បច្ចុប្បន្នអ៊ីរ៉ង់មានសារធាតុនុយក្លេអ៊ែរក្នុងដៃច្រើនល្មមអាចផលិតគ្រាប់បែកបានដល់ទៅ១០គ្រាប់ ហើយទីភ្នាក់ងារថាមពលអាតូមិកអន្តរជាតិ (IAEA) ក៏មិនអាចធានាបានទៀតទេថា កម្មវិធីរបស់អ៊ីរ៉ង់ធ្វើឡើងដើម្បីសន្តិភាព។

ដ្បិត​មានការរិះគន់ថា របាយការណ៍សម្ងាត់មិនទាន់មានភស្តុតាងរឹងមាំក៏ដោយ ក៏ប្រធានាធិបតីអាមេរិក លោក ដូណាល់ ត្រាំ នៅតែប្រកាន់ជំហរដាច់ខាតថា សង្រ្គាមនេះគឺជាកិច្ចការចាំបាច់បំផុត ដើម្បីរារាំងអ៊ីរ៉ង់មិន​ឲ្យ​ផលិតអាវុធនុយក្លេអ៊ែរបានក្នុងរយៈពេលប៉ុន្មានសប្តាហ៍ខាងមុខ។ ជាការឆ្លើយតបចុងក្រោយ លោក Amir Saeid Iravani ឯកអគ្គរដ្ឋទូតអ៊ីរ៉ង់ បានច្រានចោលការចោទប្រកាន់ទាំងអស់ ដោយចាត់ទុកថាវាជារឿងគ្មានមូលដ្ឋាន ហើយបានប្រកាសយ៉ាងច្បាស់ថា អ៊ីរ៉ង់នឹងមិនទទួលស្គាល់ ឬអនុវត្តតាមទណ្ឌកម្មណាមួយដែលដាក់មកលើខ្លួននោះឡើយ៕

ប្រែសម្រួល៖ ឈាង