ព័ត៌មានជាតិ

សម្តេច ម៉ែន សំអន ជំរុញស្ត្រីបន្តយកចិត្តទុកដាក់តាមដានវឌ្ឍនភាពសភាពការណ៍ពិភពលោក

បានផុស

១ ខែ មុន

នៅ

ថ្ងៃចន្ទ ១៦ មីនា ២០២៦

ដោយ

សម្ដេចកិត្តិសង្គហបណ្ឌិត ម៉ែន សំអន ប្រធានសមាគមននារីកម្ពុជា ដើម្បីសន្តិភាព និងអភិវឌ្ឍន៍ បានដឹកនាំកិច្ចប្រជុំគណៈអចិន្ត្រៃយ៍សមាគមនារី និងគណៈចលនាស្ត្រី ជំរុញក្រុមការងារទាំងអស់ បន្តយកចិត្តទុកដាក់តាមដាននូវវឌ្ឍនភាពសភាពការណ៍ពិភពលោកដែលបាននិងកំពុងវិវត្តន៍យ៉ាងលឿន និងត្រូវធ្វើបច្ចុប្បន្នភាពចំពោះសុន្ទរកថា និងឯកសារពាក់ព័ន្ធឲ្យស្របនឹងសភាពការណ៍បច្ចុប្បន្ន។

សម្តេចកិត្តិសង្គហបណ្ឌិត ម៉ែន សំអន ថ្លែងបែបនេះក្នុងពេលបើកកិច្ចប្រជុំស្តីពីវឌ្ឍនៈការងារ នៅវិមាន ៧មករា រាជធានីភ្នំពេញ នាព្រឹកថ្ងៃចន្ទ ១៣រោច ខែផល្គុន ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១៦ ខែមីនា ឆ្នាំ២០២៦។

នៅក្នុងកិច្ចប្រជុំនោះផងដែរ ក៏មានរបៀបវារៈសំខាន់ចំនួន ៦ ដូចតទៅ ៖ទី១.មតិបើកិច្ចប្រជុំដោយ សម្តេចប្រធាន , ទី២.របាយការណ៍វឌ្ឍនភាពការងារដែលបានអនុវត្តកន្លងមក , ទី៣.កាលបរិច្ឆេទ និងទីកន្លែងរៀបចំសន្និបាត , ទី៤.កិច្ចពិភាក្សា ,ទី៥.មតិបូកសរុបកិច្ចប្រជុំរបស់ សម្តេចប្រធាន , ទី៦.ផ្សេងៗ ទៀត។

សម្តេចកិត្តិសង្គហបណ្ឌិត បានប្រគល់ភារកិច្ចជូនដល់ លោកស្រី ជូ ប៊ុនអេង ធ្វើសេចក្តីរាយការណ៍អំពីវឌ្ឍនភាពការងារដែលបានអនុវត្តកន្លងមក។ លោកស្រីក៏បានគូសបញ្ជាក់ផងដែរថា ចំពោះក្រុមការងាររៀបចំសន្និបាត ក៏បានការត្រៀមរៀបចំរួចរាល់នូវឯកសារពាក់ព័ន្ធសម្រាប់ការរៀបចំសន្និបាត។ បន្ទាប់មកទៀត លោកស្រី មាន សំអាន ក៏បានលើកឡើងនូវបញ្ហាប្រឈមមួយចំនួន និងបានពិភាក្សាដើម្បីរកដំណោះសា្រយសម្រាប់អនុវត្តបន្តនាពេលខាងមុខ។

សម្តេចកិត្តិសង្គហបណ្ឌិត ក៏បានថ្លែងនូវការកោតសរសើរចំពោះលោកស្រី ក៏ដូចជាក្រុមការងារទាំងអស់ បានខិតខំទាំងកម្លាំងកាយ កម្លាំងចិត្ត រហូតជន្នះនូវការងារកន្លងមករហូតទទួលបាននូវលទ្ធផលគួរជាទីមោទនៈ។

សម្តេចកិត្តិសង្គហបណ្ឌិត ក៏បានស្នើឱ្យក្រុមការងារទាំងអស់ បន្តយកចិត្តទុកដាក់តាមដាននូវវឌ្ឍនៈភាពសភាពការណ៍ពិភពលោកដែលបាននិងកំពុងវិវត្តន៍យ៉ាងលឿន និងត្រូវធ្វើបច្ចុប្បន្នភាពចំពោះសុន្ទរកថា និងឯកសារពាក់ព័ន្ធឱ្យស្របនឹងសភាពការណ៍បច្ចុប្បន្ន៕

អត្ថបទ ៖ វិមាន

Related Topics:សម្តេច ម៉ែន សំអន