ព័ត៌មានអន្ដរជាតិ

ខណៈអាមេរិកគ្រោងពន្យារទស្សនកិច្ច ភាគីចិនថា វាជារឿងដាច់ដោយឡែកពីច្រក Hormuz

បានផុស

១ ខែ មុន

នៅ

ថ្ងៃពុធ ១៨ មីនា ២០២៦

ដោយ

រដ្ឋាភិបាលចិន បានបញ្ជាក់នៅថ្ងៃអង្គារទី១៧មីនា ថា ការពន្យារពេលនៃដំណើរទស្សនកិច្ចដែលបានគ្រោងទុកទៅកាន់ទីក្រុងប៉េកាំងនៅចុងខែនេះ របស់ប្រធានាធិបតីសហរដ្ឋអាមេរិក លោក ដូណាល់ ត្រាំ មិនជាប់ទាក់ទងនឹងបញ្ហាលើច្រកសមុទ្រនាំចេញប្រេង Hormuz ដែលគ្រប់គ្រងដោយអ៊ីរ៉ង់ទេ។ នេះបើតាមការលើកឡើងពីអ្នកនាំពាក្យក្រសួងការបរទេសចិន លោក Lin Jian និងចុះផ្សាយដោយ sraitstimes។

ការឆ្លើយតបរបស់ភាគីចិន ស្របពេលដែលសេតវិមានបានលើកឡើងថា លោកត្រាំមានគម្រោងទៅទស្សនកិច្ចនៅចុងខែមីនានេះនិងដើមខែមេសា ប៉ុន្តែក្រោយមក ក៏មានសេចក្តីរាយការណ៍ខ្លះលើកឡើងថា ភាគីសហរដ្ឋអាមេរិកក៏បានស្នើសុំឲ្យចិន ពន្យារពេលសម្រាប់ជំនួបកំពូលជាមួយមេដឹកនាំចិន លោក ស៊ី ជិនពីង ខណៈពេលដែលលោកត្រាំកំពុងជាប់ដៃដោះស្រាយសង្គ្រាមនៅមជ្ឈិមបូព៌ា។

អ្នកនាំពាក្យក្រសួងការបរទេសចិនលោក Lin Jian បានថ្លែងក្នុងអំឡុងពេលសន្និសីទសារព័ត៌មានជាប្រចាំមួយនៅទីក្រុងប៉េកាំង ថា «យើងបានកត់សម្គាល់ឃើញថា ភាគីអាមេរិកបានបញ្ជាក់ជាសាធារណៈអំពីរបាយការណ៍មិនពិតទាំងនេះដោយប្រព័ន្ធផ្សព្វផ្សាយ។ ជាក់ស្ដែង របាយការណ៍ពាក់ព័ន្ធគឺខុសទាំងស្រុង ដំណើរទស្សនកិច្ចនេះមិនមានអ្វីទាក់ទងនឹងបញ្ហានៃការបើកច្រកសមុទ្រ Hormuz ទេ។

លោកបាននិយាយថា ទាំងចិននិងសហរដ្ឋអាមេរិកកំពុងរក្សាការទំនាក់ទំនងនឹងកាលបរិច្ឆេទនៃដំណើរទស្សនកិច្ចដែលអាចកើតមានរបស់ប្រធានាធិបតីអាមេរិក ដូណាល់ ត្រាំ ទៅកាន់ប្រទេសចិន។ ប៉ុន្តែមិនផ្តល់ព័ត៌មានលម្អិតបន្ថែមណាមួយឡើយ។

លោកត្រាំបានស្នើកាលពីថ្ងៃអាទិត្យថា ដំណើរទស្សនកិច្ចរបស់លោក អាចអាស្រ័យលើរបៀបដែលចិនឆ្លើយតបទៅនឹងសំណើរបស់លោកសម្រាប់ប្រទេសចិន និងប្រទេសដទៃទៀត ដើម្បីជួយបើកច្រកសមុទ្រ Hormuz ឡើងវិញ ដែលជាផ្លូវសមុទ្រសម្រាប់ការឆ្លងកាត់ប្រេងដ៏សំខាន់ ដែលបានបិទដោយភាគីអ៊ីរ៉ង់ ដើម្បីសងសឹកចំពោះការវាយប្រហាររបស់អាមេរិក និងអ៊ីស្រាអែល។

ទោះជាយ៉ាងណាក៏ដោយ រដ្ឋមន្ត្រីក្រសួងហិរញ្ញាវត្ថុអាមេរិក លោក Scott Bessent បានបដិសេធការអះអាងនោះកាលពីថ្ងៃចន្ទថា ការភ្ជាប់កិច្ចប្រជុំទៅនឹងការទាមទាររបស់លោកត្រាំសម្រាប់ប្រទេសចិន ដើម្បីជួយបើកផ្លូវទឹកឡើងវិញ គឺជា «ការនិទានរឿងមិនពិត»។

ទីក្រុងវ៉ាស៊ីនតោន បាននិយាយថា លោកត្រាំ នឹងទៅទស្សនកិច្ចប្រទេសចិន ចាប់ពីថ្ងៃទី ៣១ ខែមីនា ដល់ថ្ងៃទី ២ខែមេសា ដើម្បីកំណត់ទំនាក់ទំនងឡើងវិញ និងពង្រីកបន្ថែមនូវកិច្ចព្រមព្រៀងក្នុងជម្លោះពាណិជ្ជកម្មរវាងសហរដ្ឋអាមេរិក និងចិន ទោះបីជាទីក្រុងប៉េកាំងមិនទាន់បានបញ្ជាក់ពីកាលបរិច្ឆេទទាំងនោះ ស្របតាមការអនុវត្តធម្មតារបស់ខ្លួនក៏ដោយ៕

អត្ថបទ៖ សាង ស្រីល័ក្ខ