ហ្វីលីពីន អាមេរិក គ្រោងបង្កើតមជ្ឈមណ្ឌលឧស្សាហកម្ម ដើម្បីពង្រឹង​ខ្សែច្រវ៉ាក់ផ្គត់ផ្គង់សន្តិសុខបច្ចេកវិទ្យា

សហរដ្ឋអាមេរិក និងហ្វីលីពីន គ្រោង​សាងសង់មជ្ឈមណ្ឌលឧស្សាហកម្មទំហំ ១ ៦២០ ហិចតា ​បន្ទាប់ពី​រដ្ឋាភិបាល​ទីក្រុងម៉ានីល បានចូលរួមក្នុងគំនិតផ្តួចផ្តើមដឹកនាំដោយទីក្រុងវ៉ាស៊ីនតោន ដើម្បីធានាបាននូវខ្សែច្រវ៉ាក់ផ្គត់ផ្គង់បញ្ញាសិប្បនិម្មិត (AI) និងបន្ទះឈីប​។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ ដែលស្រង់ព័ត៌មាន​ពីសេចក្ដីថ្លែងការណ៍ក្រសួងការបរទេសសហរដ្ឋអាមេរិកនៅថ្ងៃសុក្រនេះ​។

ហ្វីលីពីនបានក្លាយជាប្រទេសទី ១៣ ដែលចូលរួម Pax Silica ដែលជាកម្មវិធីដែលមានគោលបំណងការពារខ្សែច្រវ៉ាក់ផ្គត់ផ្គង់បច្ចេកវិទ្យាទាំងមូល រួមទាំងរ៉ែសំខាន់ៗ ផលិតកម្មទំនើប និងហេដ្ឋរចនាសម្ព័ន្ធបច្ចេកវិទ្យាកុំព្យូទ័រ និងទិន្នន័យ។

គំនិតផ្ដួចផ្ដើមនេះ គឺជាសសរស្តម្ភសំខាន់មួយនៃយុទ្ធសាស្ត្រសេដ្ឋកិច្ចរបស់រដ្ឋបាលលោកប្រធានាធិបតី ដូណាល់ ត្រាំ ដែលមានគោលបំណងកាត់បន្ថយការពឹងផ្អែកលើប្រទេសគូប្រជែង និងពង្រឹងកិច្ចសហប្រតិបត្តិការក្នុងចំណោមដៃគូសម្ព័ន្ធមិត្ត។ ប្រទេសហត្ថលេខីផ្សេងទៀតរួមមាន អូស្ត្រាលី ហ្វាំងឡង់ ឥណ្ឌា កាតា កូរ៉េខាងត្បូង និងសិង្ហបុរី។

មជ្ឈមណ្ឌលឧស្សាហកម្មថ្មីនេះ នឹងសាងសង់ឡើង​ក្នុងច្រករបៀងសេដ្ឋកិច្ចកោះលូហ្ស៊ន ដែលជាមជ្ឈមណ្ឌលយុទ្ធសាស្ត្រសម្រាប់សកម្មភាពសេដ្ឋកិច្ច រាប់បញ្ចូលទាំងរដ្ឋធានីម៉ានីល និងតំបន់ជិតខាងដែលមានសកម្មភាពឧស្សាហកម្ម និងផលិតកម្ម។ មែនទែនទៅ ហ្វីលីពីន ជប៉ុន និងសហរដ្ឋអាមេរិក បានប្តេជ្ញាបង្កើនការវិនិយោគលើហេដ្ឋារចនាសម្ព័ន្ធនៅក្នុងច្រករបៀងនេះ ក្រោមកិច្ចព្រមព្រៀងក្របខ័ណ្ឌត្រីភាគីរួចហើយ។

ក្នុងសេចក្ដីថ្លែងការណ៍នៅថ្ងៃសុក្រនេះ ក្រសួងការបរទេសអាមេរិក​បាន​និយាយយ៉ាងដូច្នេះថា៖ «សម្ព័ន្ធមិត្តទាំង ២ ប្តេជ្ញាពង្រឹងខ្សែច្រវ៉ាក់ផ្គត់ផ្គង់រួមគ្នាក្នុងវិស័យរ៉ែសំខាន់ៗ បន្ទះឈីប​ គ្រឿងអេឡិចត្រូនិក​ និងទំនិញផ្សេងៗទៀត»។

គេមើលឃើញថា ទំនាក់ទំនងរវាងហ្វីលីពីន​ និងអាមេរិក​បានរីកចម្រើនក្រោមការដឹកនាំរបស់ប្រធានាធិបតីហ្វីលីពីន លោក ហ្វឺរឌីណង់ ម៉ាកូស ជូនៀ។ ការពង្រឹងទំនាក់ទំនងជាមួយអាមេរិក គឺជាយុទ្ធសាស្រ្តដ៏សំខាន់ដើម្បីទប់ទល់នឹង​ចិន​ ដែលមាន​ជម្លោះជាមួយហ្វីលីពីនពាក់ព័ន្ធនឹង​សមុទ្រចិនខាងត្បូង៕