ព័ត៌មានជាតិ

តោះ! មកដឹងពីគម្រោងអភិរក្ស និងអភិវឌ្ឍដែនជម្រកសត្វព្រៃសៀមប៉ាង ផ្សារជាប់ធម្មជាតិ

បានផុស

២ សប្តាហ៍ មុន

នៅ

ថ្ងៃសៅរ៍ ១៨ មេសា ២០២៦

ដោយ

គម្រោងអភិរក្ស និងអេកូទេសចរណ៍នៅដែនជម្រកសត្វព្រៃសៀមប៉ាងខេត្តស្ទឹងត្រែង គឺជាគម្រោងដ៏ធំមួយដែលផ្ដោតទៅលើការការពារព្រៃឈើ សត្វព្រៃ ការលើកស្ទួយជីវភាពសហគមន៍ និងការអភិវឌ្ឍវិស័យទេសចរណ៍ផ្សារភ្ជាប់ការថែរក្សាធនធានធម្មជាតិ។

លោក ម៉េង ហៀង ប្រធានអង្គការអភិរក្សសៀមប៉ាង បានផ្តល់បទសម្ភាសន៍ដល់ក្រុមអ្នកសារព័ត៌មានពីកិច្ចការអភិរក្សនៅតំបន់ដែនជម្រកសត្វព្រៃសៀមប៉ាង លើការគ្រប់គ្រង ការពារ ការអភិរក្សជីវចម្រុះ និងធនធានធម្មជាតិដោយមានការចូលរួមសហការពីមន្រ្តីជំនាញ និងសហគមន៍មូលដ្ឋាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

១. ទិដ្ឋភាពទូទៅ និងកិច្ចសហការ

លោក ម៉េង ហៀង ប្រធានអង្គការអភិរក្សសៀមប៉ាង បានបញ្ជាក់ថា អង្គការអភិរក្សសៀមប៉ាង បានចុះកិច្ចព្រមព្រៀងជាមួយក្រសួងបរិស្ថានក្នុងឆ្នាំ ២០២២ ដើម្បីគ្រប់គ្រងនិងអភិរក្សដែនជម្រកសត្វព្រៃសៀមប៉ាងនៅលើផ្ទៃដីទំហំប្រមាណ ១៣៥ ០០០ ហិកតា។

គម្រោងនេះក៏មានការសហការជាមួយអង្គការមិនរកប្រាក់ចំណេញពីប្រទេសអង់គ្លេសឈ្មោះ Rising Phoenix ដែលមានបុគ្គលិកជំនាញជាង ១០០ នាក់ រួមទាំងអ្នកជំនាញបរទេសដែលមានបទពិសោធន៍រាប់សិបឆ្នាំមកពីប្រទេសអាហ្វ្រិកខាងត្បូង ដើម្បីជួយមើលការខុសត្រូវលើការងារអភិរក្ស។

២. ការងារអភិរក្សសត្វព្រៃ និងទប់ស្កាត់ការបរបាញ់

ដែនជម្រកធម្មជាតិនេះមានសត្វស្លាបជាង ២០០ ប្រភេទ និងប្រភេទសត្វកម្រជិតផុតពូជជាច្រើនដូចជា ត្រយងយក្ស (ដែលពិភពលោកនៅសល់តែប្រមាណ ២០០ ក្បាលប៉ុណ្ណោះ), ក្រពើភ្នំ, ត្មាត និង ទន្សោង ដែលកំពុងតែមានកំណើន និងបន្តពូជបានយ៉ាងល្អ។

ក្នុងរយៈពេល ៣ ឆ្នាំនៃការចុះអនុវត្តគម្រោង លោក ម៉េង ហៀង បានអះអាងថា ការដោះអន្ទាក់បានធ្លាក់ចុះយ៉ាងខ្លាំង បើធៀបនឹងគ្រាដំបូងដែលការដោះអន្ទាក់ឈានដល់ទៅប្រមាណ ៥.០០០ ក្នុងមួយខែ (ស្មើនឹង ៦ ម៉ឺនអន្ទាក់ក្នុងមួយឆ្នាំ)។

បន្ថែមពីនេះ អង្គការថែមទាំងផ្ដល់ការងារដល់អតីតព្រានព្រៃឲ្យមកធ្វើជាបុគ្គលិកអភិរក្សវិញ ដោយសារពួកគាត់ស្គាល់ភូមិសាស្ត្រព្រៃបានច្បាស់ល្អ។

៣. គម្រោងឥណទានកាបូន (Carbon Credits)

អង្គការបានសិក្សាលើគម្រោងកាបូនជាង ២ ឆ្នាំមកហើយ ហើយរំពឹងថានឹងបញ្ចប់ការវាយតម្លៃដើម្បីដាក់លក់នៅលើទីផ្សារក្នុងចុងឆ្នាំនេះ។

ថវិកាដែលបានមកពីការលក់កាបូននេះ នឹងត្រូវយកមកប្រើប្រាស់ដើម្បីពង្រឹងការងារអភិរក្សព្រៃឈើ និងសត្វព្រៃបន្តទៀត។ ភាពជោគជ័យនៃគម្រោងទាមទារឲ្យមានការសហការពីសហគមន៍ ដើម្បីបញ្ឈប់ការកាប់បំផ្លាញព្រៃឈើ និងការបរបាញ់។

៤. ការលើកស្ទួយជីវភាពសហគមន៍

ដើម្បីឲ្យប្រជាពលរដ្ឋជាង ៣ ម៉ឺននាក់ (ប្រមាណ ៥ ០០០គ្រួសារ) ចូលរួមការពារព្រៃឈើ អង្គការបានជួយបង្កើតមុខរបរ និងផ្លាស់ប្ដូរជីវភាពរបស់ពួកគាត់ ដោយចុះកិច្ចសន្យាទិញស្រូវសរីរាង្គ (មិនប្រើជាតិគីមី) ក្នុងតម្លៃថ្លៃ ព្រមទាំងបង្រៀនពួកគាត់ឲ្យចេះជីកស្រះចិញ្ចឹមត្រី ចិញ្ចឹមចង្រិត និងបង្កាត់ពូជឃ្មុំជាដើម។

ក្នុងមួយឆ្នាំៗ អង្គការបានចំណាយថវិកាប្រហែល ១,៥ លានដុល្លារ ទៅលើការងារអភិរក្ស និងការទិញកសិផល (អង្ករ/ស្រូវ) ពីប្រជាពលរដ្ឋដើម្បីជួយទ្រទ្រង់សេដ្ឋកិច្ចមូលដ្ឋាន។

អង្គការក៏បានបង្កើតសាលាបង្រៀនភាសាអង់គ្លេស និងជំនាញវិជ្ជាជីវៈដល់បុគ្គលិកដែលជាប្រជាជនមូលដ្ឋានផងដែរ។

៥. អេកូទេសចរណ៍ និងរមណីយដ្ឋាន

អង្គការបានបង្កើតរមណីយដ្ឋានលំដាប់ខ្ពស់មួយនៅកណ្ដាលព្រៃ ដើម្បីទាក់ទាញភ្ញៀវទេសចរជាតិ និងអន្តរជាតិ ឲ្យមកទស្សនាសត្វព្រៃ ធ្វើសមាធិ និងទទួលយកបទពិសោធន៍បែបធម្មជាតិ។

តម្លៃកញ្ចប់សម្រាប់ដំណើរកម្សាន្ត ៣ ថ្ងៃ ២ យប់ មានតម្លៃប្រមាណ ៧០០ ទៅ ៨០០ ដុល្លារក្នុងម្នាក់ (រួមបញ្ចូលការហូបចុក ស្នាក់នៅ និងសេវាកម្មផ្សេងៗ) ហើយមានការបញ្ចុះតម្លៃរហូតដល់ ៥០% សម្រាប់ប្រជាពលរដ្ឋខ្មែរ។

ទោះបីជារមណីយដ្ឋាននេះអាចប្រឈមនឹងការខាតបង់ថវិកាក៏ដោយ ក៏ចំណូលត្រូវដក ១០% ដើម្បីបរិច្ចាគទៅឲ្យកិច្ចការអភិរក្សវិញជានិច្ច។

ទេសចរដែលមកកម្សាន្តមិនអនុញ្ញាតឲ្យមានការបរបាញ់ ឬបរិភោគសាច់សត្វព្រៃជាដាច់ខាត។

៦. ការសាងសង់ទីលានចុះចតយន្តហោះខ្នាតតូច

ដើម្បីជួយសម្រួលដល់ការធ្វើដំណើររបស់ភ្ញៀវទេសចរពីសៀមរាបមកស្ទឹងត្រែង អង្គការកំពុងស្ថាបនាទីលានចុះចតយន្តហោះខ្នាតតូចមួយ (ទំហំ ២៥ ហិកតា ដែលមានផ្លូវរត់បណ្តោយ ៨០០ម៉ែត្រ និងទទឹង ២៥ម៉ែត្រ)។

ទីលាននេះបម្រើជូនតែយន្តហោះខ្នាតតូចដែលបច្ចុប្បន្នសាងសង់បាន ៤០% ហើយគ្រោងនឹងដាក់ឲ្យដំណើរការនៅពាក់កណ្តាលឆ្នាំ២០២៧។

គម្រោងនេះត្រូវបានសិក្សាយ៉ាងយកចិត្តទុកដាក់ពីមន្ត្រីជំនាញអាកាសចរណ៍ស៊ីវិល និងក្រសួងបរិស្ថាន ដើម្បីធានាថាមិនមានផលប៉ះពាល់ដល់បរិស្ថាន ឬរំខានដល់សត្វព្រៃឡើយ។

ជារួមចក្ខុវិស័យដ៏សំខាន់នៃគម្រោងនេះគឺ “Conservation in action” ដែលមានន័យថា ភ្ញៀវទេសចរដែលមកកម្សាន្តមិនត្រឹមតែទទួលបាននូវបទពិសោធន៍ធម្មជាតិដ៏អស្ចារ្យប៉ុណ្ណោះទេ ថែមទាំងបានចូលរួមចំណែកដោយផ្ទាល់នៅក្នុងការជួយសង្គ្រោះព្រៃឈើ សត្វព្រៃ និងលើកស្ទួយសេដ្ឋកិច្ចរបស់ប្រជាជនកម្ពុជានៅមូលដ្ឋានផងដែរ៕