កីឡា

ការប្រកួតកីឡាឆ្នេរខ្សាច់អាស៊ី លើកទី៦ កម្ពុជាចូលរួមតែ ៤ប្រភេទកីឡាទេក្រោមហេតុផលជួយសន្សំសំចៃថវិកា

បានផុស

៣ ខែ មុន

នៅ

ថ្ងៃអង្គារ ២១ មេសា ២០២៦

ដោយ

នៅព្រឹកថ្ងៃទី២១ ខែមេសា ឆ្នាំ២០២៦ នេះថ្នាក់ដឹកនាំ ប្រតិភូ និងក្រុមកីឡាករ កីឡាការិនីមួយចំនួនទៀតបានចេញដំណើរទៅប្រទេសចិនហើយដើម្បីចូលរួមការប្រកួតកីឡាឆ្នេរខ្សាច់អាស៊ី លើកទី៦ ឆ្នាំ២០២៦ ខណៈកម្ពុជាបញ្ចូនតែ ៤ប្រភេទតែប៉ុណ្ណោះដើម្បីជួយសន្សំសំចៃថវិការដ្ឋ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រូបភាពលើផេកអគ្គនាយកដ្ឋានកីឡា

លោក វ៉ាត់ ចំរើន អគ្គលេខាធិការ នៃគណៈកម្មាធិការជាតិអូឡាំពិកកម្ពុជា និងជារដ្ឋលេខាធិការក្រសួងអប់រំ បានឲ្យដឹងថា ដោយបានការអនុញ្ញាតពីរាជរដ្ឋាភិបាល ក្រសួងអប់រំ យុវជន និងកីឡា បានឲ្យចូលរួមការប្រកួតកីឡាឆ្នេរខ្សាច់អាស៊ី លើកទី៦ ដើម្បីបំពេញកត្តកិច្ចជាសមាជិក នៃក្រុមប្រឹក្សាអូឡាំពិកអាស៊ី។ កម្ពុជាបានចូលរួមព្រឹត្តិការណ៍ឆ្នេរខ្សាច់នេះចំនួន ៥លើកមកហើយដោយលើកចុងក្រោយកាលពីឆ្នាំ២០១៦ នៅឯប្រទេសវៀតណាម។

ថ្នាក់ដឹកនាំកីឡាខាងលើនេះបន្ថែមទៀតថា ការទៅចូលរួមប្រកួតឆ្នាំនេះគឺមានចំនួនសមល្មមនោះទេមិនមានបែបទ្រុងទ្រាយធំដូចលើកមុនៗនោះឡើយ។ នេះជាការច្នៃប្រឌិត និងរួមគ្នាជាមួយរាជរដ្ឋភិបាលក្នុងការកាត់បន្ថយចំណាយណាដែលមិនចាំបាច់។ ដូច្នេះហើយការប្រកួតនៅចិននេះត្រូវបានកាត់បន្ថយច្រើន និងមានគ្រូបង្វឹក កីឡាករ កីឡាការិនីប្រហែលតែជាង ២០នាក់ប៉ុណ្ណោះ។

រូបភាពលើផេកអគ្គនាយកដ្ឋានកីឡា

បញ្ជាក់ដែរថា កាលពីព្រឹកថ្ងៃទី២១ ខែមេសា ឆ្នាំ២០២៦ នេះថ្នាក់ដឹកនាំ ប្រតិភូ គ្រូបង្វឹក កីឡាករ កីឡាការិនីខាងផ្នែកកីឡាបាល់ទាត់លើតុបានចេញដំណើរទៅប្រទេសចិនហើយដើម្បីចូលរួមព្រឹត្តិការណ៍កីឡាឆ្នេរខ្សាច់លើកទី៦ ។ ការចេញដំណើររបស់ប្រតិភូ គ្រូបង្វឹកនេះជាលើកទី២ ហើយស្របពេលលើកទី១ បានចេញដំណើរកាលពីថ្ងៃទី២០ ខែមេសា ម្សិលមិញនេះ។ កម្ពុជាបញ្ជូន ៤ប្រភេទកីឡារួមមាន ជឺជីតស៊ូ ទ្រីយ៉ាត្លុង បាល់ទាត់លើតុ និងចំបាប់ ដែលសរុបទាំងគ្រូបង្វឹក កីឡាករ កីឡាការិនីមានប្រមាណជាង ២០នាក់។ ការប្រកួតនេះនឹងចាប់ផ្ដើមពីថ្ងៃទី២២ ដល់ ៣០ ខែមេសា ឆ្នាំ២០២៦ នៅទីក្រុង Sanya ប្រទេសចិន៕

អត្ថបទដោយ៖ នួន ស៊ីណា