អាជ្ញាធរខណ្ឌច្បារអំពៅសម្រេចបិទខ្ទប់ភូមិកោះនរា ក្រោយឆ្លងរាលដាលជំងឺកូវីដធ្ងន់ធ្ងរ

ភូមិកោះនរា ស្ថិតក្នុងសង្កាត់និរោធ ខណ្ឌច្បារអំពៅ រាជធានីភ្នំពេញ បានសម្រេចបិទច្រកចេញចូលលើកលែងតែអ្នកមានលិខិតបេសសកម្ម និងត្រូវចេញទៅរកមន្ទីរពេទ្យ។

តាមសេចក្តីរាយការណ៍ពីលោក អ៊ុង រ៉ូន ចៅរងទី១សង្កាត់និរោធបានឲ្យដឹងថា ការបិទផ្លូវចេញចូលភូមិកោះនរានេះ គឺធ្វើឡើងតាំងពីម៉ោង០០នាទីឆ្លងចូលថ្ងៃទី២៩ ខែមេសា ដោយក្នុងនោះអ្នកចេញចូលបានមានតែអ្នកមានលិខិតបេសសកម្មនិងរថយន្តសង្រ្គោះឬអ្នកមានជំងឺចាំបាច់ត្រូវការសង្រ្គោះ។

លោកអ៊ុង រ៉ូន បានបញ្ជាក់ថា មូលហេតុដែលអ្នកភូមិកោះនរាត្រូវបានបិទមិនអនុញាតឲ្យចេញចូលដោយសារតែឆ្លង​រាល​ដាលជំងឺកូវីដ១៩ជាសហគមន៍។ មូលហេតុដែលឆ្លងរាលដាលខ្លាំង គឺក្នុងអំឡុងពេលដែលបន្ទប់ព្យាបាលជំងឺរបស់លោកវេជ្ជបណ្ឌឹត សយ សូនីណា មានទីតាំងផ្ទះលេខ១៦៥ ផ្លូវ៣៤៩ភូមិកោះនរាសង្កាត់និរោធបានឆ្លងជំងឺកូវីដក្នុងគ្រួសាររហូតដល់៥នាក់តាំងពីថ្ងៃទី២៤ខែមេសាមក។

លោក អ៊ុង រ៉ូន បានបន្តថាដូច្នេះហើយទើបមានការឆ្លងរាលដាលដោយសារអ្នកភូមិបានមកពិនិត្យព្យាបាលនៅផ្ទះលោកវេជ្ជបណ្ឌឹត សយ សូនីណា ។ហើយក្នុងនោះអ្នកពាក់ពន្ធ័ត្រូវរួសរាន់ទៅពិនិត្យសំណាកនៅទីតាំងរបស់គ្រូពេទ្យចុះមកយកសំណាកស្ថិតនៅតាមបណ្តោយផ្លូវជាតិលេខ១មុខបុរីប៉េង ហួត ភូមិបឹងឈូកសង្កាត់និរោធខណ្ឌច្បារអំពៅរាជធានីភ្នំពេញរៀងរាល់ថ្ងៃ៕

អត្ថបទ ៖ នរា