សេដ្ឋកិច្ច

កម្ពុជារកចំណូលបានជាង ១២៧ លានដុល្លារ ពីការនាំចេញជ័រកៅស៊ូ នៅក្នុងត្រីមាសទី១

បានផុស

២ ខែ មុន

នៅ

ថ្ងៃអាទិត្យ ៣ ឧសភា ២០២៦

ដោយ

កម្ពុជារកចំណូលបានជាង ១២៧ លានដុល្លារ ពីការនាំចេញជ័រកៅស៊ូ នៅក្នុងរយៈពេល ៣ ខែ (មករា-មីនា) ២០២៦ កើនឡើង ១៥,៦៧% ធៀបនឹងរយៈពេលដូចគ្នាកាលពីឆ្នាំមុន ឆ្លុះបញ្ចាំងពីការរក្សាបាននូវស្ថិរភាពទីផ្សារតម្លៃជ័រកៅស៊ូ។ នេះបើយោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា (GDCE)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម GDCE គិតចាប់ពីខែមករា ដល់ខែមីនា ២០២៦ ទីផ្សារនាំចេញជ័រកៅស៊ូសំខាន់ៗរបស់កម្ពុជា រួមមាន ប្រទេសវៀតណាម មានទំហំទឹកប្រាក់ ១០៤ លានដុល្លារ ចិនមានតម្លៃជាង ១៣ លានដុល្លារ និងម៉ាឡេស៊ីជាង ៥ លានដុល្លារ។

លោក ម៉ែន សុភក្តិ ប្រធានសមាគមអភិវឌ្ឍន៍កៅស៊ូ មានប្រសាសន៍ថា ថ្វីត្បិតស្ថានភាពសេដ្ឋកិច្ច នយោបាយ នៅលើពិភពលោកជួបបញ្ហា ប៉ុន្តែការនាំចេញនៅក្នុងវិស័យកៅស៊ូកម្ពុជា បន្តមានស្ថិរភាពល្អ ខណៈតម្លៃក៏បានខ្ពស់គួរសម។

យោងតាមក្រសួងពាណិជ្ជកម្ម នៅក្នុង ឆ្នាំ ២០២៥ ចំណូលបានពីការនាំចេញជ័រកៅស៊ូទទួលបាន ៥៦២ លានដុល្លារ ធ្លាក់ចុះជាង ៦% ធៀបនឹងឆ្នាំ ២០២៤ ដោយសារកំណើនតម្រូវការប្រើប្រាស់ក្នុងស្រុកខ្ពស់។ បរិមាណប្រើប្រាស់ក្នុងស្រុក មានចំនួនជាង ១២ ម៉ឺនតោន កើនឡើង១៤៦% ធៀបនឹងឆ្នាំ ២០២៤។

គិតមកទល់ពេលនេះ កម្ពុជាមានផ្ទៃដីដាំដុះកៅស៊ូសរុបជិត ៤៥ ម៉ឺនហិកតា ផ្ដល់ទិន្នផលប្រមាណ ៤២ ម៉ឺនតោន ដែលពីមុនជ័រកៅស៊ូមានការនាំចេញទាំងស្រុង ខណៈបច្ចុប្បន្ន កម្ពុជាមានលទ្ធភាពកែច្នៃ និងលក់ក្នុងស្រុក៕

អត្ថបទ៖ ឡេង ដេត

Related Topics:ជ័រកៅស៊ូ