ទិន្នផលបង្កងអូស្រ្ដាលីឆ្នាំនេះធ្លាក់ចុះ ដោយសារការបញ្ជាទិញថមថយ

កសិករចិញ្ចឹមបង្កងអូស្រ្ដាលីម្នាក់ស្ថិតនៅខេត្តបន្ទាយមានជ័យ បានឱ្យដឹងថា ឆ្នាំនេះបង្កងនៅក្នុងកសិកររបស់លោកហាក់ធ្លាក់ចុះទិន្នផលបន្ដិច ខណៈការបញ្ជាទិញពីអតិថិជនក៏រៀងថមថយជាងមុន។

ជាម្ចាស់កសិដ្ឋានបង្កងកសិករកម្ពុជា លោក លី រតនៈ ប្រាប់ កម្ពុជាថ្មី ថា បច្ចុប្បន្នការចិញ្ចឹមបង្កងអូស្រ្ដាលីនៅកសិដ្ឋានរបស់លោកហាក់ធ្លាក់ចុះនូវទិន្នផលបន្ដិច ខណៈតម្រូវពីអតិថិនតាមសណ្ឋាគារ និងភោគជនីយដ្ឋានមួយចំនួនក៏ថមថយផងដែរ។

ម្ចាស់កសិដ្ឋានរូបនេះ បានឱ្យដឹងទៀតថា មូលហេតុដែលបង្កងអូស្រ្ដាលីធ្លាក់ចុះទិន្នផលដោយសារតែបញ្ហាអាកាសធាតុ និងដោយសារកត្តាបង្កាត់ពូជមានការខាតបង់ខ្លាំង ទើបធ្វើឱ្យទិន្នផលបង្កងឆ្នាំនេះធ្លាក់ចុះគួរឱ្យគត់សម្គាល់ផងដែរ។

យ៉ាងណាមិញ ចំពោះទីផ្សារវិញ បង្កងអូស្រ្ដាលីឆ្នាំនេះ ពុំសូវមានការបញ្ជាទិញច្រើនដូចកាលពីមុន នេះក៏ដោយតាមភោគនីយដ្ឋានមួយចំនួននៅខេត្តបន្ទាយមានជ័យ និងរាជធានីភ្នំពេញពុំសូវមានតម្រូវការ ដ្បិតប្រភេទបង្កងនេះច្រើនតែជនជាតិចិននិយមបរិភោគច្រើនជាងគេ។

សម្រាប់ពេលបច្ចុប្បន្ន បង្កងអូស្រ្ដាលីក្នុងកសិដ្ឋានរបស់លោក លី រតនៈ នៅតែអាចលក់ចេញទៅកាន់ទីផ្សារបានចន្លោះពី ១៦ដុល្លារ ទៅ ១៧ដុល្លារ ក្នុង១គីឡូក្រាម។

គួរឱ្យដឹងថា មុខរបរចិញ្ចឹមបង្កងអូស្រ្ដាលីនេះ លោក លី រតនៈ បានចាប់ផ្ដើមធ្វើវាឡើងមកតាំងពីឆ្នាំ ២០១៩ មកម្ល៉េះ។ បច្ចុប្បន្ន កសិដ្ឋានរបស់កសិករូបនេះ មានទីតាំងស្ថិតនៅ ក្រុងសិរីសោភ័ណ ខេត្តបន្ទាយមានជ័យ៕

អត្ថបទ ៖ សួស សិត