អាមេរិក គិតចង់ដូរឈ្មោះ ប្រតិបត្តិការវាយប្រហារអ៊ីរ៉ង់ ទៅជា «ញញួរធំ» វិញ

យោងតាមប្រភពពីក្នុងជួររដ្ឋាភិបាលអាមេរិក ប្រាប់ទៅសារព័ត៌មាន NBC កាលពីថ្ងៃអង្គារ ទី១២ ខែឧសភា ឆ្នាំ២០២៦, ទីក្រុងវ៉ាស៊ីនតោន កំពុងគិតចង់ដូរឈ្មោះ ប្រតិបត្តិការនៅអ៊ីរ៉ង់ ពី «Epic Fury» ទៅ «Sledgehammer» ឬ «ញញួរធំ» វិញ។

ទោះគ្មានការបញ្ជាក់ច្បាស់ តែហេតុផលនៅពីក្រោយការប្តូរឈ្មោះនេះ ត្រូវគេសន្និដ្ឋានថា ជា សកម្មភាពយោធាដាច់ដោយឡែកមួយ ស្ថិតក្រោមសេចក្តីសម្រេច ស្តីពីអំណាចសង្គ្រាមឆ្នាំ ១៩៧៣ ដែលច្បាប់នេះ កំណត់រយៈពេល ដែលប្រធានាធិបតី អាចដឹកនាំប្រតិបត្តិការយោធា ដោយមិនចាំបាច់មានការយល់ព្រម ពីសភា ខណៈប្រតិបត្តិការចាស់គឺ ត្រូវបានរដ្ឋមន្ត្រីការបរទេស Marco Rubio ប្រកាសថា បិទបញ្ចប់រួចទៅហើយ។

រឿងនេះកើតឡើង បន្ទាប់ពីប្រមុខសេតវិមាន ដូណាល់ ត្រាំ ប្រកាសថា បទឈប់បាញ់ ជាមួយ​ទីក្រុងតេហេរ៉ង់ ​កំពុង​ស្ថិត​ក្នុង​ស្ថានភាព «សង្គ្រោះបន្ទាន់ យ៉ាងធ្ងន់ធ្ងរ» ហើយប្រភពផ្ទៃក្នុង ពីជួររដ្ឋាភិបាល ទីក្រុងវ៉ាស៊ីនតោន ក៏បង្ហើបឲ្យដឹងដែរថា អាមេរិក កំពុងត្រៀម បើកការវាយប្រហារអាកាស លើអ៊ីរ៉ង់ ជាថ្មី។

ប្រភពចំនួន៣ ដែលសុំមិនបញ្ចេញឈ្មោះ បានប្រាប់ទៅ CNN នៅថ្ងៃអង្គារ ទី១២ ខែឧសភា ឆ្នាំ២០២៦ ថា លោកត្រាំ កំពុងពិចារណា យ៉ាងយកចិត្តទុកដាក់ជាទីបំផុត ចំពោះការចាប់ផ្តើម ប្រតិបត្តិការយោធានៅអ៊ីរ៉ង់ ម្តងទៀត ហើយការវាយប្រហារថ្មីនេះ នឹងតម្រង់លើគោលដៅនៅសល់២៥% ដែលមន្ទីរបញ្ចកោណកំណត់ ប៉ុន្តែការវាយប្រហារលើមុន មិនទាន់ទទួលបាន ជោគជ័យ។

យោងតាមប្រភពដដែល, ប្រធានាធិបតីអាមេរិក ក៏នឹងចាប់អនុវត្តឡើងវិញផងដែរ នូវ «គម្រោងសេរីភាព» ដែលជាប្រតិបត្តិការរំដោះកប៉ាល់ពាណិជ្ជកម្ម ចេញពីច្រកសមុទ្រ Hormuz។

ពាក់ព័ន្ធផែនការទាំងប៉ុន្មានខាងលើ ប្រធានាធិបតីអាមេរិក ត្រៀមនឹងជួបជាមួយ ក្រុមអ្នកជំនាញផ្នែកយុទ្ធសាស្រ្ត និងសន្តិសុខជាតិ ក្នុងរយៈពេលដ៏ខ្លីខាងមុខ ដើម្បីសម្រេច៕

អត្ថបទ៖ សុខ សុវណ្ណ