សេដ្ឋកិច្ច

ការដោះដូរទំនិញកម្ពុជា ជាមួយដៃគូអន្តរជាតិសម្រេចបានទំហំជាង ៣០ ពាន់លានដុល្លារ កើនជិត ១៩% នៅរយៈពេល ៥ ខែ

បានផុស

១៦ វិនាទី មុន

នៅ

ថ្ងៃពុធ ១០ មិថុនា ២០២៦

ដោយ

ការដោះដូរទំនិញកម្ពុជា ជាមួយដៃគូអន្តរជាតិសម្រេចបាននូវទំហំទឹកប្រាក់ជាង ៣០ ពាន់លានដុល្លារ នៅក្នុងរយៈពេល ៥ ខែ ២០២៦ កើនឡើង ១៨,៩% ធៀបនឹងរយៈពេលដូចគ្នាកាលពីឆ្នាំមុនឆ្លុះបញ្ចាំងពីភាពរឹងមាំនៃការធ្វើពាណិជ្ជកម្មរបស់កម្ពុជា។ នេះបើយោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា (GDCE) ចេញផ្សាយនៅថ្ងៃទី ១០ មិថុនា ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍របស់ GDCE បង្ហាញថា ចាប់ពីខែមករា ដល់ខែឧសភា ២០២៦ កម្ពុជានាំទំនិញចេញទៅប្រទេសដៃគូអន្តរជាតិមានតម្លៃជាង ១៤ ពាន់លានដុល្លារ កើនឡើង ១៩% ចំណែកឯទំនិញនាំចូលមកវិញមានតម្លៃជាង ១៦ ពាន់លានដុល្លារ កើនឡើង ១៨,៩%។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា ប្រាប់កម្ពុជាថ្មីថា កំណើននៃការវិនិយោគកើនឡើងជាបន្តបន្ទាប់ នៅក្នុងរយៈពេល ២ ឆ្នាំ កន្លងមកនេះ បានធ្វើឱ្យទំហំពាណិជ្ជកម្មរវាងកម្ពុជាជាមួយដៃគូអន្តរជាតិមានការកើនឡើង។

លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ មានប្រសាសន៍ថា សេដ្ឋកិច្ចកម្ពុជាត្រូវបានវាយតម្លៃថា នឹងសម្រេចបាននូវអត្រាកំណើន ៤,២% នៅក្នុងឆ្នាំ ២០២៦ ថមថយបន្តិច បើធៀបនឹងឆ្នាំ ២០២៥ ដោយសារការទទួលរងនូវកម្មវិបាកអវិជ្ជមានផ្ទួនៗដូចជា តម្លៃប្រេងឥន្ធនៈកើនឡើង សង្គ្រាមនៅតំបន់មជ្ឈិមបូព៌ា និងជម្លោះព្រំដែនកម្ពុជា-ថៃ។

លោកឧបនាយករដ្ឋមន្ត្រីបានបន្ថែមថា កម្ពុជាកំពុងប្រឈមនឹងបញ្ហានៃភាពតានតឹងភូមិសាស្ត្រនយោបាយ ការបន្ទច់បង្អាក់ខ្សែច្រវាក់ផ្គត់ផ្គង់ សង្គ្រាមពាណិជ្ជកម្ម និងការកើនឡើងថ្លៃប្រេងឥន្ធនៈ។

យោងតាមធនាគារពិភពលោក សេដ្ឋកិច្ចកម្ពុជាអាចនឹងមានកំណើន ៣,៩% នៅក្នុងឆ្នាំ ២០២៦ បណ្ដាលមកពីវិបត្តិប្រេង ការធ្លាក់ចុះនៃប្រាក់ផ្ញើពីពលកម្មក្រៅប្រទេស និងការផ្ដល់កម្ចីកាន់តែតឹងរឹង។ ទោះជាយ៉ាងណាសេដ្ឋកិច្ចកម្ពុជា កំពុងបង្ហាញភាពធន់ ដោយមានការទ្រទ្រង់ពីការកើនឡើងនៃការវិនិយោគបរទេស និងការនាំចេញដ៏រឹងមាំ។

ប្រធានគ្រប់គ្រងធនាគារពិភពលោកប្រចាំកម្ពុជាលោកស្រី Tania Meyer យល់ឃើញថា៖ «សេដ្ឋកិច្ចកម្ពុជាកំពុងប្រឹងទប់ខ្លួនបាននៅចំពោះមុខសភាពការណ៍ប៉ះទង្គិចច្រើនយ៉ាងក្នុងពេលដំណាលគ្នា ប៉ុន្តែនៅតែបង្ហាញនូវភាពធន់ ដែលអាចរក្សាបានតាមរយៈវិធានការគោលនយោបាយដែលមានគោលដៅច្បាស់លាស់ ដើម្បីការពារការងារ និងជីវភាពរស់នៅរបស់ប្រជាពលរដ្ឋ»៕

អត្ថបទ៖ ឡេង ដេត

Related Topics:ទំហំពាណិជ្ជកម្ម

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា