សេដ្ឋកិច្ច

ការដោះដូរទំនិញកម្ពុជា-ជប៉ុន មានទំហំជាង $២,៣ ពាន់លាន ត្រឹមរយៈពេល ១១ ខែ

បានផុស

៦ ខែ មុន

នៅ

ថ្ងៃសុក្រ ១២ ធ្នូ ២០២៥

ដោយ

ការដោះដូរទំនិញកម្ពុជា-ជប៉ុន សម្រេចបាននូវទំហំទឹកប្រាក់ជាង ២,៣ ពាន់លានដុល្លារ គិតចាប់ពីខែមករា ដល់ខែវិច្ឆិកា ឆ្នាំ ២០២៥ កើនឡើង ១៨% ធៀបនឹងរយៈពេលដូចគ្នានៅក្នុងឆ្នាំ ២០២៤។ នេះបើយោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា (GDCE)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យរបស់ GDCE បង្ហាញថា គិតចាប់ពីខែមករា ដល់ខែវិច្ឆិកា ឆ្នាំ ២០២៥ ទំហំពាណិជ្ជកម្មទ្វេភាគីកម្ពុជា-ជប៉ុនសរុបជាង ២,៣ ពាន់លានដុល្លារ កើនឡើង ១៨% ក្នុងនោះកម្ពុជានាំទំនិញចេញទៅជប៉ុន មានទំហំទឹកប្រាក់ ១,៤៣ ពាន់លានដុល្លារ កើន ១២,៦% ចំណែកឯការនាំចូលមកវិញមានតម្លៃ ៨៦៨ លានដុល្លារ កើនឡើង២៨,១%។

តួលេខខាងលើបង្ហាញថា កម្ពុជាមានអតិរេកពាណិជ្ជកម្មជាមួយប្រទេសជប៉ុនប្រមាណ ៥៦៤ លានដុល្លារ។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា មានប្រសាសន៍ថា កម្ពុជាបានអនុវត្តនូវកិច្ចព្រមព្រៀង ស្ដីពីភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ដែលធ្វើឱ្យកម្ពុជា ជប៉ុន អូស្ត្រាលី នូវែលហ្សេឡង់ ដែលជាប្រទេស ៥ បូកជាមួយអាស៊ាន ធ្វើឱ្យពាណិជ្ជកម្មទ្វេភាគីកម្ពុជា-ជប៉ុនកើនឡើង ខណៈមានភាពអនុគ្រោះពន្ធច្រើន។

កម្ពុជាធ្វើពាណិជ្ជកម្មជាមួយជប៉ុនសឹងតែពហុវិស័យ ទាំងសម្លៀកបំពាក់ គ្រឿងបន្លាស់ គ្រឿងបង្គុំផ្សេងៗ ខណៈផលិតផលកសិកម្មរបស់កម្ពុជាមួយចំនួនក៏បាននាំចេញទៅទីផ្សារជប៉ុនផងដែរ។

លោកបណ្ឌិត ហុង វណ្ណៈ អ្នកជំនាញផ្នែកសេដ្ឋកិច្ចនៅរាជ្យបណ្ឌិត្យសភាកម្ពុជាមានប្រសាសន៍ថា ទំនាក់ទំនងការទូតកម្ពុជា-ជប៉ុនបន្តរក្សាបានល្អ ខណៈទំនុកចិត្តនៃវត្តមានរបស់ក្រុមហ៊ុនជប៉ុននៅកម្ពុជាជាយូរមកហើយ។

លោកបណ្ឌិត ហុង វណ្ណៈ បន្ថែមថា វិនិយោគិនជប៉ុនពេញចិត្តក្នុងការវិនិយោគនៅកម្ពុជា ដែលទទួលបានផលចំណេញមួយចំនួន ដូចជាផ្សារទំនើបអ៊ីអន និងរោងចក្រគ្រឿងបង្គុំអេឡិកត្រូនិកផ្សេងៗ។

នៅក្នុងឆ្នាំ ២០២៤ ពាណិជ្ជកម្មទ្វេភាគីកម្ពុជា-ជប៉ុន សម្រេចបានទឹកប្រាក់ ២,១៦ ពាន់លានដុល្លារ កើនឡើង ២០,១% ក្នុងនោះកម្ពុជានាំចេញ ទៅជប៉ុន មានទឹកប្រាក់ ១,៤ ពាន់លានដុល្លារ កើន ១៩,៨% និងជប៉ុននាំចូលមកម្ពុជា មានតម្លៃ ៧៥២ លានដុល្លារ កើន ២០,៧%៕

អត្ថបទ៖ ឡេង ដេត