ព័ត៌មានជាតិ

សេដ្ឋីកសិកម្មឧកញ៉ា ម៉ុង ឫទ្ធី មើលឃើញរបត់ផ្លាស់ប្តូរដ៏ធំ ខណៈធនាគារចាប់ផ្តើមបោះដៃជួយគាំទ្រដល់វិស័យកសិកម្ម

បានផុស

៩ ម៉ោង មុន

នៅ

ថ្ងៃចន្ទ ១៥ មិថុនា ២០២៦

ដោយ

ខណៈកន្លងមក គេមើលឃើញការវិនិយោគលើវិស័យកសិកម្មជួបបញ្ហាប្រឈមច្រើន ដែលក្រៅពីទីផ្សារលក់ផលិតផល ជាពិសេសការស្វែងរកប្រភពទុន ដើម្បីពង្រីកការវិនិយោគការធ្វើកសិកម្ម។

យ៉ាងណាមិញ របត់ថ្មីកំពុងមាននិន្នាការប្រែប្រួលជាវិជ្ជមាន។ នេះបើតាមអ្នកឧកញ៉ា ម៉ុង ឫទ្ធី ខណៈដែលធនាគារបានផ្លាស់ប្តូរគំនិតងាកមកគាំទ្រវិស័យកសិកម្មវិញ។

អ្នកឧកញ៉ា ម៉ុង ឫទ្ធី អគ្គនាយកក្រុមហ៊ុន ម៉ុង ឬទ្ធី គ្រុបបានប្រាប់ថា ពីដើមឡើយធនាគារភាគច្រើនមិនព្រមផ្តល់កម្ចីដល់អ្នកធ្វើការលើវិស័យកសិកម្មនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេដ្ឋីកសិកម្មរូបនេះអះអាងថា «សូម្បីតែមានសម្ភារធានាដូចជា អាជីវកម្ម ដីធ្លី ឬផលដំណាំ ក៏ធនាគារមិនទទួលយកដែរ ដែលនេះបញ្ជាក់បានថា ធនាគារហាក់ដូចជាមានបំណងមិនផ្តល់កម្ចីតែម្តង»។

យ៉ាងណាមិញ អ្នកឧកញ៉ាមើលឃើញរបត់ថ្មីបានផ្លាស់ប្តូរ ដោយបច្ចុប្បន្នមានការបន្ធូរបន្ថយការរឹតត្បិត ដែលធ្វើឲ្យកសិករអាចមានលទ្ធភាពទទួលបានកម្ចី សម្រាប់វិនិយោគពង្រីកការធ្វើកសិកម្មបន្ថែមទៀត។

នៅក្នុងជំនួបជាមួយកសិករចិញ្ចឹមសត្វ និងដាំដំណាំកម្ពុជានៅតំបន់កសិទេសចរណ៍ក្រុមហ៊ុន ម៉ុង ឫទ្ធី នៅខេត្តកំពង់ស្ពឺ អ្នកឧកញ៉ា លាង ម៉េង ប្រធានក្រុមអគ្គនាយកក្រុមហ៊ុន ជីប ម៉ុង បានគូសបញ្ជាក់ថា ធនាគារ ជីប ម៉ុង បានរៀបចំទុនប្រមាណ ៥០០ លានដុល្លារ សម្រាប់ជួយកសិករជំរុញការធ្វើកសិកម្មឲ្យ កាន់តែមានសន្ទុះខ្លាំងក្លាថែមទៀត។

លោកថា គោលដៅមិនមែនបញ្ចប់ត្រឹមការផ្តល់កម្ចី ៥០០ លានដុល្លារនោះទេ ពោលនឹងខិតខំធ្វើឱ្យបានបន្ថែមលើសពីនេះទៅទៀត។

ឆ្លើយតបការសាកសួររបស់អ្នកសារព័ត៌មាន ហេតុអ្វីបានជាធនាគារ ជីប ម៉ុង ហ៊ានវិនិយោគលើវិស័យកសិកម្មដែលមាន ហានិភ័យខ្ពស់? អ្នកឧកញ៉ាបញ្ជាក់ថា ដោយសារលោកយល់ពីតម្រូវការរបស់កសិករដែលជួបបញ្ហាប្រភពទុនក្នុងការពង្រីកការដាំដុះ ខណះធនាគារភាគច្រើនតែងតែចៀសវាងការផ្តល់កម្ចីលើវិស័យដែលមានហានិភ័យខ្ពស់នេះ។

«កសិករខ្លះជួបការលំបាក រហូតត្រូវខ្ចីលុយពីឯកជនក្រៅប្រព័ន្ធ ដែលមានអត្រាការប្រាក់ខ្ពស់ ខណៈគោលការណ៍គាំទ្ររបស់ធនាគារជីប ម៉ុង គឺផ្តល់អត្រាការប្រាក់ទាបនិងមិនមានតម្រូវការទ្រព្យធានា ឬបញ្ចាំឡើយ»។

លោកបន្តថា តាមរយៈការជួបកសិករដែលដាំដំណាំពោត កសិករប្រាប់ថា ដំណាំពោតចំណាយពេលប្រហែល ៦ ខែក្នុងការប្រមូលផល ដូច្នេះ ធនាគារ ជីប ម៉ុង គ្រោងបង្កើតផលិតផលឥណទានដែលមានរយៈពេល ៨ ទៅ ៩ ខែ ដែលចំគោលដៅ និងស្របតាមរដូវកាលប្រមូលផលរបស់កសិករ។

នៅពេលកសិករប្រមូលផល និងលក់រួចរាល់ ពួកគេអាចយកប្រាក់មកទូទាត់សងធនាគារវិញដោយមិនបាច់ទុកលុយចោល ឬខាតបង់ការប្រាក់ក្នុងរដូវកាលដែលគ្មានទិន្នផលឡើយ។

ជាមួយគ្នានេះ ដើម្បីកសាងគ្រឹះការអភិវឌ្ឍវិស័យកសិកម្មក្នុងប្រទេសកម្ពុជាឲ្យរឹងមាំ អ្នកឧកញ៉ាបានលើកពីទស្សនវិស័យរួមមួយគឺត្រូវតែរួមដៃគ្នា រវាងអ្នកដាំដុះ អ្នកចិញ្ចឹម អ្នកប្រមូលទិញ និងធនាគារ ដោយមិនចង់ឱ្យមានការនាំវត្ថុធាតុដើមចេញទៅក្រៅប្រទេសទាំងមិនទាន់កែច្នៃ ព្រោះវាធ្វើឱ្យបាត់បង់តម្លៃបន្ថែមនៃផលិតផលជាតិ៕