ប្រធានផ្សារច្បារអំពៅ​ ប្តេជ្ញាបោសសម្អាតសាច់បង្កក និង ទំនិញថៃទាំងឡាយ មិនឲ្យមាននៅលើទីផ្សារ

លោក គួច ចំណាន ប្រធានគណៈកម្មការគ្រប់គ្រងផ្សារច្បារអំពៅ បានឲ្យដឹងថា បច្ចុប្បន្ន ក្រុមអាជីវករ បានចូលរួមយ៉ាងផុលផុសជាមួយស្មារតី នៃការពិហការទំនិញថៃ ទាំងការលក់ និង ការបញ្ជាទិញ។ ពិសេសនោះ ក្រុមការងារគណៈកម្មការផ្សារច្បារអំពៅ ក៏បានយកចិត្តទុកដាក់ខ្ពស់ក្នុងការត្រួតពិនិត្យទប់ស្កាត់ដាច់ខាតលើទំនិញជាប្រភេទសាច់បង្កកដែលមានប្រភពពីប្រទេសថៃមកលើទីផ្សាររបស់ខ្លួន ស្របពេល សម្តេចតេជោ ហ៊ុន សែន ប្រមុខរដ្ឋស្តីទី នៃកម្ពុជា ដាក់បញ្ជាម៉ឺងម៉ាត់លើការបង្ក្រាបសាច់បង្កក និង ទំនិញខុសច្បាប់ទាំងឡាយយកចូលពីថៃមកកម្ពុជានោះ។

លោកសង្កត់ធ្ងន់ថា ក្នុងនាមប្រធានគណៈកម្មការផ្សារច្បារអំពៅ លោកប្តេជ្ញាបោសសម្អាតដាច់ខាតលើសាច់បង្កក និង ទំនិញថៃទាំងឡាយ មិនឲ្យមាននៅលើទីផ្សាររបស់ខ្លួននោះឡើយ។

ក្រុមអាជីវករ ក៏បានបង្ហាញពីស្មារតីចូលរួមខ្ពស់ជាមួយរាជរដ្ឋាភិបាលក្នុងការពហិការមិនលក់ដូរទំនិញថៃ ជួសដោយការលក់ដូរផលិតផល និង ទំនិញក្នុងស្រុក ដើម្បីបង្កើនសេដ្ឋកិច្ចប្រជាជន និង ប្រទេសជាតិ ជាជាងការប្រើផលិតផលប្រទេសថៃដែលផ្តល់ផលចំណេញឲ្យគេ ដើម្បីមានធនធានថវិកាសម្រាប់ទិញអាវុធមកបន្តរំលោភបំពានទឹកដីរបស់កម្ពុជាបន្តទៀត។

គួរជម្រាបថា ប្រតិបត្តិការបង្ក្រាបទំនិញ និង សាច់បង្កកនាំចូលពីប្រទេសថៃ រយៈពេល ៤ ថ្ងៃ កន្លងមកនេះ កម្លាំងអាជ្ញាធរចម្រុះរាជធានីភ្នំពេញ បានឆែកឆេរឃ្លាំងស្តុកទំនិញ ១០៧ ទីតាំង បិទឃ្លុំបេ ១២ ទីតាំង និង នាំខ្លួនមនុស្ស ១៤ នាក់ យកទៅសួរនាំ ខណៈឈ្មួញ ២ នាក់ ត្រូវតុលាការសម្រេចបើកការស៊ើបសួរតាមនីតិវីធីច្បាប់ ពាក់ព័ន្ធការនាំសាច់បង្កកពីថៃចូលមករាជធានីភ្នំពេញ៕
អត្ថបទ ៖ សុភា