កីឡា

ម៉ាស៊ីនរកគ្រាប់បាល់ Kwame ជាកីឡាករបរទេសទី ២ ត្រូវ ព្រះខ័នរាជស្វាយរៀង បន្តកុងត្រាដល់ឆ្នាំ ២០២៨

បានផុស

៧ នាទី មុន

នៅ

ថ្ងៃសុក្រ ៣ កក្កដា ២០២៦

ដោយ

ខ្សែប្រយុទ្ធសញ្ជាតិ ហ្គាណា Kwame Perah បានសម្រេចបន្តកិច្ចសន្យាថ្មីជាផ្លូវការជាមួយក្រុម ព្រះខ័នរាជស្វាយរៀង បន្ទាប់ពីបង្ហាញសមត្ថភាពយ៉ាងលេចធ្លោកាលពីរដូវកាល ២០២៥-២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាព្រឹកថ្ងៃទី ៣ ខែ កក្កដា ឆ្នាំ ២០២៦ នេះ ក្រុម ព្រះខ័នរាជស្វាយរៀង បានប្រកាសអំពីការបន្តកិច្ចសន្យាថ្មីជាមួយនឹងខ្សែប្រយុទ្ធឆ្នើម Kwame Peprah រយៈពេល ២ រដូវកាលទៀត ពោលគឺដល់ឆ្នាំ ២០២៨។

នេះជាកីឡាករបរទេសទី ២ ហើយ បន្ទាប់ពីខ្សែបម្រើប្រយុទ្ធសញ្ជាតិស្កុតលែនដ៍ Conor Shields ដែលក្រុម ព្រះខ័នរាជស្វាយរៀង សម្រេចបន្តកិច្ចសន្យាដល់ឆ្នាំ ២០២៨។ កីឡាករទាំង ២ សុទ្ធតែជាកម្លាំងស្នូល ដែលនឹងអាចជួយក្រុមព្រះខ័នរាជស្វាយរៀង សម្រាប់ការប្រកួតប្រជែងពានក្នុងស្រុក និងពានអន្តរជាតិផ្សេងៗ។

នៅរដូវកាលដំបូង Kwame Peprah ពិតជាបង្ហាញសមត្ថភាពលេចធ្លោមែនទែនជាមួយ ព្រះខ័នរាជស្វាយរៀង ដោយលេងបានសរុប ៤២ ប្រកួត រកបាន ៣៥ គ្រាប់ និង ១១ បញ្ជូន (មិនគិតក្នុងពានសម្តេចតេជោ)។

អតីតជម្រើសជាតិ ហ្គាណា U23 រូបនេះ បានជួយក្រុម ព្រះខ័នរាជស្វាយរៀង ឈ្នះពាន ៣ ក្នុងមួយរដូវកាល រួមមានពានបើករដូវកាល Cambodian Super Cup, ពានលីគកំពូលកម្ពុជា Cambodian Premier League និងពានសម្តេចតេជោ ព្រមទាំងទទួលបានចំណាត់ថ្នាក់លេខ ២ ពានរង្វាន់អាស៊ី AFC Challenge League ។ មិនត្រឹមតែប៉ុណ្ណោះ រូបគេបានឈ្នះពានឯកត្តជន ៣ ផ្សេងទៀតគឺ ពានស្បែកជើងមាស និងពានកីឡាករល្អបំផុតប្រចាំលីគកំពូលកម្ពុជា និងពានស្បែកជើងមាស ពានទ្វីបអាស៊ី AFC Challenge League។