ព័ត៌មានអន្ដរជាតិ

ណាតូនិងអាមេរិក ដាក់រឿងអ៊ីរ៉ង់មួយឡែក! បន្តប្តេជ្ញាការពារអឺរ៉ុប និងជួយអ៊ុយក្រែនឱ្យខ្លាំងជាងមុន

បានផុស

២ ម៉ោង មុន

នៅ

ថ្ងៃសៅរ៍ ៤ កក្កដា ២០២៦

ដោយ

ក្រោយរកាំរកូសពាក្យសម្តីរវាងប្រធានាធិបតីអាមេរិក លោក ដូណាល់ ត្រាំ ជាមួយអង្គការណាតូ ដែលមិនជួយខ្លួនវាយអ៊ីរ៉ង់កាលពីថ្មីៗ អាមេរិកតែងតែប្រើវោហាសព្ទគំរាមដកកងកម្លាំងចេញពីអឺរ៉ុប តែកាលពីម្សិលមិញនេះ ប្រធានាធិបតីអាមេរិករូបនេះ និងមេដឹកនាំណាតូ គ្រោងនឹងបញ្ជាក់ពីការប្តេជ្ញាចិត្តដ៏រឹងមាំជាថ្មី ការពារអឺរ៉ុបរួមគ្នា ក្រោមកតិកាសញ្ញាមាត្រា៥ របស់សម្ព័ន្ធមិត្តក្នុងកិច្ចប្រជុំកំពូលណាតូនៅទីក្រុងអង់ការ៉ា ប្រទេសតួកគីនៅសប្តាហ៍ក្រោយ។ នេះបើយោងតាមឯកសារមួយត្រូវបានអនុម័តដោយឯកអគ្គរដ្ឋទូតណាតូ កាលពីថ្ងៃសុក្រ និងចុះផ្សាយដោយទីភ្នាក់ងារសារព័ត៌មាន Reuters នៅថ្ងៃទី០៣ ខែកក្កដា ឆ្នាំ២០២៦ ។

លោក ត្រាំ ប្រមុខណាតូ និងសម្ព័ន្ធមិត្តអឺរ៉ុប។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមាជិកណាតូក៏គ្រោងនឹងសន្យាផ្តល់ជំនួយយោធាចំនួន ៨០ប៊ីលានដុល្លារដល់អ៊ុយក្រែនសម្រាប់ឆ្នាំ២០២៦ នេះ និងយ៉ាងហោចណាស់លើកម្រិតសមមូលក្នុងការគាំទ្រនៅឆ្នាំ២០២៧ ។ នេះបើយោងតាមសេចក្តីប្រកាស របស់ប្រមុខណាតូ នឹងត្រូវការយល់ព្រមចុងក្រោយពីមេដឹកនាំក្នុងកិច្ចប្រជុំកំពូលប៉ុណ្ណោះ។

សេចក្តីប្រកាសសម្រាប់កិច្ចប្រជុំកំពូល ដែលប្រព្រឹត្តទៅនៅថ្ងៃទី៧ និងទី ៨ ខែកក្កដា ខាងមុខ រៀបរាប់ថា៖ « យើង[…] បានជួបជុំគ្នានៅទីក្រុងអង់ការ៉ា ដើម្បីបញ្ជាក់នូវការប្តេជ្ញាចិត្តដ៏រឹងមាំរបស់យើងឡើងវិញ ក្នុងការការពាររួមគ្នារបស់យើងក្រោមមាត្រា៥ នៃសន្ធិសញ្ញាទីក្រុងវ៉ាស៊ីនតោន ចំពោះចំណងអន្តរអាត្លង់ទិក។ ការវាយប្រហារលើម្នាក់ គឺជាការវាយប្រហារលើយើងទាំងអស់គ្នា»។

ដោយឡែក លោក ត្រាំ តែងតែរិះគន់ណាតូនិងសមាជិកទាំងអស់ ដោយចោទប្រកាន់ពួកគេថាមិនបានចំណាយគ្រប់គ្រាន់លើវិស័យការពារជាតិ ហើយពឹងផ្អែកលើអាមេរិក ដើម្បីការពារអឺរ៉ុប។

បន្ទាប់ពីមានការប៉ះទង្គិចជាមួយមេដឹកនាំអឺរ៉ុបជុំវិញសង្គ្រាមរវាងអាមេរិក និងអ៊ីស្រាអែលប្រឆាំងនឹងអ៊ីរ៉ង់ លោក ត្រាំ បានដាក់ការសង្ស័យលើការប្តេជ្ញាចិត្តរបស់ខ្លួន ចំពោះកតិកាសញ្ញាការពារជាតិទៅវិញទៅមករបស់ណាតូ ហើយថែមទាំងនិយាយថា លោកកំពុងពិចារណាចាកចេញពីសម្ព័ន្ធភាពនេះទៀតផង។

ប៉ុន្តែឯកសារដែលអនុម័តដោយឯកអគ្គរដ្ឋទូតនៃសមាជិកទាំង៣២ របស់ណាតូ រួមទាំងអាមេរិក បង្ហាញថា ប្រធានាធិបតីអាមេរិកមានឆន្ទៈក្នុងការដាក់គំនិតដកខ្លួនចេញពីអឺរ៉ុបមួយឡែក សម្រាប់ពេលនេះ។

សេចក្តីប្រកាសនោះលើកឡើងថា រុស្ស៊ីបង្កការគំរាមកំហែងរយៈពេលវែងដល់សន្តិសុខ និងស្ថិរភាពអឺរ៉ុប-អាត្លង់ទិក។ សមាជិកអឺរ៉ុបរបស់ណាតូ និងកាណាដា កំពុងបំពេញតាមការប្តេជ្ញាចិត្តរបស់ពួកគេ នៅក្នុងកិច្ចប្រជុំកំពូលកាលពីឆ្នាំមុននៅទីក្រុងឡាអេ ដើម្បីបង្កើនការចំណាយលើវិស័យការពារជាតិ។

ការប្រកាសបន្តថា៖ « យើងកំពុងកសាងអនាគតឱ្យអឺរ៉ុបកាន់តែរឹងមាំ នៅក្នុងណាតូកាន់តែរឹងមាំ។ សម្ព័ន្ធមិត្តអឺរ៉ុបនិងកាណាដា ធ្វើការជាមួយអាមេរិក កំពុងទទួលខុសត្រូវកាន់តែខ្លាំង ចំពោះការការពារលើសម្ព័ន្ធមិត្ត។ សម្ព័ន្ធមិត្តក៏បានបញ្ជាក់ជាថ្មីថា អ៊ីរ៉ង់មិនត្រូវមានអាវុធនុយក្លេអ៊ែរឡើយ ហើយអ៊ីរ៉ង់ត្រូវគោរពសេរីភាពនៃការធ្វើនាវាចរណ៍ក្នុងច្រកសមុទ្រហ័រមូសយ៉ាងពេញលេញឡើងវិញ»៕

សម្រួល៖ ណឺ មិនា