ព័ត៌មានអន្ដរជាតិ

អាមេរិក៖ មនុស្សរាប់ពាន់នាក់ កំពុងជម្លៀសបន្ទាន់ ខណៈភ្លើងឆេះព្រៃនៅរដ្ឋ Colorado រាលដាលខ្លាំង

បានផុស

៣៣ វិនាទី មុន

នៅ

ថ្ងៃសៅរ៍ ៤ កក្កដា ២០២៦

ដោយ

ភ្លើងឆេះព្រៃកំពុងឆាបឆេះយ៉ាងលឿន នៅភាគនិរតីនៃទីក្រុង Denver សហរដ្ឋអាមេរិក បង្ខំឱ្យមនុស្សរាប់ពាន់នាក់ជម្លៀស ខណៈខ្យល់បក់ខ្លាំងនៅតែបន្តមានអណ្តាតភ្លើង នៅទូទាំងភាគខាងត្បូងរដ្ឋ Colorado ។

សារព័ត៌មាន Al Jazeera ផ្សាយនៅថ្ងៃទី០៣ ខែកក្កដា ឆ្នាំ២០២៦ ភ្លើងឆេះព្រៃនេះ គឺមានសភាពធំក្នុងចំណោមភ្លើងឆេះព្រៃធំៗប្រហែល៤០ ដែលកំពុងឆេះ នៅទូទាំងភាគខាងលិចសហរដ្ឋអាមេរិក។

ភ្លើងឆេះព្រៃនៅរដ្ឋមួយរបស់អាមេរិក។ រូបភាព៖ AFP

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភ្លើងឆេះព្រៃ Aspen Acres មានទំហំធំជាងភ្លើងឆេះព្រៃដទៃទៀត ដោយរាលដាលដល់ ៤៤ គីឡូម៉ែត្រការ៉េក្នុងមួយយប់ ធ្វើឱ្យទំហំសរុបកើនឡើងដល់ ២៧២ គីឡូម៉ែត្រការ៉េ គិតត្រឹមថ្ងៃសុក្រ។

មិនតែប៉ុណ្ណោះ សំណង់ជាង ១៦០ ត្រូវបានបំផ្លាញ នៅក្នុងភ្លើងឆេះព្រៃនេះ។

អ្នកជំនាញនិយាយថា អាកាសធាតុស្ងួតអស់រយៈពេលជាច្រើនខែ និងព្រិលធ្លាក់ទាបបំផុតក្នុងតំបន់មួយចំនួនកាន់តែធ្ងន់ធ្ងរឡើង ដោយសារការប្រែប្រួលអាកាសធាតុ បង្កើតឱ្យមានស្ថានភាពភ្លើងឆេះព្រៃដ៏គ្រោះថ្នាក់។

អាជ្ញាធរបានបញ្ជាជម្លៀសមនុស្សប្រហែល ២ ២០០នាក់ នៅក្នុងទីក្រុង Colorado រួមជាមួយប្រជាជននៃសហគមន៍ Beulah, Rye និង San Isabel ក្បែរនោះ។

ផ្សែងចេញពីភ្លើងឆេះព្រៃក៏បានរំខានដល់ការធ្វើដំណើរផងដែរ ដោយមន្ត្រីសង្គ្រោះបន្ទាន់រដ្ឋ Colorado ព្រមានថា ភាពមើលឃើញក្នុងតំបន់មួយចំនួនតាមបណ្តោយផ្លូវ Interstate 25 ធ្លាក់ចុះមកត្រឹម ០,៨ គីឡូម៉ែត្រ ដោយសារផ្សែងក្រាស់។

អ្នកស៊ើបអង្កេតនិយាយថា ភ្លើងឆេះព្រៃ Aspen Acres បណ្តាលមកពីមនុស្ស ប៉ុន្តែពួកគេមិនទាន់បានចេញផ្សាយព័ត៌មានលម្អិតផ្សេងទៀតនៅឡើយទេ។

ភ្លើងឆេះព្រៃ Aspen Acres គឺជាភ្លើងឆេះព្រៃមួយក្នុងចំណោមភ្លើងឆេះព្រៃដែលកំពុងបំផ្លាញរដ្ឋ Colorado និងរដ្ឋជិតខាងរបស់ខ្លួន។

ជាឧទាហរណ៍ ក្រុមពន្លត់អគ្គិភ័យបានទប់ស្កាត់ភ្លើងឆេះព្រៃ Snyder បានត្រឹមតែប្រហែល ៦៥ភាគរយប៉ុណ្ណោះ នៅផ្នែកខាងលិចនៃភ្នំ Rocky តាមបណ្តោយព្រំដែនរវាងរដ្ឋ Colorado និងរដ្ឋ Utah ៕

សម្រួល៖ ណឺ មិនា